Read Timugon Murut RINALATAN 11 Bible Online

RINALATAN 11 - Timugon Murut bible

RINALATAN 11

¹Rasul am ngaangai' ulun nangintopot ra ati ayuk ra Judia nakaining ra ulun sala' ka Jaudi nokoowot ra bala' ri Aki Kapuuno'.

²Paat ri Pitrus minongoi ra Jirusalim, ulun-ulun ru Jaudi ondo' nangintopot ri Kristus am lakat poyo maya' ra kaulayan sunat, siminangit riso. Konilo,

³“Minongoi kou po ra baloi ru ulun sala' ka Jaudi, ioginio ondo' kalo poyo sinunatan, am giminulung kou risilo niayuk nangakan!”

⁴Ginio ra pambala' boo i Pitrus risilo intor ra talimpuun i ngaangai' atan ondo' nasauk:

⁵“Tatanga' ra aku nakiasi' ri Aki Kapuuno' giu' ra Jopi, nakito ku rondo' pagilangan. Nakito ku koson sampila' konoon mapila' ondo' nakatair ra kaapat-apat pisuk nano pinatuun intor ra limbowon ra tuma' kuli.

⁶Ilai' ku toojo suang nali; mokoondo' bibiag makaapat kalayam, bibiag masigo, bibiag mamuntana' am niayuk susuit masigo.

⁷Naining ku bolos minindagu raki', ‘Pitrus, sukal no! Panimbalui am akano'!’

⁸Kaa' taam aku, ‘Kalo, Tuhan! Kalo igondo' aku pangakan ra ondo' majamol sumugut ra kaulayan ru ugama.’

⁹Indagu boo bolos intor ra rasawat, ‘Pai' pangkara' raginio malaat amon ru iniou noyo ri Aki Kapuuno'.’

¹⁰Intalu baal koson raginio am pupus nali konoon am suang nali nakayang saguli' ra limbowon.

¹¹Paat ragili niayuk mokoondo' talu ngaulun sinusub intor ra Kaisaria timinuum raki' ra inayanan kuli.[27]

¹²Indagu Ambiluo ri Aki Kapuuno' i raki' koson maya' risilo am kalo pana maimamang. Onom ngaulun ragitio minaya' raki' mongoi ra Kaisaria am ngaangai' akai minumpos ra baloi ri Konilius i.

¹³Tunungo' boo ri Konilius ramon ati kulaan io nakakito ra sangulun malaikat minigor ra baloi nali am indagu, ‘Panusub ra ulun mongoi ra Jopi mampiau ra sangulun ungkuyon makainggalan ri Simon Pitrus.

¹⁴Mampasaboi io ra tanou ondo' makapamayag ramuyun sambaloi.’

¹⁵Paat ra aku timinalimpuun mindagu risilo, Ambiluo ri Aki Kapuuno' pana minatong risilo koson ra nasauk ritakau ragili.

¹⁶Kakara' ku boo rinagu ru Tuhan, ‘I Juanis nampariu' ramuyun ra timug, kaa' riwon kau poyo ra Ambiluo ri Aki Kapuuno'.’

¹⁷Raino, napandayan noyo ra i Aki Kapuuno' galama' mangani' noyo ra ulun sala' ka Jaudi ra atan ondo' tinaakan no ritakau paat ra itakau nangintopot ra Tuhan Jisus Kristus. Ati kulaan aku makapanginga' ri Aki Kapuuno'?”

¹⁸Pakaining ilo raginii, kalo boo siminangit ilo ri Pitrus. Kaa' pongompor ilo boo ri Aki Kapuuno', konilo, “Koson poyo raginio, i Aki Kapuuno' nangani' noyo ra kaluagan ra ulun sala' ka Jaudi tumalikur ra tula nilo am makabayag ra mantilayun.”

¹⁹Kopongo i Stipanus pinatoi, ulun ondo' nangintopot ri Jisus nakapantutuliar ra ati ayuk intok sabap ra inimbolo' ilo. Mokoondo' nagiru' ra Pinisia, Siprus am Antiokia am nampasaboi ilo ra pambalaan intor ri Aki Kapuuno' ra ulun ru Jaudi ayuk.

²⁰Kaa' mokoondo' poyo intor risilo ti ulun Siprus am Kirini, ondo' minongoi ra Antiokia am nampasaboi ra Tanou Moonsoi intor ri Jisus ra ulun sala' ka Jaudi[28] niayuk.

²¹Kuasa' ru Tuhan mabaya' risilo saboi masuang ulun nangintopot am minaya' ra Tuhan.

²²Kaala' pasimpungan ulun Kristian ra Jirusalim raginio, susubo' nilo i Barnabas minongoi ra Antiokia.

²³Paat ra io nakasaboi ra giu' i, nakakito io ra ati kulaan i Aki Kapuuno' nambarakat ra ulun ra giu' no am naansukan io. Panusub io risilo gumagaya' toojo ra Tuhan.

²⁴I Barnabas ti sangulun moonsoi, mokoondo' ra kuasa' ru Ambiluo ri Aki Kapuuno' am mangintopot toojo ra Tuhan am masuang ulun nangintopot ra Tuhan.

²⁵Ongoi boo i Barnabas paguyum ri Saulus giu' ra Tarsus.

²⁶Katuum no i Saulus, ibito' no ra Antiokia am buoi sambilor siminimpung ilo ra pasimpungan ulun Kristian ra giu' i liliwa' nangila' risilo. Giu' ra Antiokia noyo maamaya' ri Jisus kainsaa' sabiton ra ulun Kristian.

²⁷Paat ragili mokoondo' kukula' ngaulun nabi intor ra Jirusalim minongoi ra Antiokia.

²⁸Sangulun intor risilo i makainggalan ri Agabus. Bigor io am mansail ra kuasa' ru Ambiluo ri Aki Kapuuno' nanala' io ra matong rondo' bitilan maaja' ra titikop ru tana' ti. (Bitilan ragitio nasauk niayuk paat ri Kaisar Klaudius namarinta.)

²⁹Ginio ra ngaangai' maamaya' ri Jisus ra giu' i nangiou koson mangindangan ra ulun Kristian ra Judia; nangani' ilo maya' ra kamaanan ru sasangulun.

³⁰Kopongo ilo ayuk nangani' ra indanganan nilo, susubo' nilo i Barnabas am i Saulus mongoi pangator ra ruit i ra tingganai ru pasimpungan ulun Kristian ra giu' i.