Read Timugon Murut JUANIS 6 Bible Online

JUANIS 6 - Timugon Murut bible

JUANIS 6

¹Kopongo ragili, siminandaup i Jisus ra Tasik Galilia, ondo' inggalanin poyo ra tasik Tibirias.

²Masuang ulun saguguluyur minaya' Riso, sabap ra nakakito ilo ra kaimuagan binaal Nano paat ra Io namabas ra ulun marualan.

³Pagaloi boo i Jisus am maamaya' Nano ra bulur am panturung Io ra giu' i.

⁴Paat ragili maar noyo Pangiantakan ra Paska.

⁵Pampulolou i Jisus am pakakito ra ulun saguguluyur matong Riso. Ginio ra pangkuot Io ri Pilipus, “Ati nua' pambalian takau ra akanon koson mapaakan ra ngaangai' ulun ti?” (

⁶Minindagu i Jisus koson raginio sabap ra masaga' Io mangkinam ri Pilipus; kaa' Io galama' nakapandai ra atan ondo' saukon No ra maagu no.)

⁷Taam i Pilipus, “Ruti' ra mokologo ruo ngaatus ruit pirok[21] pana kalo makaukop ra kinasuang ru ulun no, kabalu' pana sanganu ayuk maalap ru moonong ulun.”

⁸Indagu poyo sangulun maamaya' Nano ra bokon, i Andrias, pinongkotob ri Simon Pitrus, kono,

⁹“Giti mokoondo' sangulun lalaing ungkuyon ondo' makaruti' barli limo ngampila' am makapapait ruo ngaunor. Kaa' atan onong ru ginio ra susuang ru ulun ti?”

¹⁰Indagu i Jisus ra maamaya' Nano, “Susubo' ilo manturung.” Masakot intok ra giu' i, am pantuturung boo ulun masuang am suang ru ungkuyon limo ngaribu ngaulun.

¹¹Alapo' ri Jisus ruti' i, am paringkuanang Io ri Aki Kapuuno' am tatayaro' No ra ulun masuang ondo' nantuturung i. Papait i pana binaal No koson raginii, am ngaangai' ulun i nangakan saboi nangaasug ilo.

¹²Kaasug ilo ngaangai' raiti, indagu i Jisus ra maamaya' Nano, “Luluro' min ngaangai' suwo no am kalo boo malubat.”

¹³Ginio ra luluro' boo ru maamaya' Nano, am mokoondo' mopor am ruo ngambakul suang ru suwo nalulur nilai intor ra limo ngampila' ruti' barli ondo' inakan ru ulun masuang no.

¹⁴Kakito ayuk ru ulun masuang no kaimuagan sinauk ri Jisus i, konilo, “Totopot Io ti noyo nabi[22] ondo' matong ra tana' ti!”

¹⁵Kaa' natutunan noyo ri Jisus ra jajalin nilo Io masauk ra raja', ginio ra inggalur Io risilo am ongoi misasangulun ra kabuluran.

¹⁶Paat ra palunggai', tuun maamaya' ri Jisus saguli' ra Tasik Galilia.

¹⁷Sakoi ilo ra parau am sindaup ilo ra tasik i mongoi ra pekan Kapirnaum. Kabalu' pana molondom noyo, kaa' lakat ayuk poyo kalio i Jisus minatong risilo.

¹⁸Napaat ragili mapuor bagiu' am kinulun pana lumapos.

¹⁹Nangkabil maamaya' Nano olo'-olo' limo kilomito noyo galur am kakito nilo i Jisus mugar ra rasawat ru timug. Mininggaar Io ra parau i am nangalaa' ilo kaga'.

²⁰Kaa' indagu i Jisus risilo, “Pai' kau kalaa', Aku noyo gitio!”

²¹Ginio ra masaga' ilo mampasakoi Riso ra parau i am paat ragili niayuk nakasaboi parau i ra intok sukuan nilai.

²²Paat ra suabon, ulun masuang ondo' nombolong ra sandaup ru tasik i, nakatutun ra rondo' ayuk parau ra giu' i. Nakapandai ilo ra minugar maamaya' ri Jisus no siminakoi ra parau i, kaa' kalo minaya' i Jisus risilo.

²³Mokoondo' kukula' parau ra bokon intor ra pekan Tibirias minatong am raral mamaar ra intok ru Tuhan minindagu ra paringkuanangan ra ruti' ondo' inakan ru ulun masuang i.

²⁴Kaa' paat ra ulun masuang no nakakito ra kalio i Jisus kapoam maamaya' Nano ra giu' i, sakoi ilo ra parau-parau no am ongoi ra pekan Kapirnaum maguyum ri Jisus.

²⁵Katuum ru ulun masuang no i Jisus giu' ra sandaup i, pangkuot ilo Riso, “Mangingila', sanggilan Kou pakasuku' ragiti?”

²⁶Taam i Jisus, “Balain takamin toojo: Maguyum kau Raki', sabap ra pai' ru nakarati' kau ra kaimuagan binaal Kuni, kaa' nakaakan kau noyo ra ruti' i saboi naasug.

²⁷Pai' kano paguyum ra akanon ondo' mataki' malaat. Kaa' paguyum kano ra akanon ondo' tumaan, ioginio mangani' ra kaayagan motopot am mantilayun. Anak ru Ulun noyo mangani' ramuyun ra akanon ragitio, sabap ra i Aki Kapuuno' noyo galama' nangiou Riso.”

²⁸Pangkuot ilo Riso, “Atan maaru' baalon mai koson sumugut toojo ra kasagaan ri Aki Kapuuno'?”

²⁹Indagu i Jisus, “Gitio noyo baalon min koson sumugut ra kasagaan ri Aki Kapuuno'; pangintopot kano Riso ondo' sinusub ri Aki Kapuuno'.”

³⁰Ginio ra pangkuot ilo Riso, “Atan kaimuagan baalon Muno, maa' raginio makapangintopot akai Rirun? Ati kia rondo' baalon Muno?

³¹Kinamatuaan maili nangakan ra manna[23] giu' ra intok masiluk. Koson tinulisan ra Buuk Kitab, ‘Nangani' Io risilo ra ruti' intor ra suruga'.’ ”

³²Indagu i Jisus risilo, “Balain takamin toojo: Sala' ka i Musa ondo' nangani' ramuyun[24] ra ruti' intor ra suruga'; kaa' i Ama' Kuno ondo' mangani' ramuyun ra ruti' motopot intor ra suruga'.

³³Sabap ra ruti' ondo' taakin ri Aki Kapuuno' sotopot no Io ondo' timinuun intor ra suruga' am manaak ra kaayagan motopot ra ulun ru tana' ti.”

³⁴Ginio ra indagu ilo, “Tuan, kasalok no pangani' ramon ra ruti' raginio.”

³⁵Indagu poyo i Jisus risilo, “Aku noyo ruti' ondo' mampakaayag. Osoi ayuk matong Raki', kalo boo maitilan, am osoi ayuk mangintopot Raki', kalo boo paason.

³⁶Nambala' Aku noyo ramuyun, ra nakakito kano Raki', kaa' kalo niayuk mangintopot kau Raki'.

³⁷Moonong ulun ondo' taakin ri Ama' Raki', makaratong Raki'. Kalo inggalarin Ku osoi ayuk pana ondo' matong Raki'.

³⁸Sabap ra Aku ti timinuun intor ra suruga' sala' ka mambaal ra kasagaan Kuno galama', kaa' mambaal ra kasagaan ru Io ondo' nanusub Raki'.

³⁹Gitio noyo kasagaan ru Io ondo' nanusub Raki': kalo matatakan Aku ra sangulun pana intor risilo ngai' ondo' pinataak Raki', kaa' mampakaayag Aku risilo paat ra Orou Pupus.

⁴⁰Sabap ra gitio noyo kasagaan ri Ama': moonong ulun ondo' makaulig ra Anak Nano am mangintopot Riso, mokoowot ra kaayagan motopot am mantilayun am mampakaayag Aku risilo paat ra Orou Pupus.”

⁴¹Ginio ra pasabutok ayuk boo ulun ru Jaudi ri Jisus sabap ra minindagu Io ra, “Aku noyo ruti' ondo' timinuun intor ra suruga'.”

⁴²Indagu ilo, “Io ti i Jisus, anak ri Jusup. Mauligan mai ama' am ina' Nano. Ati kulaan Io makaindagu ra timinuun Io intor ra suruga'?”

⁴³Taam i Jisus risilo, “Pai' kau pambubutok!

⁴⁴Kolondo' sangulun pana makaratong Raki', amon ru kalo kimaitin io ri Ama' ondo' nanusub Raki' i; am ulun no bayagon Ku paat ra Orou Pupus no.

⁴⁵Tinulisan noyo ra Kitab ru Nabi-Nabi, ‘Ngaangai' ulun ilaan ri Aki Kapuuno'.’ Moonong ulun ondo' mangkirongog ri Ama' am migigila' intor Riso matong Raki'.

⁴⁶Ginio sala' ka aration ra mokoondo' noyo ulun nakakito ri Ama'. Io ondo' intor ri Aki Kapuuno' ayuk nakakito ri Ama'.

⁴⁷Balain takamin toojo: Osoi ayuk mangintopot, mokoowot io ra kaayagan motopot am mantilayun.

⁴⁸Aku noyo ruti' ondo' mampakaayag.

⁴⁹Kinamatuaan mini minatoi niayuk, kabalu' pana nangakan ilo ra manna giu' ra tana' kaagisan.

⁵⁰Kaa' ruti' ondo' timinuun intor ra suruga' sala' ka koson raginio, osoi ayuk mangakan ra ruti' ti kalo matoi.

⁵¹Aku noyo ruti' mampakaayag ondo' timinuun intor ra suruga'. Osoi ayuk mangakan ra ruti' ragitio, maayag io ra mantilayun. Ruti' ra pataakin Kuno, io no inan Kutu, maa' raginio ulun ru tana' ti mokoowot ra kaayagan.”

⁵²Intor ra ragu Nani, mansasangor boo ulun-ulun ru Jaudi ra rondo' am bokon, konilo, “Ati kulaan ulun ti mampaakan ritakau ra inan Nano?”

⁵³Indagu i Jisus risilo, “Balain takamin toojo: Amon ru kalo mangakan kau ra inan ru Anak ru Ulun am manginum ra raraa' Nano, kalo totopot maayag kau.

⁵⁴Osoi ayuk mangakan ra inan Kutu am manginum ra raraa' Kutu, mokoowot io ra kaayagan motopot am mantilayun am bayagon Ku io paat ra Orou Pupus.

⁵⁵Sabap ra inan Kutu noyo akanon ra motopot, am raraa' Kutu pana inumon ra motopot.

⁵⁶Osoi ayuk mangakan ra inan Kutu am manginum ra raraa' Kutu, sumoroi io Raki' am Aku pana sumoroi riso.

⁵⁷I Ama' ondo' maayag nanusub Raki', am makakaayagan Aku intor Riso. Koson niayuk ra osoi ayuk mangakan ra inan Kutu, makakaayagan io intor Raki'.

⁵⁸Gitio noyo ruti' ondo' timinuun intor ra suruga'; Io ti sala' ka koson ra ruti' ondo' inakan ru kinamatuaan mini, ondo' minatoi niayuk. Kaa' ulun ondo' mangakan ra ruti' ti maayag ra mantilayun.”

⁵⁹Ngaangai' ti rinagu ri Jisus ra Io nangila' giu' ra baloi sambayangan giu' ra Kapirnaum.

⁶⁰Korongog nilo ragu ri Jisus ni, masuang intor ra maamaya' Nano minindagu, “Mapagon toojo pangilaan ti. Osoi tumaan mangkirongog raginio?”

⁶¹Kapandayi' ri Jisus ra pasabutok maamaya' Nano ra nangilaan Nali, pangkuot Io risilo, “Mampakalawo kia ra guang min nangilaan Kuni?

⁶²Ati poyo kulaan ru makakito kau ra Anak ru Ulun rumuli' ra intor Nali?

⁶³Ambiluo ri Aki Kapuuno' noyo mangani' ra ulun ra kaayagan, kuasa' ru ulun kalo makapambaal raginio. Ragu Kutu intor ra Ambiluo ri Aki Kapuuno' ondo' mampakaayag ramuyun.

⁶⁴Kaa' mokoondo' niayuk kukula' ngaulun intor ramuyun ondo' kalo mangintopot.” (Natutunan noyo ri Jisus intor ra talimpuun i, osoi kalo mangintopot Riso am osoi mampataak Riso ra pantula' Nano.)

⁶⁵Indagu Io poyo, “Ginio sabap ra nambala' Aku ramuyun ra kolondo' sangulun pana makaratong Raki' amon ru kalo iowon ru Ama' Kuno.”

⁶⁶Intor raginii, masuang maamaya' Nano timinuliar am kalo boo maya' ilo Riso.

⁶⁷Ginio ra pangkuot i Jisus ra mopor am ruo ngaulun maamaya' Nano, “Akau pana, masaga' kau kia mangiruan Raki'?”

⁶⁸Taam i Simon Pitrus Riso, “Tuhan, osoi poyo angayan mai? Ragu Muno mangani' ra kaayagan motopot am mantilayun.

⁶⁹Raino mangintopot akai toojo ra Okou no Matulai ondo' sinusub ri Aki Kapuuno'.”

⁷⁰Indagu boo i Jisus risilo, “Kabalu' pana Aku noyo nampili' ramuyun mopor am ruo ngaulun ringai', kaa' sangulun intor ramuyun no riwato.”

⁷¹I Judas kon Nati, anak ri Simon Iskariot. Sabap ra kabalu' pana io sangulun intor ra mopor am ruo ngaulun maamaya' ri Jisus, kaa' mampataak io ri Jisus ra pantula' Nano ra tauli no.