Read Timugon Murut JUANIS 14 Bible Online

JUANIS 14 - Timugon Murut bible

JUANIS 14

¹Indagu i Jisus ra maamaya' Nano, “Pai' kau kaimamang. Pangintopot kano[43] ri Aki Kapuuno' am pangintopot kau niayuk Raki'.

²Mokoondo' masuang lamin giu' ra baloi ri Ama' Kuno, am mongoi Aku pomongo ramuyun ra intok ayanan. Kalo raguon Ku gitio ramuyun amon ru kalo motopot.[44]

³Mopongo Ku intok min, sumaguli' Aku mongoi pangalap ramuyun, maa' raginio mabaya' kau Raki' ra intok Kuno.

⁴Makapandai kau ra ralan mongoi ra angayan Kuno.”

⁵Pangkuot i Tomas Riso, “Tuhan, kalo makapandai akai ra angayan Muno. Ati kulaan akai makatanda' ra ralan no?”

⁶Taam i Jisus riso, “Aku noyo ralan, katapatan am kaayagan.[45] Kolondo' sangulun pana mokoongoi ri Ama', amon ru kalo mansail io Raki'.

⁷Amon ru makaulig kau Raki',[46] makaulig kau niayuk ra Ama' Kuno. Intor raino nakaulig kano am nakakito niayuk Riso.”

⁸Indagu i Pilipus ri Jisus, “Tuhan, pakitono' i Ama' no ramon. Ginio sama' noyo ramon.”

⁹Kaa' taam i Jisus, “Pilipus, nabuoi takano nababaya', kaa' lakat ayuk poyo kalo makaulig kou Raki'? Osoi ayuk nakakito Raki', nakakito io niayuk ri Ama'. Kaa' kua indagu kou po ra, ‘Pakitono' i Ama' no ramon?’

¹⁰Pilipus, kalo kia mangintopot kou ra Aku ti masimpung ri Ama', am i Ama' pana masimpung Raki'? Atan ondo' rinagu Kuno ramuyun, sala' ka intor Raki' galama', kaa' i Ama' ondo' masimpung Raki', Io galama' mampasauk ra ngaangai' raginio.

¹¹Pangintopot kano ra Aku masimpung ri Ama', am i Ama' masimpung Raki'. Kaa' amon ru kalo, pangintopot kano ayuk ra binaal Kuli.

¹²Ondo' raguon Kutu motopot: Osoi ayuk mangintopot Raki', mambaal ra kandoi mogondo' ra binaal Kuli. Mulu' poyo baalon no ka Aku, sabap ra sumaguli' Aku ri Ama'.

¹³Ginio ra atan ayuk kitaakon min ralalom inggalan Kuno, baalon Ku. Maa' raginio i Aki Kapuuno' katulayon ralalom ru Anak Nano.

¹⁴Amon ru makitaak kau ra atan ayuk ralalom ru inggalan Kuno,[47] baalon Ku.”

¹⁵“Amon ru motogom kau Raki', suguton min panusuban Kuno.

¹⁶Makitaak Aku ri Ama' am mangator Io ramuyun ra Mangingindangan ra bokon, ondo' tumilayun ramuyun.

¹⁷Io no Ambiluo ri Aki Kapuuno', ondo' mambala' ra katapatan ri Aki Kapuuno'. Ulun ru tana' ti kalo makapangapu Riso, sabap ra kalo makakito kapoam makaulig ilo Riso. Kaa' akau makaulig Riso, sabap ra mabaya' am sumimpung[48] Io ramuyun.

¹⁸Kalo manatang Aku ramuyun koson ra anak napatayan ra matuo. Kaa' sumaguli' Aku po ramuyun.

¹⁹Sangkinolor poyo am ulun ru tana' ti kalo boo makakito Raki', kaa' makakito kau Raki'; am sabap ra Aku ti maayag, akau pana maayag.

²⁰Masuku' orou raginio, bagu no makapandai kau ra masimpung Aku ri Ama', am akau pana masimpung Raki', mogondo' niayuk ra Aku masimpung ramuyun.

²¹Osoi ayuk mangapu am sumugut ra pansusuban Kuno, io no ondo' motogom Raki'. Am osoi ayuk motogom Raki' tagamin io ru Ama' Kuno, am Aku pana motogom riso am paintalangon Ku riso osoi Aku sotopot no.”

²²Pangkuot i Judas (sala' ka i Judas Iskariot) ri Jisus, “Tuhan, kua akai ayuk balain Muno ra osoi Okou sotopot no, kaa' ulun ru tana' ti kalo?”

²³Taam i Jisus, “Osoi ayuk motogom Raki', sumugut io ra ragu Kuno. Tagamin io ru Ama' Kuno am matong Akai ruo sumimpung ra ulun no.

²⁴Osoi ayuk kalo motogom Raki', kalo sumugut io ra ragu Kuno. Ragu ondo' norongog min ti, sala' ka intor Raki' kaa' intor ri Ama' ondo' nanusub Raki'.

²⁵Ngaangai' ti rinagu Ku ra Aku lakat ayuk poyo soroi ramuyun.

²⁶Kaa' Ambiluo ri Aki Kapuuno', Io no Mangingindangan ondo' susubon ri Ama' ralalom ru inggalan Kuno, Io noyo mangila' ramuyun ra ngaangai' no am mampakara' ramuyun ra ngaangai' ondo' rinagu Ku noyo.

²⁷Kaansayan patatangon Kuno ramuyun; kaansayan Kuno galama' pataakon Ku ramuyun. Kaansayan Kuno sala' ka koson ra kaansayan ondo' taakin ru tana' ti. Ginio ra pai' kano pagalabo kapoam kalaa'.

²⁸Nokorongog kano ra ragu Kuli, ‘Mugar Aku, kaa' sumaguli' Aku poyo ramuyun.’ Amon ru motogom kau Raki', akau pana maansukan ra Aku mongoi ri Ama', sabap ra maatang poyo i Ama' ka Aku.

²⁹Pabalaan Ku ginio ramuyun raino ra kalo poyo masauk ngaangai' no, maa' raginio ra io masauk, mangintopot kau Raki'.

³⁰Kalo boo masuang raguon Kutu ramuyun, sabap ra nasuku' noyo paat ra io ondo' manguasa' ra tana' ti matong. Kaa' kalo makapanguasa' io Raki'.

³¹Kaa' suguton Ku ngaangai' nanusuban ri Ama', maa' raginio ulun ru tana' ti makapandai ra motogom Aku ri Ama'. Ibok am iruani' takano intok ti.”