Read Timugon Murut JUANIS 8 Bible Online

JUANIS 8 - Timugon Murut bible

JUANIS 8

²Nokorondom ra suabon i, subol Io ra Baloi Tuhan am ulun masuang minatong Riso. Ginio ra panturung Io am tumalimpuun mangila' risilo.

³Mangingila' ra Ukum ri Musa am ulun-ulun ru Parisi nagibit ra sangulun ruandu' ondo' narampatan liminapau. Pabigoro' nilo ruandu' i ra saang ru ulun masuang.

⁴Indagu ilo ri Jisus, “Mangingila', ruandu' ti narampatan liminapau.

⁵Sumugut ra Ukum ri Musa, ruandu' koson ragitio bobolon ra batu suku' matoi. Kaa' atan kia pangkaraan Muno raginio?”

⁶Nangkuot ilo koson raginio sabap ra masaga' ilo mangkinam Riso, koson makapanguu' ilo boo Riso. Kaa' kuung i Jisus am tulisi' no tana' i ra kalindu' Nali.

⁷Pasakuot ilo ayuk ri Jisus, ginio ra bigor Io boo am indagu risilo, “Osoi ayuk intor ramuyun no ondo' kolondo' tula, io no magulu momobol riso ra batu.”

⁸Kuung Io boo saguli' am panulis poyo ra tana'.

⁹Kaining nilo ragu Nani, rorondo' ilo boo nangiruan ra intok i. Ondo' matutuo i siminigulu mugar, saboi sangulun ayuk boo i Jisus nabaya' ra ruandu' i, ondo' paribigor poyo ra giu' i.

¹⁰Bigor i Jisus am indagu riso, “Ati boo giali? Kolondo' kia mangukum rirun?”

¹¹Taam io, “Kolondo'.” Kon ri Jisus, “Aku pana kalo mangukum rirun. Raino, ugar no am pai' no boo pambaal ra tula.”][30]

¹²Indagu poyo i Jisus ra ulun masuang, “Aku noyo sinda ru tana' ti. Osoi ayuk maya' Raki' kalo mangkiralan ra kalandaman, kaa' mokoowot ra sinda ondo' mangani' ra kaayagan.”

¹³Ginio ra mindagu ulun-ulun ru Parisi, “Raino Okou mampaintutun ra baal Muno galama'. Kaintutunan Muno kalo motopot!”

¹⁴Taam i Jisus risilo, “Kabalu' pana mampaintutun Aku ra baal Kuno galama', ginio motopot, sabap ra nakapandai Aku ra intor Kuno am angayan Kuno, kaa' akau kalo makapandai ra intor kapoam angayan Kuno.

¹⁵Akau mangakim ra ulun sumugut ra pamaguangan ru ulun; Aku kalo mangakim ra osoi ayuk pana.

¹⁶Kaa' amon ru mangakim Aku pana ra ulun, pangakiman Kuno motopot, sabap ra pai' ru Aku sangulun ayuk mangakim; kaa' i Ama' ondo' nanusub i, mabaya' Raki'.

¹⁷Mokoondo' tinulisan ra Ukum ri Musa: Kaintutunan ru ruo ngaulun sasi' motopot.

¹⁸Mampaintutun Aku ra baal Kuno galama', am i Ama' ondo' nanusub Raki' i pana, mampaintutun niayuk Raki'.”

¹⁹Ginio ra pangkuot ilo, “Ati i Ama' Muno?” Taam i Jisus, “Kalo makaulig kau Raki', kapoam i Ama' Kuno. Amon ru makaulig kau Raki', Ama' Kuno pana mauligan min niayuk.”

²⁰Ngaangai' ti rinagu ri Jisus paat ra Io nangila' giu' ra Baloi Tuhan, maar ra kaban papataakan no. Kaa' kolondo' sangulun pana namparakop Riso, sabap ra kalo poyo nasuku' orou Nano.

²¹Indagu poyo i Jisus risilo, “Aku ti mugar am maguyum kau poyo Raki', kaa' matoi kau ayuk mabaya' ra tula mino. Akau kalo mokoongoi ra angayan Kuno.”

²²Indagu boo tingganai ru ulun ru Jaudi, “Mantuwo Io nua', ra minindagu Io, ‘Kalo mokoongoi kau ra angayan Kuno.’ ”

²³Indagu i Jisus, “Akau intor ra gana' ti, kaa' Aku intor ra rasawat. Akau ulun ayuk ru tana' ti, kaa' Aku sala' ka intor ra tana' ti.

²⁴Ginio sabap ra Aku minindagu ramuyun ra matoi kau ayuk ra tula mino. Amon ru kalo mangintopot kau ra ‘Aku noyo AKU’,[31] matoi kau ayuk mabaya' ra tula mino.”

²⁵Ginio ra kuati' nilo poyo, “Osoi Kou guat?” Taam i Jisus, “Intor poyo ra talimpuun i, nambala' Aku no ramuyun![32]

²⁶Masuang baal mino ondo' akimin Kuno. Kaa' Io ondo' nanusub Raki' i motopot, am mambala' Aku ra ulun ru tana' ti maya' ra atan ondo' morongog Kuno intor Riso.”

²⁷Kaa' kalo nakarati' ilo ra i Ama' kon ri Jisus ni.

²⁸Indagu i Jisus risilo, “Makainsawat min Anak ru Ulun no, bagu matutunan min ra ‘Aku noyo AKU’. Aku pana kalo boo makapambaal ra atan ayuk pana sumugut ra kasagaan Kuno galama', kaa' paraguon Kuno ayuk ondo' nangilaan ri Ama' Raki'.

²⁹Io ondo' nanusub Raki' i masalok mabaya' Raki'; kalo pinaluur No Aku, sabap ra masalok Aku sumugut ra kasagaan Nano.”

³⁰Kaining ayuk ru ulun-ulun no ragu raginii, masuang boo nangintopot ri Jisus.

³¹Kopongo ragili indagu boo i Jisus ra ulun ru Jaudi ondo' nangintopot Riso, “Amon ru gumagaya' kau toojo ra pangilaan Kuno, totopot akau no maamaya' Kuno.

³²Mauligan min i Aki Kapuuno' ondo' motopot am ginio mampalabus ramuyun.”[33]

³³Taam ilo, “Akai papag ri Abragam, kalo igondo' akai kasauk ra ulipon ru osoi ayuk pana! Atan kon Muno ra, ‘Palabuson kau’?”

³⁴Taam i Jisus, “Balain takamin toojo: Moonong ulun ondo' mambaal ra tula, uliponon io ru tula.

³⁵Sangulun ulipon kalo mantilayun sumoroi ra baloi ru Tuan nano, kaa' anak ru Tuan no, mantilayun io.

³⁶Ginio ra amon ru palabuson kau ru Anak, bagu no totopot kau malabus.

³⁷Makapandai Aku no ra papag kau ri Abragam. Kaa' gumogot kau niayuk mamatoi Raki', sabap ra kalo apuon min pangilaan Kuno.

³⁸Aku mambala' ra atan ayuk pinatalang Raki' ru Ama' Kuno; kaa' akau mambaal ra atan ayuk pinabala' ru ama' min ramuyun.”

³⁹Taam ilo Riso, “I Abragam noyo ama' mai.” Kaa' indagu i Jisus, “Amon ru totopot akau papag ri Abragam, maaru' baalon min[34] ondo' binaal ri Abragam i.

⁴⁰Nampasaboi Aku ramuyun ra katapatan ondo' noowot Kuno intor ri Aki Kapuuno', kaa' gumogot kau mamatoi Raki'. I Abragam kalo igondo' pambaal koson raginio!

⁴¹Akau mambaal niayuk ra atan ondo' baalon ru ama' min.” Taam ilo, “Pai' ru anak sawa' akai! Rondo' ayuk Ama' mai, i Aki Kapuuno' galama'.”

⁴²Kon ri Jisus risilo, “Amon ru totopot i Aki Kapuuno' no Ama' min, tagamin min Aku, sabap ra minatong Aku intor ri Aki Kapuuno' am raino soroi Aku. Kalo minatong Aku maya' ra kasagaan Kuno galama', kaa' sinusub No Aku.

⁴³Kua pai' kau pakarati' ra kon Kutu? Sabap ra kalo tumaan kau mangkirongog ra pangilaan Kuno.

⁴⁴Tingganai ru riwato no ama' min am maayo guang min gumagaya' ra kasagaan nano. Naintaran ra galing i, mamamatoi io ayuk am kalo igondo' giminagaya' ra katapatan, sabap ra kolondo' katapatan riso. Paat ra io magabau, maya' io ayuk ra paliso nano, sabap ra io no maabau-abau, am puun io ru ngaangai' abau.

⁴⁵Kaa' Aku mindagu ra motopot. Ginio sabap boo ra akau kalo mangintopot Raki'.

⁴⁶Osoi intor ramuyun no mampainono' ra makatula Aku? Amon ru mindagu Aku ra motopot, kua pai' kau pangintopot Raki'?

⁴⁷Osoi ayuk intor ri Aki Kapuuno', mangkirongog ra ragu Nano. Kaa' akau sala' ka intor ri Aki Kapuuno', ginio sabap boo ra akau kalo mangkirongog Riso.”

⁴⁸Taam ilo Riso, “Motopot ragu mai ra Okou ti noyo ulun ru Samaria ondo' sinubol ru riwato.”

⁴⁹Kon ri Jisus, “Sala', pai' ru sinubol Aku ru riwato. Aku mangurumat ra Ama' Kuno, kaa' akau magasab Raki'.

⁵⁰Kalo makiompor Aku, kaa' mokoondo' noyo gumogot ra Aku ti omporon, am Io noyo ondo' mangakim.

⁵¹Balain takamin toojo: Osoi ayuk gumagaya' ra pangilaan Kuno, ulun no kalo makaili' ra kapatayan.”

⁵²Indagu ilo ri Jisus, “Raino naimumuyan mai noyo toojo ra motopot sinubol Kou ru riwato! I Abragam galama' minatoi, nogondo' niayuk ra nabi-nabi, kaa' kamu; ‘Osoi ayuk gumagaya' ra pangilaan Kuno, ulun no kalo makaili' ra kapatayan.’

⁵³Kinamatuaan maili i Abragam, am ngaangai' ru nabi pana minatoi. Maatang Kou po kia ka i Abragam? Indoson Muno, osoi Kou?”

⁵⁴Taam i Jisus, “Amon ru makiompor Aku, ginio kolondo' onong. Ondo' mongompor Raki', am i Ama' Kuno. Io noyo iowon min ra i Aki Kapuuno' mino.

⁵⁵Akau kalo makaulig Riso, kaa' Aku makaulig Riso. Amon ru mindagu Aku ra kalo makaulig Riso, maabau-abau Aku koson ramuyun. Kaa' makaulig Aku niayuk Riso am gumagaya' Aku ra ragu Nano.

⁵⁶Kinamatuaan min i Abragam, naansayan ra makakito ra ratangan Kuno. Nakakito io noyo am naansukan io.”

⁵⁷Indagu ilo Riso, “Bai-bai Kono boo nakakito ri Abragam[35] am umur Muno kalo poyo limo ngoopor ngambilor.”

⁵⁸Kon ri Jisus, “Balain takamin toojo: Ra kalo poyo inanak i Abragam, ‘Soroi Aku no’.”

⁵⁹Ginio ra anam ulun-ulun ru Jaudi ra batu pomobol ri Jisus, kaa' nansibuni Io am nangiruan ra Baloi Tuhan i.