Read Timugon Murut JUANIS 2 Bible Online

JUANIS 2 - Timugon Murut bible

JUANIS 2

¹Naruaan ragili, mokoondo' rondo' bunsag paguguatan giu' ra pamagunan Kana, libung ru Galilia. Ina' ri Jisus pana soroi ra giu' i.

²I Jisus am maamaya' Nano piniau niayuk minongoi ra bunsag i.

³Kakai' wain i,[6] indagu ina' ri Jisus Riso, “Nakayaan ilo no ra wain.”

⁴Taam i Jisus, “Ina', kua pantipagon kou Raki' raginio? Kalo poyo nasuku' orou Kuno.”

⁵Indagu ina' Nano ra kambo-kambo no, kono, “Gagayaa' min atan ayuk panusuban Nano ramuyun.”

⁶Mokoondo' ra giu' i onom ngampuun sampa' pambulian ra timug pambaguan sumugut ra kaulayan ru ugama Jaudi. Moonong sampuun masuangan balu' ngoopor kapoam maatus ruo ngoopor ngalito.

⁷Indagu i Jisus ra kambo-kambo no, “Suangi' min sampa'-sampa' ti ra timug.” Suangi' nilo boo koonom-onom sampa' i ra timug saboi nototop.

⁸Indagu boo i Jisus, “Raino suuko' sanganu timug no am pakinami' ra ulun ondo' maatang ra bunsag ragitio.” Ibito' nilo boo timug i riso.

⁹Nangkinam io ra timug, ondo' nasauk boo ra wain, kaa' kalo napandayan no ati intor i, (kambo-kambo ayuk nakapandai), am piawo' no ungkuyon inuatan i,

¹⁰kono, “Kaindalaman ru ulun, mampasulung galing ra wain moonsoi, am amon ru masuang noyo ininum ru tambului, pasulungon no boo wain ondo' kalo kula' moonsoi. Kaa' okou nambuli ra inumon ondo' moonsoi toojo saboi raino!”

¹¹Ondo' binaal ri Jisus ra Kana, libung ru Galilia, kaimuagan[7] kasaa' Nali. Ginio ra nampakito Io ra Io ti matulai am nangintopot maamaya' Nano Riso.

¹²Kopongo ragili i Jisus, ina' Nano, pabukat Nano am maamaya' Nano minongoi ra pekan Kapirnaum am minayan ra giu' i ra kukula' ngoorou ayuk.

¹³Maar noyo masuku' Pangiantakan ra Paska, ginio ra i Jisus minongoi ra Jirusalim.

¹⁴Giu' ra liliut ru Baloi Tuhan i, kakito No mantatalan ra sapi', domba am susuit asang am niayuk mangangalig ra ruit no nantuturung ra giu' i.

¹⁵Ginio ra pamitol Io ra rondo' lalapos am paugaro' No ilo ngaangai' mabaya' ra domba am sapi' nilai intor ra Baloi Tuhan i. Tuntuaro' No mija' ru mangangalig ra ruit no am pinatabulias No ruit nilai.

¹⁶Indagu Io ra mantatalan ra susuit asang no, “Paingkualo' noyo ngaangai' kuliamos min ti. Pai' min sauko' Baloi ru Ama' Kutu ra pasar!”

¹⁷Kakara' boo ru maamaya' Nano ondo' tinulisan ra Kitab: “Aki Kapuuno', togom Kutu ra Baloi Mutu mangkinibit ra patayan Kutu.”

¹⁸Tingganai ru ulun ru Jaudi no minanggal Riso, konilai, “Atan kia kaimuagan saukon Muno koson mampainono' ra makakuasa' Kou mambaal ragitio?”

¹⁹Taam i Jisus, “Amon ru lunsayon min Baloi Tuhan ti, motoojo Ku buoi kataluan.”

²⁰Indagu ilo, “Apat ngoopor am onom ngambilor buoi Baloi Tuhan ti naangun, am matapuli' Mu kia buoi kataluan?”

²¹Kaa' Baloi Tuhan kon ri Jisus ni, sotopot no inan Nano galama'.

²²Ginio ra paat ri Jisus binayag saguli' intor ra kapatayan, kakara' ru maamaya' Nano ra minindagu Io no koson ragitio. Ilo pana nangintopot boo ra tinulisan ra Buuk Kitab am niayuk ondo' rinagu ri Jisus i.

²³Paat ri Jisus soroi ra Jirusalim ra Pangiantakan ra Paska, masuang ulun nangintopot Riso, sabap ra nakakito ilo ra kaimuagan ondo' binaal Nano.

²⁴Kaa' i Jisus galama' kalo nalansan risilo, sabap ra makaintutun Io ra guang ru ngaangai' ulun.

²⁵Kalo pana paintutunon Io ra osoi ayuk pana, sabap ra Io galama' nakatutun noyo ra ngaangai' guangon ru ulun.