Read Timugon Murut JUANIS 19 Bible Online

JUANIS 19 - Timugon Murut bible

JUANIS 19

¹Palapasi' boo ri Pilatus i Jisus.

²Saujor-saujor pana nambaal ra karaun intor ra bulisang ra makaruui am pasampako' ra ulu Nali. Pinambayang nilo poyo Io ra sukub ra matanggilung.

³Nampapalit ilo boo mongoi inggaar Riso am indagu, “Tabi', raja' ru ulun ru Jaudi.” Mopongo ragili lapison nilo pingas Nali.

⁴Igondo' poyo miningkual i Pilatus am indagu ra ulun masuang no, “Ilai'! Paingkualon ku Io ramuyun, maa' raginio makapandai kau ra kolondo' rondo' pana sala natuum kuno ra ulun ti.”

⁵Ingkual boo i Jisus, pinangkaraun ra bulisang makaruui am pinambayang ra sukub matanggilung. Indagu i Pilatus risilo, “Ilai' noyo ulun ti!”

⁶Kakito Io ayuk ru tingganai imam Jaudi am pulis-pulis ru Baloi Tuhan no, golok ilo, “Salipo' Io, salipo' Io!” Indagu i Pilatus risilo, “Alapo' min noyo Io am akau galama' ayuk manalip Riso, sabap ra kalo natuum ku rondo' pana sala nati.”

⁷Taam ulun-ulun ru Jaudi no, “Sumugut ra ukum mai, Io ti musiti' ukumin ra potoyon sabap ra rokoon Nano ra Anak Io ri Aki Kapuuno'.”

⁸Korongog ri Pilatus ragu nilai ni, nalaa' io boo kaga'.

⁹Subol io boo saguli' ra istana i am pangkuot ri Jisus, “Ati intor Mu?” Kaa' nongkoror ayuk i Jisus.

¹⁰Kon poyo ri Pilatus, “Kalo kia tumaam Kou raki'? Karaa', makakuasa' aku mampalabus kapoam manalip Rirun.”

¹¹Taam i Jisus, “Kolondo' kuasa' muno Raki' amon ru kalo aniin kou ri Aki Kapuuno'. Ginio boo ra ulun nampataak Raki' i rirun, maayo poyo tula nano ka okou.”

¹²Korongog ri Pilatus ragu raginii, gumogot io mampalabus ri Jisus. Kaa' golok ulun masuang no, “Amon ru palabuson mu Io, sala' ka rangan kou ru Kaisar. Osoi ayuk migiangku ra raja', manggal io niayuk ri Kaisar.”

¹³Korongog ri Pilatus ragu raginio, ibito' no i Jisus miningkual am panturung io giu' ra intok pamisaraan ininggalanan ra “Sulig Batu”. (Ralalom ragu ru Ibrani, inggalan no “Gabata”.)

¹⁴Paat ragili maar noyo tanga' ru orou ra orou Tampasan ra Pangiantakan ra Paska noyo. Indagu i Pilatus ra ulun masuang no, “Ilai', gitio noyo raja' min.”

¹⁵Ginio ra golok ilo, “Potoyo' Io! Potoyo' Io! Salipo' Io!” Pangkuot poyo i Pilatus, “Salipon ku kia raja' min ti?” Taam tingganai imam Jaudi no, “Rorondo' ayuk raja' mai, i Kaisar.”

¹⁶Pupus i, pataaki' boo ri Pilatus i Jisus risilo koson salipon. Ginio ra ibito' ru saujor-saujor no i Jisus am ugar.

¹⁷Ingkual Io boo nansaan ra salip Nano mongoi ra intok ondo' sabiton ra “Intok kuapak”. (Ralalom ragu ru Ibrani “Golgota”.)

¹⁸Giu' i noyo nanalipan nilo Riso. Mokoondo' ruo ngaulun poyo sinalip nabaya' Riso; sangulun tampilon ra kait am sangulun tampilon ra pamiris, am pinaayan-tanga' Io risilo.

¹⁹Nanusub i Pilatus mamaku' ra rondo' papan rasawat ru salip Nano, ondo' tinulisan ra; “I Jisus, ulun ru Nasarit, raja' ru ulun ru Jaudi”.

²⁰Masuang ulun ru Jaudi nakabasa' ra tinulisan i sabap ra intok napasalipan Riso i kalo maalur intor ra bandar. Pambalaan ti tinulisan ra talu ragu; ragu ru Ibrani, Latin am Junani.

²¹Ginio ra indagu tingganai imam Jaudi no ri Pilatus, “Pai' tulisi' ra ‘Raja' ru ulun ru Jaudi’, kaa' tulisi' ra ‘Kon ru ulun ti, Aku no Raja' ru Ulun ru Jaudi.’ ”

²²Kaa' taam i Pilatus, “Ondo' tinulisan ku noyo, malayun ayuk.”

²³Kopongo Io sinalip ru saujor-saujor no, alapo' nilo bayang Nali am tinayar nilo ra apat ngantayaran; santayar sangulun. Sukub Nali niayuk inalap nilo, kaa' mapila' toojo konoon i am kolondo' pipikit.

²⁴Pagindagu ilo ra sangulun am bokon, “Pai' takau rilako' sukub ti. Moonsoi magugundi' takau koson mangaru' osoi makaalap.” Gitio masauk koson nasugut ondo' tinulisan ra Buuk Kitab; “Bayang Kuno tatayaron nilo, am magugundi' ilo mangalap ra sukub Kuno.” Ginio totopot binaal ru saujor-saujor no koson raginio.

²⁵Mamaar ra salip ri Jisus i minigor ina' Nano, pinongkotob ru ina' Nano, i Maria andu' ri Klopas am niayuk i Maria Magdalina.

²⁶Nakito ri Jisus ina' Nano nabaya' ra maamaya' tagamin Nano minigor ra giu' i. Ginio ra indagu Io ra ina' Nano, “Ina', pinakaanak mu ayuk io.”

²⁷Indagu Io boo ra maamaya' no, “Rangan, pinakaina' mu ayuk io.” Intor ragili, ibito' ru maamaya' no ina' ri Jisus minayan ra baloi nano galama'.

²⁸Napandayan ri Jisus ra raino ngaangai' nopongo noyo, am maa' raginio masugut ondo' tinulisan ra Buuk Kitab, indagu Io, “Pinaason Aku.”

²⁹Giu' i mokoondo' mangkuk makasuang ra wain mataris. Pososopo' nilo busak ru karang ondo' malami' ra wain i, am pasusuko' ra rondo' tataun Isop am patumaa' ra kabang ri Jisus.

³⁰Kainum ri Jisus wain i, indagu Io, “Nopongo noyo!” Kuku' Io boo am kairui' Io ra painawo.

³¹Orou ragili orou kalimo, orou Tampasan ra Pangiantakan ra Paska. Tingganai ru ulun ru Jaudi no marara' mompoloso ra baangkai nilai ra salip paat ra orou Sabat, sabap ra minggu' ragili orou Sabat i maatang kaga'. Ginio ra nakitaak ilo ri Pilatus ra kalayam ru ulun-ulun sinalip no pandakon, am baangkai nilai patuunon intor ra salip.

³²Ginio ra ongoyo' galing pandako' ru saujor-saujor no kalayam ru ruo ngaulun sinalip nabaya' ri Jisus i.

³³Kaa' pakasuku' ilo Riso, ilai' nilo minatoi Io noyo. Ginio ra kalo pinandak nilo kalayam Nano.

³⁴Kaa' turaa' ru sangulun saujor tiagang Nano; am paat ragili niayuk antis boo raraa' am timug. (

³⁵Io ondo' nakakito ra nasauk ti noyo mampatanou ragitio koson akau pana mangintopot.[56] Kaintutunan nati motopot am nakapandai io ra rinagu nati motopot.)

³⁶Baal ragitio pana nasauk koson nasugut ondo' tinulisan ra Buuk Kitab, “Kolondo' rondo' pana bungul Nano pandakon.”

³⁷Mokoondo' poyo tinulisan ra Buuk Kitab, “Ulun-ulun monontong Riso ondo' tinura' nilai.”

³⁸Kopongo ragili, i Jusup, intor ra bandar Arimatia, nakitaak ra baangkai ri Jisus intor ri Pilatus. (I Jusup sangulun maamaya' ri Jisus, kaa' ginio kalo napandayan ru ulun sabap ra nalaa' io ra tingganai ru ulun ru Jaudi.) Iniou ri Pilatus kitaakon nali, am ongoyo' no boo alapo' baangkai i.

³⁹I Nikodimus pana minaya' ri Jusup, io no ondo' ragili igondo' minuma' ri Jisus paat ra iorondom. I Nikodimus ti nagibit ra apa' pampagamis ra owou ondo' pinaratok ra mur am gaharu,[57] ondo' bagat ringai' ti talu ngoopor ngakilo.

⁴⁰Alapo' nilo baangkai i, kulumputo' ra konoon mapulak ondo' moonsoi am anii' ra apa' pampagamis ra owou i sumugut ra kaulayan ru ulun ru Jaudi mompolobong.

⁴¹Intok nanalipan Riso i mokoondo' rondo' taman, am giu' i mokoondo' rondo' lobong ondo' kinali ra bulur batu, ondo' kalo poyo igondo' labangi'.

⁴²Sabap ra kalabangan i mamaar, am orou Sabat pana maar noyo tumalimpuun, ginio ra pabantaa' nilo ayuk baangkai Nali ra giu' i.