Read Timugon Murut RINALATAN 14 Bible Online

RINALATAN 14 - Timugon Murut bible

RINALATAN 14

¹Giu' ra Ikonium pana nogondo' ayuk nasauk: Minongoi i Paulus am i Barnabas ra baloi sambayangan am sabap ra pambalaan nilo masuang ulun ru Jaudi am sala' ka Jaudi pana nangintopot ri Jisus.

²Kaa' ulun ru Jaudi ondo' kalo nangintopot nanusuk poyo ra ulun sala' ka Jaudi saboi nasisang ilo ra ulun ondo' nangintopot ri Jisus.

³Rasul-rasul nabuoi niayuk minayan ra giu' i am makakau' ilo boo mampasaboi ra tanou intor ra Tuhan. Nampainono' Tuhan ra pambalaan nilo intor ra togom Nano motopot ra mangani' risilo ra kuasa' mambaal ra kaimuagan am tatandu'.

⁴Kaa' mamagun ru bandar i nansasangor ra rondo' am bokon: mokoondo' santayaran ondo' minaya' ra ulun ru Jaudi am santayaran i poyo minaya' ra rasul-rasul no.

⁵Ginio ra pupus ti ulun ru Jaudi am tingganai nilai nababaya' ra ulun sala' ka Jaudi pana naguguum mangimbolo' ruo ngaulun rasul no ra bobolon ilo ra batu.

⁶Kaa' napandayan ru rasul-rasul no ra naguguuman nilai ti, pagiru' ilo boo ra pagun Likaonia, iono bandar Listra am Darbi am ra libung ondo' nakainggaar no.

⁷Giu' i nampasaboi ilo boo ra Tanou Moonsoi.

⁸Giu' ra Listra mokoondo' sangulun ungkuyon ondo' kalo makalulu' intor ra io inanak am kalo igondo' makapantana'.

⁹Io ti nanturung liliwa' nangkirongog ri Paulus. Kakito ri Paulus ra ulun ti maalap kababas sabap ra mangintopot io. Ginio ra tantangin no ulun i

¹⁰am indagu ra bolos mapuor, “Ingkakat am bigor no!” Bigor pulali' ulun ti am tumalimpuun mugar-ugar.

¹¹Paat ra ulun masuang no nakakito ondo' sinauk ri Paulus ti, golok ilo ralalom ragu ru Likaonia, konilo, “Minatong noyo dewa-dewa ra tana' ti koson nasauk ra ulun!”

¹²Ginio ra paansangayo' nilo i Barnabas ri Jius am i Paulus ri Irmis, sabap ra io no matasik mindagu. Karuruo napaansangayan ti am inggalan ru dewa nilai.

¹³Ginio nai minatong boo imam ru dewa Jius i, ondo' baloi sambayangan no giu' ra liwar ru bandar. Nagibit io poyo ra sapi' ungkuyon am niayuk kukula' ngabangkos busak ra subalan ru bandar i sabap ra io am ulun masuang masaga' mangani' ra taak simbalui ra rasul-rasul no.

¹⁴Paat ri Barnabas am i Paulus nokorongog ra kasagaan nilai, rilako' nilo bayang nilai am pasimbul ilo ra tatanga' ru ulun masuang am pompogolok,

¹⁵“Kua guat baalo' min gitio? Akai ti koson niayuk ramuyun, ulun ayuk toojo! Akai minongoi ragiti mampasaboi ra Tanou Moonsoi ramuyun koson mapainggalur ramuyun ra baal kolondo' onong ti am mapasaguli' ramuyun ri Aki Kapuuno' ondo' maayag. Io no ondo' niayuk nambaal ra limbowon, tana' ti, raat am ngaangai' suang nati.

¹⁶Galing i pinoloso ri Aki Kapuuno' ngaangai' bansa' maayag maya' ra kasagaan nilo sigagama'.

¹⁷Kaa' kalo linilianan No nangani' risilo ra tatandu' ra Io ti soroi ralalom ru binaal moonsoi Nano: Mamparatu' ra rasam intor ra limbowon am niayuk nampasalula' ra tutuu' ru tana' paat ra pangkawaan nano; mangani' Io po ra akanon am katasuan ru guang min.”

¹⁸Kaa' kabalu' pana minindagu ilo koson raginio, mamaar ilo kalo makapanginga' ra ulun manimbalui ra taak nilo risilo.

¹⁹Mokoondo' kukula' ngaulun ru Jaudi minatong intor ra Antiokia giu' ra pagun Pisidia am poyo intor ra Ikonium. Ilo ti noyo nanusuk ra ulun masuang saboi minaya' ilo ayuk risilo. Ginio ra bobolo' nilo ra batu i Paulus am ralaato' io ra liwar ru bandar i sabap ra pangkaraan nilo i Paulus ti minatoi noyo.

²⁰Kaa' paat ra ulun-ulun nangintopot ri Jisus minongoi limpu riso, sukal io am subol saguli' ra bandar i. Io suabon, ugar io mabaya' ri Barnabas am minongoi ra Darbi.

²¹Giu' ra Darbi, nampasaboi i Paulus am i Barnabas ra Tanou Moonsoi am masuang ulun nangintopot ri Jisus. Saguli' ilo boo ra Listra, am ongoi ilo boo ra Ikonium am niayuk ra Antiokia, giu' ra pagun ru Pisidia.

²²Nampaikang ilo ra ulun-ulun nangintopot am nangkimait risilo koson marayus mangintopot ri Jisus. “Masuang kapaganan matuum takau galing maa' raginio makaili' takau Pamarintaan ri Aki Kapuuno',” nangilaan nilo.

²³Inaru' i Paulus am i Barnabas ra magagalung ra moonong pasimpungan ulun Kristian. Ginio ra nakiasi' am nampali ilo, am nampataak risilo ra alungin ru Tuhan ondo' inintopot nilo.

²⁴Koongoi ri Paulus am i Barnabas ra ngaangai' intok ru giu' ra Pisidia, ongoi ilo boo ra pagun Pampilia.

²⁵Pakapampasaboi ilo ra Tanou Moonsoi ra Pirga, ongoi ilo poyo ra Atalia.

²⁶Intor ra giu' i saguli' ilo boo ra Antiokia. Bandar ragitio noyo nampataakan risilo ri Aki Kapuuno' ondo' nagalung toojo risilo buoi ra kandoi nilo nopongo.

²⁷Paat ra ilo nakasaboi ra Antiokia, timungo' nilo pasimpungan ulun Kristian am tunungo' nilo atan ondo' sinauk ri Aki Kapuuno' pinasumbaya' risilo. Tinunung nilo niayuk ra ati kulaan i Aki Kapuuno' nangukab ra ralan koson ulun ondo' sala' ka Jaudi pana mangintopot ri Jisus.

²⁸Nabuoi i Paulus am i Barnabas minayan ra giu' i, nasisimpung ra ulun-ulun ondo' nangintopot ri Jisus.