Read Timugon Murut JUANIS 7 Bible Online

JUANIS 7 - Timugon Murut bible

JUANIS 7

¹Kopongo ragili, ongoi i Jisus ra ati ayuk intok ra libung ru Galilia. Marara' Io mongoi ra Judia sabap ra tingganai ru Jaudi ra giu' i gumogot mamatoi Riso.

²Mamaar noyo ra Pangiantakan Mangkalukub ra Raun.[25]

³Ginio ra indagu boo pabukat ri Jisus no Riso, “Iruani' noyo intok ragitio am ongoi no ra Judia, maa' raginio maamaya' Muno pana makakito ra atan ondo' baalon Muno.

⁴Kolondo' sangulun pana mambuni ra baalon nano amon ru masaga' io kauligan ru ulun. Amon ru baalon Muno ngaangai' tatandu' raginio, polosoo' noyo ngaangai' ulun ru tana' ti makapandai.” (

⁵Pabukat Nano galama' pana kalo nangintopot Riso.)

⁶Indagu boo i Jisus risilo, “Kalo poyo nasuku' orou inaru' Raki', kaa' akau sasanggilan ayuk.

⁷Akau kalo kasisangin ru ulun ru tana' ti, kaa' Aku kasisangin nilo, sabap ra masalok Aku mampasalula' ra kalaatan nilono.

⁸Ongoi kano ra pangiantakan no, kaa' Aku kalo mokoongoi[26] sabap ra kalo poyo nasuku' orou inaru' Raki'.”

⁹Karagu ri Jisus koson raginio ra pabukat Nano, tatang Io ra Galilia.

¹⁰Pakaugar ayuk pabukat Nano minongoi ra pangiantakan i, am i Jisus pana siminunu' niayuk. Kaa' kalo timinalang Io ra ulun masuang, simininok Io ayuk minongoi.

¹¹Tingganai ru ulun ru Jaudi naguguyum Riso paat ra pangiantakan i, konilo, “Ati Io?”

¹²Ulun masuang i pana posokonos ayuk mansunur Riso. Mokoondo' mindagu ra, “Ulun moonsoi Io.” Mokoondo' poyo bokon mindagu, “Kalo! Mampakalayau Io ra ulun.”

¹³Kaa' kolondo' sangulun pana makakau' mansunur Riso ra bolos mosongou, sabap ra nalaa' ilo ra tingganai ru ulun ru Jaudi.

¹⁴Naintanga' noyo pangiantakan i, subol boo i Jisus ra Baloi Tuhan am timinalimpuun mangila'.

¹⁵Nangimuag toojo tingganai ru ulun ru Jaudi, am pagindagu ilo boo, “Ati kulaan ulun ti makapandai ra masuang pangilaan, kabalu' pana baal raginio kalo igondo' Io ilaa'?”

¹⁶Taam i Jisus, “Pangilaan Kutu sala' ka intor Raki', kaa' intor ri Aki Kapuuno' ondo' nanusub Raki'.

¹⁷Osoi ayuk masaga' mambaal ra kasagaan ri Aki Kapuuno', makatutun io ati intor ru pangilaan Kutu; intor kia ri Aki Kapuuno' kapoam intor Raki' galama' ayuk.

¹⁸Ulun ondo' mangila' sumugut ra pangkaraan nano galama', io no makiompor ayuk. Kaa' ulun ondo' mongompor Riso ondo' nanusub riso, io ti motopot am kalo magabau.

¹⁹Sala' ka kia i Musa nangani' ramuyun ra Ukum no? Kaa' kolondo' sangulun pana intor ramuyun no gumagaya' toojo ra Ukum no. Kua gogot kau mamatoi Raki'?”

²⁰Taam ulun masuang no, “Mantuyang Kou! Osoi masaga' mamatoi Rirun?”

²¹Taam ri Jisus, “Rondo' ayuk kaimuagan binaal Kuno am nangimuag kau ngai'.

²²I Musa nanusub ra sunatin kau am ginio ra orou Sabat pana sunatin min lalaing ungkuyon (sotopot no kaulayan ru sunat no sala' ka intor ri Musa, kaa' intor ra kinamatuaan ra galing i).

²³Amon ru sunatin min lalaing ungkuyon paat ra orou Sabat am gitio kalo manggal ra Ukum ri Musa, kolondo' sasaban sumangit Raki' sabap ra kinapali' Ku ngaangai' ra sangulun paat ra orou Sabat?

²⁴Langgai' min noyo mangakim ra ulun maya' ra atan ondo' makito ayuk, kaa' akimi' min noyo maya' ra atan ondo' motopot.”

²⁵Mokoondo' kukula' ngaulun mamagun Jirusalim mindagu ra, “Sala' ka kia Io ti ondo' uyumon ru tingganai takano ra potoyon?

²⁶Ilai', mindagu Io ra saang ru ulun masuang, am tingganai takano kalo niayuk manggal Riso. Natutunan nilo nua' ra Io ti noyo Mamamayag ondo' sinusub ri Aki Kapuuno' i?

²⁷Paat ra Mamamayag no matong, kolondo' sangulun pana makapandai ra intor nano, kaa' makapandai takau ngai' ra intor ru ulun ti.”

²⁸Tatanga' i Jisus nangila' giu' ra Baloi Tuhan, pangkuot Io ra mosongou toojo, “Motopot kia ra nakaulig kau Raki' am nakapandai kau ra intor Kuli? Kalo minatong Aku ra kuasa' Kutu galama', kaa' sinusub Aku ru Io ondo' maintopot, am Io no kalo mauligan min.

²⁹Aku makaulig Riso, sabap ra Io noyo ondo' nanusub Raki' am Aku ti minatong intor Riso.”

³⁰Ginio ra nangkinam ilo pamparakop Riso, kaa' kolondo' sangulun pana makakau' mampaguut Riso, sabap ra kalo poyo nasuku' orou inaru' no.

³¹Kaa' masuang intor ra ulun masuang no nangintopot Riso. Konilo, “Paat ra Mamamayag ondo' sinusub ri Aki Kapuuno' i matong, kalo lair makapambaal Io ra masuang poyo kaimuagan intor ra ulun ti.”

³²Ulun ru Parisi nokorongog ra ati kulaan ulun-ulun no posokonos mansunur ri Jisus. Gili boo ra ilo am tingganai imam Jaudi nanusub ra kukula' ngaulun pulis ru Baloi Tuhan mongoi pamparakop Riso.

³³Kaa' indagu i Jisus, “Kalo boo mabuoi Aku soroi ramuyun am sumaguli' Aku Riso ondo' nanusub Raki'.

³⁴Uyumon min Aku, kaa' kalo matuum min Aku, sabap ra ati angayan Kuno, kalo mokoongoi kau.”

³⁵Tingganai ru ulun ru Jaudi nagindagu ra rondo' am bokon, “Ati nua' angayan Nano saboi kalo makatuum takau Riso? Mongoi Io kia ra ulun ru Jaudi ondo' liminatok ayan ra bandar ru ulun ru Junani? Mongoi Io kia pangila' ra ulun ru Junani?

³⁶Atan kon Nano ra, ‘Maguyum kau Raki', kaa' kalo makatuum kau Raki'’ am niayuk ra, ‘Akau kalo mokoongoi ra angayan Kuno.’ ”

³⁷Paat ra orou kaampusan ru pangiantakan i, ioginio orou maatang toojo, bigor i Jisus am indagu ra mosongou, “Osoi ayuk paason, polosoo' io no matong Raki' am manginum.

³⁸Koson tinulisan ra Buuk Kitab, ‘Osoi ayuk mangintopot Raki', tumilis intor ra guang nano timug ondo' mampakaayag.’ ”[27] (

³⁹Kon Nano am Ambiluo ri Aki Kapuuno' ondo' pootoron ra osoi ayuk ondo' mangintopot Riso. Kaa' paat ragili Ambiluo ti kalo poyo pinaator sabap ra katulayan ri Jisus kalo poyo pinatalang.)

⁴⁰Mokoondo' kukula' ngaulun ondo' nokorongog ra ragu ni, minindagu ra, “Totopot Io ti noyo Nabi inaanin takau.”[28]

⁴¹Kon poyo ru bokon i, “Io ti noyo Mamamayag ondo' sinusub ri Aki Kapuuno'.” Kaa' mokoondo' poyo minindagu ra, “Mamamayag ondo' sinusub ri Aki Kapuuno' sala' ka intor ra Galilia!

⁴²Tinulisan noyo ra Buuk Kitab ra: ‘Mamamayag ondo' sinusub ri Aki Kapuuno' intor ra papag ri Daut, am intor Io ra pamagunan Bitligim, intok ri Daut ragili.’ ”

⁴³Nagagansang boo ulun masuang sabap ri Jisus.

⁴⁴Mokoondo' niayuk kukula' ngaulun masaga' mamparakop Riso, kaa' kolondo' sangulun pana nampaguut Riso.

⁴⁵Paat ra siminaguli' pulis-pulis ru Baloi Tuhan ondo' sinusub mamparakop ri Jisus, pangkuot tingganai imam am ulun-ulun ru Parisi risilo, “Kua, kalio nai inibit min Io?”

⁴⁶Taam ru pulis-pulis no, “Kalo igondo' akai pakaining ra sangulun makaindagu koson ra ulun raginio.”

⁴⁷Indagu ulun-ulun ru Parisi, “Akau pana pinalayau No kia?

⁴⁸Ilai', kolondo' sangulun pana tingganai takau kapoam ulun-ulun ru Parisi mangintopot Riso.

⁴⁹Kaa' ulun masuang ti ondo' kalo makatutun ra Ukum ri Musa, mausung ilo!”

⁵⁰Mokoondo' sangulun ru Parisi, i Nikodimus, ondo' minongoi tuum ri Jisus ragili, minindagu risilo,

⁵¹“Sumugut ra Ukum ri Musa, kalo makapangukum takau ra sasangulun ru kalo poyo morongog ragu nano am niayuk mapandayan takau atan binaal nano.”

⁵²Taam ilo, “Kua saungo' mu Io, okou pana intor ra Galilia kia? Aratio' Buuk Kitab no am mapandayan mu ra kolondo' sangulun pana nabi matong intor ra Galilia.”[29] [

⁵³Ilo ngaangai' pana uli' boo ra baloi nilai sigagama'.