Read Timugon Murut JUANIS 9 Bible Online

JUANIS 9 - Timugon Murut bible

JUANIS 9

¹Paat ri Jisus nangkiralan, nakito No sangulun ondo' noolou intor io inanak.

²Pangkuot maamaya' Nano Riso, “Mangingila', osoi ra tula nangkinibit ra ulun ti noolou intor ra io inanak? Tula nano galama' kia kapoam matuo nano?”

³Taam i Jisus, “Ulun ti noolou sala' ka sabap ra tula nano galama' kapoam tula ru matuo nano, kaa' koson ralalom kaayagan nano paintalangon kuasa' ri Aki Kapuuno'.

⁴Buoi matawang ayuk poyo, itakau musiti' mangandoi ra atan ondo' pakandayin ru Io ondo' nanusub Raki' i. Matong molondom no am paat raginio kolondo' sangulun pana makapangandoi.

⁵Buoi Aku soroi poyo ra giti, Aku no mampakasinda ra ulun ru tana' ti.”

⁶Pakaindagu i Jisus ra ngaangai' ni, pantiwog Io ra tana' am kutowo' no tana' i. Pakupilo' No boo losok i ra mato ru ulun i.

⁷Indagu boo i Jisus riso, “Ongoi no panginjagup giu' ra kulam Siloam.” (Arati' ru Siloam no, ‘sinusub’.) Ginio ra ongoi ulun i panginjagup am ra io minuli', makakito io no.

⁸Pangkuot pasambalayan nano am niayuk ulun ondo' magail nakakito riso makikitaak, “Sala' ka kia ulun ragitio ondo' masalok manturung makikitaak?”

⁹Mokoondo' bokon minindagu, “Topot, io no.” Kaa' bokon i poyo minindagu ra, “Sala', pansalu no ayuk ulun ti.” Kaa' ulun i nangiou ra, “Aku noyo io.”

¹⁰Pangkuot ilo riso, “Ati kulaan okou makakito boo raino?”

¹¹Taam io, “Ulun ondo' inggalanin ri Jisus nangkutou ra tana', am pakupilo' No boo losok ra mato kuti am poyo minindagu Io, ‘Ongoi no panginjagup giu' ra kulam Siloam.’ Ongoi aku boo am pakapanginjagup, makakito aku boo.”

¹²Pangkuot ilo, “Ati boo ulun i?” Taam io, “Tawa.”

¹³Orou nangutawan ra tana' am namabasan ri Jisus ra ulun bolou i nakapaat ra orou Sabat. Ginio boo ibito' nilo ulun ondo' gili noolou ra ulun-ulun ru Parisi.

¹⁵Kuati' ru ulun-ulun ru Parisi ulun i, ati kulaan ra io makakito boo. Indagu io risilo, “Kinupilan mato kutu ru ulun i ra losok. Pakapanginjagup aku am makakito aku boo.”

¹⁶Mokoondo' kukula' ngaulun intor risilo i minindagu, konilo, “Ulun ondo' nambaal ragitio maaru' sala' ka intor ri Aki Kapuuno', sabap ra kalo gagayaan No aturan ru orou Sabat.” Kaa' kon poyo ru bokon i, “Sala', ati kulaan sangulun makatula makapambaal ra kaimuagan koson raginio?” Ginio boo ra nagagansang ilo.

¹⁷Pangkuot poyo ulun-ulun ru Parisi ra ulun i, “Kamu, binabas No mato muni. Koson poyo raginio, guang mu, osoi Io?” “Io ti sangulun nabi,” kon boo ru ulun i.

¹⁸Kaa' tingganai ru ulun ru Jaudi kalo nangintopot ragili noolou io am raino makakito boo, saboi piniau nilo poyo matuo nano.

¹⁹Ginio ra kuati' nilo, “Motopot kia gitio noyo anak min ondo' noolou intor io inanak? Amon ru io, ati kulaan io makakito raino?”

²⁰Taam matuo nano, “Iou, akai ra anak, am noolou io intor io inanak.

²¹Kaa' kalo nakapandai akai ati kulaan io makakito raino, kapoam osoi namabas ra mato nano. Moonsoi kuatin min ayuk io, nasukor io no; io galama' makapambala' ramuyun.”

²²Matuo nano minindagu koson raginio sabap ra nalaa' ilo ra tingganai ru ulun ru Jaudi no, sabap ra nakapaguguum ilo noyo ra osoi ayuk mangiou ra i Jisus noyo Mamamayag ondo' sinusub ri Aki Kapuuno', inggalarin ulun no mumpos ra baloi sambayangan.

²³Ginio sabap ra minindagu boo matuo nano ra, “Moonsoi kuati' min ayuk io, nasukor io no.”

²⁴Piawo' nilo poyo ulun binabas ni am konilo riso, “Pagibot no ralalom inggalan ri Aki Kapuuno' ra mindagu kou ra motopot! Nakapandai akai noyo ra ondo' namabas rirun i ulun makatula.”

²⁵Taam io, “Makatula Io kia kapoam kalo, ginio kalo makapandai aku, ondo' ayuk napandayan kuno; ra gili noolou aku, kaa' raino makakito aku boo.”

²⁶Ginio ra kuati' nilo poyo ulun i, “Atan binaal No rirun? Ati kulaan Io namabas ra mato muno?”

²⁷Kon ru ulun i, “Nakapambala' aku no ramuyun, kaa' kalo nangkirongog kau. Kua poyo pakibala' kau? Masaga' kau lair sumauk ra maamaya' Nano?”

²⁸Kaa' nangiis ilo riso, konilo, “Okou noyo maamaya' Nano, kaa' akai ti maamaya' ri Musa.

²⁹Akai nakapandai ri Aki Kapuuno' minindagu ri Musa, kaa' ulun raginio kalo nakapandai akai ra intor nano.”

³⁰Indagu boo ulun i, “Makaimuag toojo ragu min ti. Kua pai' kau pakapandai ra intor ru ulun i ondo' namabas ra mato kuti?

³¹Nakapandai takau ra kalo rongogon ri Aki Kapuuno' ulun makatula. Ondo' ayuk iowon ulun ondo' mangurumat Riso am niayuk mambaal ra kasagaan Nano.

³²Intor poyo ra tana' ti biningkal, kalo igondo' korongog ra mokoondo' sangulun makapamabas ra mato ru ulun ondo' noolou intor ra io inanak.

³³Amon ru ulun no sala' ka intor ri Aki Kapuuno', kolondo' atan-atan mabaal nano.”

³⁴Konilo riso, “Okou ti makatula noyo intor ra okou inanak ayuk poyo; am mangila' kou boo kia ramon?” Ininggalaran nilo boo io mumpos ra baloi sambayangan i.

³⁵Pakaining i Jisus raginio, tuumo' No ulun i am kuati' no, “Mangintopot kou kia ra Anak ru Ulun?”

³⁶Taam ulun i, “Tuan, balai' aku osoi Io am mangintopot aku boo Riso.”

³⁷Indagu boo i Jisus riso, “Nakakito kono Riso am Io noyo makimansunur rirun raino.”

³⁸Kon ru ulun i, “Tuhan, mangintopot aku.” Igulatur io boo ra saang ri Jisus.

³⁹Kon ri Jisus, “Aku minatong ra tana' ti mongoi pangakim, maa' raginio ulun noolou makakito am ulun makakito moolou boo.”

⁴⁰Kukula' ngaulun ru Parisi ondo' soroi ra giu' i, nakaining ra rinagu Nani. Ginio ra pangkuot ilo Riso, “Atan, akai ti bolou kia rokoon Muno?”

⁴¹Taam i Jisus, “Amon ru noolou kau, kolondo' tula min. Kaa' nakaindagu kano ra kalo noolou kau, ginio ra tula mino pana tumilayun ayuk boo.”