Read Timugon Murut JUANIS 18 Bible Online

JUANIS 18 - Timugon Murut bible

JUANIS 18

¹Kopongo i Jisus nakiasi' raginio, ugar Io nabaya' ra maamaya' Nano am sindaup ilo ra rondo' sungoi ininggalanan ra Kidron. Giu' i minongoi ilo ra rondo' taman.

²I Judas, ondo' nampataak Riso ra pantula' Nano, nakapandai ra intok i, sabap ra masalok i Jisus am maamaya' Nano mongoi ra giu' i.

³Ginio ra i Judas pana minongoi ra giu' i nababaya' ra santayaran saujor Roma am kukula' ngaulun pulis ru Baloi Tuhan, ondo' sinusub ru tingganai imam Jaudi am niayuk ulun-ulun ru Parisi. Ilo ti nagibit ra lentera am titiu am poyo ilang.

⁴Nakapandai i Jisus ra ngaangai' ondo' masauk Riso no. Ginio ra inggaari' No ilo am pangkuot, “Osoi uyumon min?”

⁵Taam ilo, “I Jisus, ulun ru Nasarit.” Kon ri Jisus risilo, “Aku no Io.” I Judas, ondo' nampataak Riso ra pantula' Nano, minigor niayuk nabaya' risilo.

⁶Pakaindagu ayuk i Jisus risilo ra, “Aku no Io,” pakalugut ilo ngaangai' am karatu'.

⁷Pangkuot Io poyo risilo, “Osoi uyumon min?” Taam ilo, “I Jisus, ulun ru Nasarit.”

⁸Indagu i Jisus, “Nambala' Aku noyo ramuyun ra Aku no Io. Amon ru Aku no uyumon min, polosoo' min ayuk rangan-rangan Kuno mugar.” (

⁹Minindagu Io raginio, koson nasugut boo ondo' rinagu Nano ragili; ‘Ama', intor ra ulun-ulun ragitio ondo' pinataak Muti Raki', kolondo' sangulun pana maluus.’)

¹⁰I Simon Pitrus nagibit ra ilang. Butuso' no ilang i am piaso' no talingo ra pamiris ru sangulun ulipon ru Tingganai Maayo Imam Jaudi. I Malkus inggalan ru ulipon i.

¹¹Kaa' indagu boo i Jisus ri Pitrus, “Paangkapo' ilang muno! Musiti' Aku manginum ra sangkir kaimbalaan ondo' inaru' noyo ri Ama' Raki'.”

¹²Ginio boo ra santayaran saujor Roma nabaya' ra tingganai nilai am pulis-pulis ru Baloi Tuhan no, namparakop ri Jisus am bangkilo' nilo Io.

¹³Ibito' nilo boo i Jisus paumaa' galing ri Annas, iwan ri Kayapas. I Kayapas ti noyo Tingganai Maayo Imam Jaudi ra bilor raginio.

¹⁴Io no ondo' minindagu ra ulun ru Jaudi ra, “Moonsoi poyo sangulun ayuk matoi, suali ru ngaangai' bansa'.”

¹⁵I Simon Pitrus am sangulun maamaya' ra bokon i siminunu' ri Jisus. Maamaya' ra bokon ti nauligan ru Tingganai Maayo Imam Jaudi i, ginio ra pakasubol io mabaya' ri Jisus ra liliut ru istana ru Tingganai Maayo Imam Jaudi.

¹⁶Kaa' i Pitrus naginaa ra liwar, giu' ra kulobon ru timbok. Kabuoi ragili maamaya' ri Jisus ra bokon ti miningkual poyo am minindagu ra ruandu' magagalung ra kulobon i, am paumposo' no boo i Pitrus.

¹⁷Kaa' indagu ruandu' i riso, “Sala' ka kia okou niayuk sangulun intor ra maamaya' ru ulun no?” Taam io, “Sala'.”

¹⁸Paat ragili masimu', ginio ra pampaang ulipon am pulis-pulis no ra apui, am rarang ilo. Ongoi boo inggaar i Pitrus risilo am baya' rarang.

¹⁹Ginio ra Tingganai Maayo Imam Jaudi i nangkuot ri Jisus ra maamaya' Nano am niayuk pangilaan Nali.

²⁰Taam Io, “Nambala' Aku noyo toojo ra saang ru ulun masuang. Nangila' Aku ra baloi sambayangan am giu' ra Baloi Tuhan, ondo' masalok titimungan ru ulun ru Jaudi. Kalo nansibuni Aku ra Aku minindagu.

²¹Kua kuati' mu Aku? Kuati' ilo ondo' nokorongog ra nangilaan Kuli. Maaru' ilo no nakapandai ra rinagu Kuno.”

²²Karagu ginio ri Jisus, sangulun pulis ra giu' i nampalapis ra pingas Nali, am indagu, “Ginio kia tataam Muno ra Tingganai Maayo Imam?”

²³Taam i Jisus, “Amon ru kalo motopot ragu Kuno, balai' noyo ulun-ulun ti atan nasala. Kaa' amon ru motopot ragu Kuno, kua lapiso' mu Aku?”

²⁴Kopongo ragili, i Jisus ondo' lakat ayuk poyo nabangkil, pinauma' ri Annas ri Kayapas, Tingganai Maayo Imam Jaudi.

²⁵I Simon Pitrus lakat ayuk poyo nangintairoi rarang ra giu' i. Pangkuot ulun-ulun no riso, “Sala' ka kia okou ti pana sangulun maamaya' Nano?” “Sala'!” kon ri Pitrus ra io nagali'.

²⁶Sangulun ulipon ru Tingganai Maayo Imam Jaudi i, io ti pabukat ru ulun ondo' piniasan ri Pitrus ra talingo, minindagu, “Sala' ka kia okou nakito ku giu' ra taman i nabaya' Riso?”

²⁷Kaa' igondo' poyo i Pitrus nagali' am paat ragili niayuk naningkuluuk manuk tandaa' i.

²⁸Nokorondom ra iosusuab, ibito' nilo i Jisus intor ra baloi ri Kayapas mongoi ra istana ru gabenor. Kaa' tingganai ru Jaudi galama' kalo minumpos ra istana i, koson kalo majamol ilo sumugut ra kaulayan ru ugama nilai, sabap ra masaga' ilo gumulung ra akanon ru Pangiantakan ra Paska.

²⁹Ginio sabap boo ra ingkual i Pilatus tumuum risilo am pangkuot io, “Atan kia panguwan min ra ulun ti?”

³⁰Taam ilo, “Kalo paumaan mai Io rirun amon ru kolondo' sala Nano.”

³¹Indagu i Pilatus risilo, “Alapo' am ukumi' min Io sumugut ra ukum mino galama'.” Kaa' taam tingganai ru ulun ru Jaudi no, “Kolondo' kuasa' mai mangani' ra ukuman potoyon.” (

³²Gitio nasauk koson nasugut boo ragu ri Jisus ra ati kulaan patayan Nano.)

³³Ginio ra subol i Pilatus saguli' ra istana am pampiau ri Jisus am kuati' no, “Okou no kia raja' ru ulun ru Jaudi?”

³⁴Taam i Jisus, “Pangkuatan mutu intor ra guang muno galama' kia kapoam tinunungan kou ru ulun bokon?”

³⁵Taam i Pilatus, “Aku sala' ka ulun ru Jaudi. Ulun ru bansa' Muno galama' am tingganai imam no ondo' nampauma' Rirun raki'. Atan guat binaal Muno?”

³⁶Kon ri Jisus, “Pamarintaan Kuno sala' ka giti ra tana' ti. Amon ru giti ra tana' ti, maaru' maamaya' Kuno manggal, maa' raginio kalo pataakin Aku ra tingganai ru Jaudi no. Kaa' sotopot no pamarintaan Kuno sala' ka giti ra tana' ti.”

³⁷Indagu i Pilatus Riso, “Ginio poyo, Okou ti sangulun raja'?” Taam i Jisus, “Rinagu mu noyo ra Aku ti sangulun raja'. Ginio ra Aku inanak am minatong ra tana' ti, koson mampatanou ra katapatan ri Aki Kapuuno'. Osoi ayuk gumagaya' ra katapatan ti mangkirongog io Raki'.”

³⁸Pangkuot i Pilatus Riso, “Atan nua' katapatan?” Pakapangkuot i Pilatus raginio, ingkual io poyo am indagu ra ulun-ulun ru Jaudi no, “Kolondo' rondo' pana sala natuum ku ra ulun ti.

³⁹Kaa' sumugut ra kaindalaman, moonong Pangiantakan ra Paska mampalabus aku ra sangulun inaput. Masaga' kau kia ru palabuson ku ramuyun raja' ru ulun ru Jaudi ti?”

⁴⁰Golok ilo, “Kalo! Sala' ka Io! Palabuso' ramon i Barabas!” (I Barabas ti sangulun teroris.)