Read Timugon Murut JUANIS 4 Bible Online

JUANIS 4 - Timugon Murut bible

JUANIS 4

¹Nakaining noyo ulun-ulun ru Parisi ra masuang poyo ulun minaya' am pakiriu' ri Jisus ka i Juanis. (

²Sotopot no sala' ka i Jisus galama' ondo' nampariu' ra ulun, kaa' maamaya' Nano ayuk.)

³Kapandayi' ri Jisus ginio, iruani' No boo Judia am saguli' ra libung ru Galilia.

⁴Mangkiralan mongoi ra giu', musiti' Io mansail ra libung ru Samaria.

⁵Pakasuku' Io ra pekan Sikar, giu' ra libung ru Samaria, mamaar ra sampila' tana' ondo' pinataakan ri Jakub ra anak nali i Jusup ra galing i.

⁶Giu' i makatulubong ondo' binaal ri Jakub ra galing i. Paat ra tanga' ru orou, panturung i Jisus ra kiing ru tulubong i sabap ra naagui Io ra pangkiralanan. Maamaya' Nano minongoi pambali ra akanon giu' ra pekan. Ratong boo sangulun ruandu' Samaria mongoi sagou am indagu i Jisus riso, “Anii' Aku ra inumon.”

⁷

⁸

⁹Kaa' taamo' Io ru ruandu' no, “Okou ulun ru Jaudi am aku ulun ru Samaria; kua pakitaak Kou raki' ra inumon?” (Ulun ru Jaudi kalo lumatok ra ulun ru Samaria.)[14]

¹⁰Taam i Jisus, “Amon ru nakapandai kou ra taak ri Aki Kapuuno' am osoi makitaak rirun ra inumon, maaru' makitaak kou po Riso am mangani' Io rirun ra timug ondo' mampakaayag.”

¹¹Indagu ruandu' i Riso, “Tuan, tulubong ti malandom kaga' am kolondo' susuuk Muno. Ati kaalapan Muno ra timug mampakaayag no?

¹²Kinamatuaan maili, i Jakub, nangani' ramon ra tulubong ti am io, anak am niayuk bibiag nano nanginum ra timug ragitio. Maatang Kou po kia intor ri Jakub?”

¹³Taam i Jisus, “Osoi ayuk manginum ra timug ragitio, paason poyo,

¹⁴kaa' osoi ayuk manginum ra timug ondo' taakin Kuno, ulun no kalo igondo' boo paason. Sabap ra timug ondo' taakin Kuno koson ra taur bubuluak ondo' mangani' ra kaayagan motopot am mantilayun.”

¹⁵Indagu ruandu' i, “Tuan, anii' aku ra timug no am kalo boo paason aku, am kalo pana boo mansagou aku ragiti.”

¹⁶Taam i Jisus, “Ongoyo' piawo' ralaki muno am saguli' ragiti.”

¹⁷“Kolondo' ralaki ku,” kon ru ruandu' i. Indagu i Jisus, “Motopot ragu muni ra kolondo' ralaki muno.

¹⁸Sabap ra inlimo kono inuot am ungkuyon pasimpung muno raino ti sala' ka ralaki muno. Motopot rinagu muni.”

¹⁹Indagu ruandu' i, “Tuan, makapandai aku ra Okou ti sangulun nabi.

²⁰Kinamatuaan maili siminamba ri Aki Kapuuno' ra bulur ti, kaa' akau ulun ru Jaudi mindagu ra giu' ra bandar Jirusalim ayuk intok sumamba ri Aki Kapuuno'.”

²¹Indagu i Jisus ra ruandu' no, “Pangintopot no Raki', ra sangarawan kalo boo sambaan i Ama' ra bulur ti kapoam giu' ra Jirusalim.

²²Akau ulun ru Samaria sotopot no kalo makatutun osoi sambaan min; kaa' akai ulun ru Jaudi nakatutun osoi sambaan mai, sabap ra pamayagan matong intor ra bansa' ru Jaudi.

²³Raino ti nasuku' noyo paat no, mansail ra indangan ru Ambiluo ri Aki Kapuuno'[15] ulun sumamba ri Ama', ioginio i Aki Kapuuno' ondo' motopot,[16] sabap raginio noyo kasagaan ri Ama'.

²⁴I Aki Kapuuno' no Ambiluo am ra indangan ayuk ru Ambiluo ri Aki Kapuuno' no ulun makasamba ri Aki Kapuuno' ondo' motopot.”[17]

²⁵Indagu ruandu' i ri Jisus, “Napandayan ku noyo matong Mamamayag ondo' sinusub ri Aki Kapuuno', ondo' niayuk sabiton ri Kristus. Paat ra Io matong, mambala' Io ritakau ra ngaangai' no.”

²⁶Taam i Jisus, “Aku no kon muni, ondo' makimansunur rirun ti.”

²⁷Paat ragili maamaya' ri Jisus siminaguli'. Nangimuag ilo nakakito ri Jisus nakimansunur ra sangulun ruandu'. Kaa' kolondo' sangulun pana intor risilo nangkuot ra ruandu' i ra, “Atan kia kasaga' muno?” kapoam nangkuot ri Jisus ra, “Kua pakimansunur Kou riso?”

²⁸Kopongo ragili, tatango' ru ruandu' i rarapu' nali am saguli' ra pekan pambala' ra ulun ru giu' i, kono,

²⁹“Ibok, ongoi takau ilai' sangulun ungkuyon ondo' nambala' raki' ra ngaangai' ondo' binaal kuli. Io no kinua' Mamamayag ondo' sinusub ri Aki Kapuuno' i?”

³⁰Ginio ra ingkual ulun-ulun intor ra pekan minongoi tuum ri Jisus.

³¹Liliwa' ragili kimaiti' Io ru maamaya' Nano, “Mangingila', pangakan!”

³²Kaa' taam i Jisus, “Makaakanon Aku ondo' kalo natutunan min.”

³³Ginio boo ra maamaya' Nano pasakuot ra rondo' am bokon, “Mokoondo' kinua' nagibit Riso ra akanon?”

³⁴Indagu i Jisus, “Akanon Kuno gumagaya' ra kasagaan ru Io ondo' nanusub Raki' am momongo ra kandoi ondo' pinataak Nano Raki'.

³⁵Kon ru ulun, ‘Apat poyo ngambulan am mangkumos noyo.’ Kaa' pulolowo' min noyo umo ra nangalia' no, sama' noyo kumoson.

³⁶Raino ulun mangkumos no nokoowot ra ampos am ampos raginio magibit ra kaayagan motopot am mantilayun. Ginio ra ulun ondo' manias am ondo' mangkumos no mabaya' boo maansukan.

³⁷Motopot ragu ru ulun, ‘Bokon no manias, kaa' bokon no mangkumos.’

³⁸Manusub Aku ramuyun mangkumos giu' ra umo ondo' kalo tiniasan min; ulun ra bokon nangandoi am akau mangumung ra ampos ru kandoi nilo.”

³⁹Masuang ulun ru Samaria intor ra pekan raginio nangintopot ri Jisus, sabap ra bala' ru ruandu' i, kono, “Nambala' Io raki' ra ngaangai' ondo' binaal kuli.”

⁴⁰Pakatuum ayuk ulun-ulun ru Samaria ri Jisus, kimaiti' nilo Io mayan risilo. I Jisus pana naruaan boo ra giu' i.

⁴¹Siminuang poyo ulun nangintopot ri Jisus sabap ra pangilaan Nano.

⁴²Indagu ilo ra ruandu' i, “Raino mangintopot akai, kaa' sala' ka sabap ra bala' muli ayuk, kaa' akai galama' noyo nangkirongog Riso. Am mangintopot akai ra Io no totopot Mamamayag ra ulun ru tana' ti.”

⁴³Kopongo naruaan giu' ra pamagunan Sikar, ongoi boo i Jisus ra libung ru Galilia,

⁴⁴kabalu' pana nakaindagu Io, “Sangulun nabi kalo urumaton ra intok nano galama'.”

⁴⁵Kaa' pakasuku' Io ra Galilia, inuma' Io ru namagun ra giu' i, sabap ra ilo pana minaya' ra Pangiantakan ra Paska ra Jirusalim am nakakito niayuk ra ngaangai' ondo' binaal ri Jisus i.

⁴⁶Saguli' boo i Jisus ra pamagunan Kana, libung ru Galilia, intok nampasaukan Nano ra wain intor ra timug. Giu' ra pekan Kapirnaum, mokoondo' niayuk sangulun pagawai istana ondo' anak nano marualan.

⁴⁷Pakaining io ra minongoi i Jisus ra libung ru Galilia intor ra Judia, ongoi io uma' ri Jisus am pangkimait Riso mongoi ra Kapirnaum mamabas ra anak nano ondo' mamaar noyo matoi.

⁴⁸Kaa' indagu i Jisus riso, “Kalo mangintopot kau amon ru kalo makakito kau ra tatandu' am kaimuagan.”

⁴⁹Taam ru pagawai i, “Tuan, ibok no ra kalo poyo matoi anak kuno.”

⁵⁰Indagu i Jisus riso, “Uli' no, napali' noyo anak muno.” Nangintopot ulun i ra rinagu ri Jisus ni am uli' io boo.

⁵¹Tatanga' io nangkiralan muli', inuma' io ru ulipon nano ondo' nagibit riso ra tanou, “Napali' noyo anak muno!”

⁵²Pangkuot io, “Jam kakula' anak kuno napali'?” Taam ilo, “Jam kasaa' tanga' ru orou ra mai' i nairu' salom nali.”

⁵³Kakara' no jam ragili niayuk inindaguan ri Jisus riso ra, “Napali' noyo anak muno.” Nangintopot boo ilo sambaloi ri Jisus.

⁵⁴Ginio noyo kaimuagan karuo ondo' binaal ri Jisus giu' ra libung ru Galilia ra Io minuli' intor ra Judia.