Read Timugon Murut JUANIS 21 Bible Online

JUANIS 21 - Timugon Murut bible

JUANIS 21

¹Kopongo ragili, igondo' poyo minintalang i Jisus ra maamaya' Nano giu' ra Tasik Tibirias. Koson ragitio io nasauk;

²Timinimung poyo i Simon Pitrus, i Tomas (ondo' sabiton ri Nagapir), i Natanil (intor ra pamagunan Kana ra libung Galilia), anak-anak ri Jibidius, am niayuk ruo ngaulun maamaya' ri Jisus ra bokon i.

³Kon ri Pitrus ra bokon no, “Masaga' aku mongoi pamparalo.” Indagu ilo, “Maya' akai rirun.” Ginio ra ugar ilo no am sakoi ra parau. Kabalu' pana nosorondom ilo namparalo, kolondo' sangunor pana noowot nilo.

⁴Ra matawang galing noyo, minigor i Jisus ra nagas ru tasik i, kaa' kalo nauligan nilo ra Io noyo i Jisus.

⁵Indagu i Jisus risilo, “Kolondo' kia papait noowot min?” Taam ilo, “Kolondo'.”

⁶Indagu i Jisus risilo, “Pataano' ralo mino tampilon ra pamiris ru parau no, am mokoowot kau boo.” Ginio ra pataano' nilo ralo nilai, am kalo boo makabunduk ilo sabap ra masuang boo kaga' papait siminulung.

⁷Indagu maamaya' tagamin ri Jisus i ri Pitrus, “Tuhan nai ginio.” Korongog ri Pitrus ginio, pambayang io boo (sabap ra inalus no bayang nali) am tapung ra timug.

⁸Kaa' maamaya' ra bokon no namparau ayuk siminunu', liliwa' namunduk ra ralo ondo' napanu' ra papait. Kalo maalur ilo intor ra lantur, olo'-olo' maatus ngamito ayuk.

⁹Pakaasak ilo intor ra parau, nakito nilo baa ru apui am papait tinunuan am mokoondo' niayuk ruti' ra giu' i.

¹⁰Indagu i Jisus risilo, “Ibito' ra giti kukula' ngaunor papait ra kakarakop mini.”

¹¹Ongoi i Simon Pitrus ra parau i am ralaato' no ralo i, ondo' napanu' ra papait mangasalag. Maatus limo ngoopor am talu ngaunor ringai'. Kaa' kabalu' pana koson raginio suang ru papait i, kalo narilak ralo i.

¹²Indagu i Jisus risilo, “Pagagakan takau.” Kolondo' sangulun pana intor ra maamaya' Nano nakakau' nangkuot Riso, “Osoi Kou?” sabap ra nakatutun ilo ra Io no Tuhan.

¹³Inggaar boo i Jisus risilo, pangalap ra ruti' am pataaki' risilo. Kinooi No niayuk papait i.

¹⁴Gitio kaintalu ri Jisus minintalang ra maamaya' Nano nalupus Io binayag saguli'.

¹⁵Pakaakan ilo, pangkuot boo i Jisus ri Simon Pitrus, “Simon anak ri Juanis, motogom kou po kia Raki' ka ilo ti?” Taam i Simon Pitrus, “Iou Tuhan, nakapandai Kou ra motogom aku Rirun.” Kon ri Jisus riso, “Alungi' noyo anak-anak ru domba Kuno.”

¹⁶Kainduo ri Jisus nangkuot riso, “Simon anak ri Juanis, motogom kou kia Raki'?” Taam io Riso, “Iou Tuhan, nakapandai Kou ra motogom aku Rirun.” Kon ri Jisus riso, “Alungi' noyo domba-domba Kuno.”

¹⁷Kaintalu ri Jisus nangkuot riso, “Simon anak ri Juanis, motogom kou kia Raki'?” Mangiluk guang ri Pitrus sabap ra nangkuot i Jisus riso saboi intalu ra, “Motogom kou kia Raki'?” Indagu io Riso, “Tuhan, nakapandai Kou ra ngaangai'. Okou noyo nakapandai ra motogom aku Rirun.” Indagu i Jisus riso, “Alungi' noyo domba-domba Kuno.

¹⁸Balain tokou toojo: Buoi okou mamulok, okou galama' tumampos am mugar ra ati ayuk kasagaan muno. Kaa' paat ra okou matutuo, patutuyon mu kalindu' muno am bangkilon kou ru ulun bokon, am ibiton kou ra intok kararaan mu.”

¹⁹(Ra ragu ri Jisus raginio mambala' ati kulaan patayan ri Pitrus koson mampatulai ri Aki Kapuuno'.) Indagu boo i Jisus riso, “Baya' no Raki'.”

²⁰Pangkaili i Pitrus am kakito no maamaya' ondo' tagamin ri Jisus i siminunu' risilo. Io noyo ondo' nakainggaar Riso paat ra ilo nagagakan am nangkuot, “Tuhan, osoi kia mampataak Rirun ra pantula' Muno?”

²¹Kakito io ri Pitrus, kuati' no i Jisus, “Tuhan, atan nua' masauk ra ulun ti?”

²²Taam i Jisus riso, “Amon ru masaga' Aku ra maayag io saboi ra Aku matong saguli', kua kaimamang kou raginio? Kaa' okou baya' no Raki'.”

²³Ginio boo ra nakatabual tanou ra gino ngai' ru maamaya' Nano ra maamaya' raginio kalo matoi. Kaa' sotopot no i Jisus galama' kalo minindagu ra kalo matoi io; kaa' kon Nano, “Amon ru masaga' Aku ra maayag io saboi ra Aku matong saguli', kua kaimamang kou raginio?”

²⁴Maamaya' raginio noyo ondo' nampaintutun ra nasauk ti am nanulis noyo ragitio, am nakapandai takau ra motopot kaintutunan nano.

²⁵Masuang poyo binaal ri Jisus ra bokon. Kaa' amon ru koyoon tulisi', guang ku titikop ru tana' ti pana kalo sama' pambulian ra kinasuang ru buuk no.