Read Timugon Murut JUANIS 3 Bible Online

JUANIS 3 - Timugon Murut bible

JUANIS 3

¹Mokoondo' sangulun tingganai ru ugama Jaudi intor ra ulun ru Parisi, makainggalan ri Nikodimus.

²Sarandaman ragili ongoi io tuum ri Jisus am indagu, “Mangingila', makapandai akai ra Okou no sinusub ri Aki Kapuuno' mongoi pangila'. Sabap ra kolondo' sangulun pana makapambaal ra kaimuagan koson ra baalon Muno, amon ru kalo indanganon io ri Aki Kapuuno'.”

³Taam i Jisus, “Balain tokou toojo: Kolondo' sangulun pana masauk ra ulun ri Aki Kapuuno'[8] amon ru kalo anakon io saguli'.”[9]

⁴Pangkuot i Nikodimus, “Ati kulaan ulun nasukor maanak saguli'? Kalo lair makasubol saguli' ra binunakan ru ina' nano am maanak ra kainduo!”

⁵Taam i Jisus, “Balain tokou toojo: Kolondo' sangulun pana masauk ra ulun ri Aki Kapuuno' amon ru kalo anakon ulun no intor ra timug am Ambiluo ri Aki Kapuuno'.

⁶Lalagang anakon ru ulun, kaa' ulun anakon saguli' ru Ambiluo ri Aki Kapuuno'.

⁷Pai' pangimuag amon ru mindagu Aku ra musiti' kou anakon saguli'![10]

⁸Angin sumoyob ra ati ayuk kasagaan nano; maining ayuk bolos no, kaa' kalo mapandayan mu intor kapoam ulian nano. Nogondo' niayuk baal ru ulun anakon saguli' ru Ambiluo ri Aki Kapuuno'.”

⁹Pangkuot poyo i Nikodimus, “Ati kulaan gitio masauk?”

¹⁰Taam i Jisus, “Okou sangulun mangingila' kauligan ra Israil, kua pai' kou pakarati' ragitio?

¹¹Balain tokou toojo: Akai ti mampaintutun ramuyun ra atan napandayan am nakito mai, kaa' marara' kau mangapu.

¹²Kalo mangintopot kau ra pinabala' Kuno ondo' masauk ra tana' ti, atan boo kulaan akau mangintopot amon ru balain takamin ondo' masauk giu' ra suruga'?

¹³Kolondo' sangulun pana nakaaloi ra suruga', suai Anak ru Ulun ayuk, ondo' timinuun intor ra suruga'.

¹⁴Koson kukuo gangsa' pinainsawat ra tataun ri nabi Musa giu' ra tana' kaagisan, nogondo' niayuk ra Anak ru Ulun musiti' painsawaton koson raginio.

¹⁵Maa' raginio moonong ulun ondo' mangintopot Riso mokoowot ra kaayagan motopot am mantilayun.

¹⁶Sabap ra maayo kaga' guang ri Aki Kapuuno' ra ulun ru tana' ti, saboi nanaak Io ra Anak Langkuir Nano, maa' raginio moonong ulun ondo' mangintopot Riso kalo mapuso, kaa' mokoowot ra kaayagan mantilayun.[11]

¹⁷Sabap ra i Aki Kapuuno' nanusub ra Anak Nano mongoi ra tana' ti sala' ka mongoi pangakim ra ulun, kaa' mongoi pamayag risilo.

¹⁸Osoi ayuk mangintopot ra Anak no kalo ukumin. Kaa' osoi ayuk kalo mangintopot Riso, inukum noyo sabap ra kalo nangintopot io ra Anak Langkuir ri Aki Kapuuno'.

¹⁹Gitio noyo ukuman ti: sinda no nakaratong noyo ra tana' ti, kaa' ulun masaga' poyo ra kalandaman intor ra sinda sabap ra ondo' baalon nilai malaat.

²⁰Osoi ayuk mambaal ra kalaatan masisang ra sinda am marara' matong ra sinda, maa' raginio ondo' baalon nilo ra malaat no kalo makasalula'.

²¹Kaa' osoi ayuk gumagaya' ra kasagaan ri Aki Kapuuno',[12] io ti matong ra sinda, maa' raginio makasalula' ra io totopot gumagaya' ra kasagaan ri Aki Kapuuno'.”

²²Kopongo ragili i Jisus am maamaya' Nano minongoi ra Judia. Minayan Io ra giu' i nababaya' risilo ra kukula' buoi liliwa' nampariu' ra ulun.

²³Paat ragili i Juanis kalo poyo inaput. Nampariu' io ra ulun giu' ra Ainun, kalo maalur intor ra pekan Salim, sabap ra maayo timug ra giu' no. Ulun minongoi pakiriu' ri Juanis ra giu' i.

²⁵Intor raginio, kukula' ngaulun maamaya' ri Juanis nagagansang ra sangulun ru Jaudi[13] ra kaulayan mambagu' sumugut ra ugama Jaudi.

²⁶Ongoi ilo boo ri Juanis am indagu, “Mangingila', Io ondo' nababaya' rirun am pinaintutun muno ramon giu' ra sandaup ru Sungoi Jordan i, raino Io pana mampariu' am ngaangai' ulun mongoi boo Riso.”

²⁷Kaa' taam i Juanis, “Kolondo' atan ayuk pana maapu ru sasangulun amon ru kalo i Aki Kapuuno' mangani'.

²⁸Akau galama' sasi' ra mokoondo' ragu kuno ramuyun ra, ‘Aku ti sala' ka Mamamayag ondo' sinusub ri Aki Kapuuno' i, kaa' aku ti sinusub ayuk sumigulu Riso.’

²⁹Koson niayuk ra paguguatan: Ungkuyon uatin mokoowot ra andu'; kaa' mamparangan ra ungkuyon uatin ti ondo' mangkirongog riso pana maansukan. Ginio nai ra raino ti maansukan aku toojo,

³⁰sabap ra Io ti musiti' masauk ra maatang toojo am aku kalo boo.”

³¹Io ondo' matong intor ra suruga' maatang intor ra ngaangai'. Kaa' io ondo' intor ra tana' ti, ulun io tupo ru tana' ti; am ragu nano pana intor ayuk ra baal ru tana'. Kaa' Io ondo' matong intor ra suruga' maatang intor ra ngaangai'.

³²Mampaintutun Io ra norongog am nakito Nali, kaa' kolondo' sangulun pana mangintopot ra kaintutunan Nali.

³³Kaa' osoi ayuk mangintopot ra kaintutunan Nano, io no mangiou ra i Aki Kapuuno' no motopot.

³⁴Io ondo' sinusub ri Aki Kapuuno' mampasaboi ra ragu Nano, sabap ra kalo palasin i Aki Kapuuno' mangani' Riso ra Ambiluo Nano.

³⁵Ama' no motogom ra Anak Nano, am nangani' ra ngaangai' kuasa' Nano Riso.

³⁶Maa' raginio osoi ayuk mangintopot ra Anak no mokoowot ra kaayagan motopot am mantilayun. Kaa' osoi ayuk kalo gumagaya' Riso no, kalo mokoowot ra kaayagan no, kaa' mantilayun i Aki Kapuuno' masisang riso.