Read Timugon Murut JUANIS 20 Bible Online

JUANIS 20 - Timugon Murut bible

JUANIS 20

¹Io maar matawang ra orou minggu', ongoi i Maria Magdalina ra kalabangan i am kakito no batu pinaangob linuir boo intor ra luang ru lobong i.

²Ginio ra nagisimbul io mongoi ri Simon Pitrus am maamaya' ondo' tagamin ri Jisus am pambala' risilo, “Inalap boo Tuhan i intor ra lobong, am kalo nakapandai akai ati nampabantaan Riso.”

³Ginio ra i Pitrus nabaya' ra maamaya' ra bokon i narayus ongoi ra lobong i.

⁴Ilo karuruo nasimbul, kaa' naribok maamaya' ra bokon i intor ri Pitrus am nakasigulu io pakasuku' ra lobong i.

⁵Kuung io ayuk pampalilig ra lobong i am kakito no konoon mapulak paribanta' ra giu' i, kaa' kalo siminubol io.

⁶I Simon Pitrus pana nakasuku' am rayuso' no subolo' lobong i. Ilai' no konoon mapulak i paribanta' ayuk ra giu' i.

⁷Kaa' konoon pinabangkos ra ulu ri Jisus i nakasuai am napurun.

⁸Maamaya' ra bokon ondo' nakasigulu i siminubol niayuk ra lobong. Io pana nakakito am nangintopot boo. (

⁹Sabap ra lakat poyo kalo nakarati' ilo ra ondo' tinulisan ra Buuk Kitab ra Io musiti' maayag saguli'.)

¹⁰Uli' boo karuruo maamaya' i.

¹¹Minigor i Maria mamaar ra lobong i am nantangi'. Liliwa' nantangi', kuung io pampalilig ra lobong i.

¹²Ilai' no ruo ngaulun malaikat nambayang ra mapulak, nanturung ra nampabantaan ra baangkai ri Jisus i, rondo' tampilon ra ulu am rondo' tampilon ra tupakon.

¹³Pangkuot malaikat-malaikat no riso, “Kua pantangi' kou?” Taam io, “Inalap boo baangkai ru Tuhan kuli, am kalo nakapandai aku ati nampabantaan Riso.”

¹⁴Karagu no ginio, pangkaili io am kakito no i Jisus minigor ra giu' i. Kaa' kalo nakaulig io ra Io noyo i Jisus.

¹⁵Pangkuot i Jisus riso, “Kua pantangi' kou? Osoi uyumon muno?” Indos ri Maria Io ti magagalung ra taman am indagu io Riso, “Tuan, amon ru Okou napabanding Riso, balai' aku ati nampabantaan muli Riso, am moongoi ku boo kaalap.”

¹⁶Indagu i Jisus boo riso, “Maria!” Ponontong i Maria ri Jisus am indagu, “Rabuni!” (Arati' no “Mangingila'”).

¹⁷Kaa' indagu i Jisus riso, “Pai' Aku guuto'! Sabap ra kalo poyo nokoongoi Aku ri Ama'. Kaa' ongoi no ra maamaya' Kuno am balai' ilo ra raino sumaguli' Aku ri Ama' Kuno am i Ama' min, ioginio i Aki Kapuuno' Kuno am i Aki Kapuuno' min.”

¹⁸Ginio ra ongoi balai' ri Maria maamaya' Nano ra nakakito io no ra Tuhan am atan rinagu Nali riso.

¹⁹Orou minggu' ragili niayuk ra io palunggai', maamaya'-maamaya' ri Jisus timinimung ra rondo' baloi am nagaput ilo, sabap ra nangalaa' ilo ra tingganai ru ulun ru Jaudi. Pulusat boo ri Jisus, minigor ra tatanga' nilai am indagu, “Kaansayan ramuyun.”

²⁰Karagu No ginio, patalango' No kalindu' am tiagang Nano risilo. Naansukan ilo kaga' nagilong ra Tuhan.

²¹Indagu poyo i Jisus risilo, “Kaansayan ramuyun. Koson ri Ama' nanusub Raki', Aku pana manusub ramuyun.”

²²Sampuyo' No boo ilo am indagu, “Apuo' noyo Ambiluo ri Aki Kapuuno'.

²³Amon ru mangampun kau ra tula ru ulun, i Aki Kapuuno' pana mangampun ra ulun no. Kaa' amon ru kalo mangampun kau ra tula ru ulun, i Aki Kapuuno' pana kalo mangampun ru ulun no.”

²⁴Sangulun intor ra mopor am ruo ngaulun maamaya' ri Jisus, i Tomas (sabiton niayuk “I Nagapir”), kalo nababaya' ra maamaya' ra bokon paat ri Jisus minintalang.

²⁵Ginio ra pambala' ilo ri Tomas, “Nakakito akai no ra Tuhan.” Kaa' taam i Tomas, “Kalo mangintopot aku amon ru kalo makito ku babaya' ru paku' ra kalindu' Nali am niayuk amon ru kalo makama' ku pilat ru kalindu' am tiagang Nali.”

²⁶Saminggu' boo ragili, maamaya' ri Jisus timinimung poyo ra baloi i, am soroi niayuk i Tomas ra giu' i. Ngaangai' ru kulobon piniot ra kunsi', kaa' pulusat ri Jisus, minigor ra tatanga' nilai am indagu, “Kaansayan ramuyun.”

²⁷Indagu Io boo ri Tomas, “Ilai' noyo kalindu' Kutu am kamaa'! Pakamaa' poyo kalindu' muno ra tiagang Kutu. Sala' ka pagantangan, kaa' pangintopot ayuk!”

²⁸Indagu i Tomas ri Jisus, “Okou no Tuhan kuno am i Aki Kapuuno' kuno.”

²⁹Indagu i Jisus riso, “Mangintopot kou sabap ra nakakito kou Raki'. Kaa' pakaansuk noyo ilo ondo' mangintopot kabalu' pana kalo igondo' pakakito.”

³⁰Masuang poyo kaimuagan ondo' binaal ri Jisus ra saang ru maamaya' Nano kalo tinulisan ra kitab ti.

³¹Kaa' ngaangai' ti tinulisan noyo, maa' raginio mangintopot[58] kau ri Jisus noyo Mamamayag ondo' sinusub ri Aki Kapuuno' i, ioginio Anak ri Aki Kapuuno'. Sabap ra pangintapatan mino Riso, mokoowot kau ra kaayagan motopot.