Read Timugon Murut RINALATAN 15 Bible Online

RINALATAN 15 - Timugon Murut bible

RINALATAN 15

¹Mokoondo' kukula' ngaulun Kristian intor ra Judia minatong ra Antiokia am nangila' ilo ra ulun Kristian ra, “Kalo bayagon kau ri Aki Kapuuno' amon ru kalo sunatin kau maya' ra Ukum ri Musa.”

²Kaa' minansang toojo i Paulus am i Barnabas ra pangilaan ru ulun rati. Pupus i, i Paulus, i Barnabas am poyo kukula' ngaulun Kristian intor ra Antiokia pinoongoi ra Jirusalim koson mongoi uma' ra rasul am tingganai ru Kristian ra manalasai ra kapaganan ragitio.

³Ginio ra ulun Kristian ra Antiokia nompoongoi noyo risilo ra Jirusalim. Minapit ilo poyo ra Pinisia am Samaria. Pakasuku' ilo ra giu' i, pantunung ilo ra ati kulaan ulun sala' ka Jaudi nangintopot noyo ri Aki Kapuuno'. Tanou ragitio nampakaansuk toojo ra guang ru ulun Kristian ondo' soroi ra giu' i.

⁴Pakasaboi ilo ra Jirusalim, inuma' ilo ru ulun Kristian, rasul-rasul am niayuk tingganai ru pasimpungan ulun Kristian. Ginio ra tunungo' nilo boo ngaangai' ondo' sinauk ri Aki Kapuuno' risilo.

⁵Kaa' kukula' ngaulun ru Parisi ondo' nangintopot ri Jisus minindagu ra saang ru ngaangai', konilo, “Ulun Kristian ondo' sala' ka Jaudi musiti' sunatin am poyo sumugut toojo ra ngaangai' ru Ukum ri Musa.”

⁶Ginio ra timung boo rasul am tingganai koson manalasai ra kapaganan ragitio.

⁷Nabuoi ilo toojo nagindagu, bigor boo i Pitrus am indagu, “Pabukat kau ngaangai'! Akau galama' nakapandai ra aku inaru' ri Aki Kapuuno' intor ramuyun koson mampasaboi ra Tanou Moonsoi ra ulun sala' ka Jaudi, koson ilo ti niayuk makaining ragitio am mangintopot.

⁸I Aki Kapuuno' ondo' makaintutun ra guang ru ulun, nampakito ra nangapu Io noyo risilo, ra nangani' Io risilo ra Ambiluo Nano nogondo' niayuk ra ondo' tinaakan Nano ritakau i.

⁹I Aki Kapuuno' kalo manginggi' ra osoi ayuk pana; ulun ru Jaudi kia kapoam sala' ka Jaudi. Ampunon No niayuk tula nilai sabap ra mangintopot ilo.

¹⁰Ginio ra, kua guat pangkinam kau ri Aki Kapuuno' koson mantipagon ra ulun Kristian ti ondo' kalo noyo nasugut ru kinamatuaan takali am mulu' poyo itakau galama'?

¹¹Kalo noyo lair masauk gitio! Mangintopot am bayagon takau ralalom ra asi' ru Tuhan Jisus; mogondo' niayuk risilo.”

¹²Nongkoror ayuk ngaangai' ulun ondo' timinimung ra giu' i liliwa' i Barnabas am i Paulus nantunung ra tatandu' am kaimuagan ondo' sinauk ri Aki Kapuuno' ra ulun sala' ka Jaudi mansail risilo.

¹³Kopongo ilo nantunung, indagu i Jakubus, kono, “Pabukat kau ngaangai', rongogo' min gitio!

¹⁴Raitii' ni nantunung i Simon ra intor poyo ra galing i Aki Kapuuno' nonogom ra ulun sala' ka Jaudi niayuk. Nampili' Io ra santayaran intor risilo masauk ra ulun Nano.

¹⁵Ginio norontop ra ondo' pinasaboi ru nabi-nabi sabap ra tinulisan noyo ra Buuk Kitab,

¹⁶‘Tauli no am matong Aku po saguli', kon ru Tuhan, Tirongon Ku saguli' baloi ri Daut ra nalunsai i, am toojoon Ku ondo' naaba' i. Pabigoron Ku ginio saguli',

¹⁷koson ngaangai' ulun ra bokon maguyum Raki', ulun sala' ka Jaudi niayuk ondo' piniau Kuno masauk ra ulun Kuno.

¹⁸Ginio noyo ragu ru Tuhan, ondo' pinabala' No intor ra galing i.’ ”

¹⁹Pupusi' ri Jakubus, kono, “Sumugut ra pamaguangan kuno, pai' takau pantipagon ra ulun sala' ka Jaudi ondo' raino mangintopot ri Aki Kapuuno'.

²⁰Kaa' tulisin takau ayuk ilo ra surat, koson kalo mangakan ilo ondo' majamol maya' ra kaulayan ru ugama, ioginio; akanon ondo' pinasulung ra sinungkalalaing, mangakan ra kual bibiag ondo' pinatoi sikako' kapoam mangakan ra raraa'; am niayuk minggalur intor ra baal pansasawaan.

²¹Sabap ra intor ra galing i noyo, Ukum ri Musa ti binasa' ra moonong orou Sabat giu' ra baloi sambayangan am pinabala' ra moonong pekan.”

²²Kapatasan boo ru rasul-rasul am tingganai nabaya' ra ngaangai' ulun Kristian nampili' ra ruo ngaulun intor risilo poongoyon ra Antiokia mabaya' ri Paulus am i Barnabas. Ondo' pinili' nilai ti i Silas am i Judas, ondo' sabiton ri Barsabas; karuruo ti inurumat tojojo ru ulun Kristian giu' ra Jirusalim.

²³Mokoondo' surat pinaaya' nilai ondo' suang nali koson raginio; “Pabukat kau ngaangai' ondo' sala' ka Jaudi, ondo' mayan ra Antiokia, Siria am Kilikia. Kaansayan intor ramon, rasul-rasul, tingganai am ngaangai' pasimpungan ulun Kristian ragiti.

²⁴Naala' akai noyo ra mokoondo' kukula' ngaulun intor ramon nantipagon am niayuk nampajajou ramuyun ra nangilaan nilai. Kaa' pai' ru akai nanusub risilo.

²⁵Ginio boo ra miting am nangiou akai ra kukula' ngaulun poongoyon ramuyun mabaya' ri Barnabas am i Paulus

²⁶ondo' tagamin mai. Ilo karuo ti masuang noyo kapaganan natuum nilo sabap ra i Jisus Kristus, Tuhan takau i.

²⁷I Judas am i Silas sinusub mai koson mambala' ramuyun ra atan suang ru surat ti.

²⁸Ambiluo ri Aki Kapuuno' nabaya' ramon nangiou ra kalo mantipagon akai ramuyun suai poyo gitio ayuk ondo' kalo mabaal min:

²⁹Pai' kau pangakan ra akanon ondo' pinasulung ra sinungkalalaing; pai' kau pangakan ra raraa'; pai' kau pangakan ra kual ru bibiag ondo' pinatoi ra sikako' am poyo inggalur kau noyo intor ra baal pansasawaan. Amon ru sumugut kau ra susuban raginio, moonsoi niayuk. Ginio ayuk, kaansayan ramuyun!”

³⁰Ulun-ulun sinusub no minugar am minongoi ra Antiokia. Pakasuku' ra giu' i, timungo' nilo boo ngaangai' ulun Kristian am pataako' risilo surat i.

³¹Pakabasa' ilo ra surat ragitio, naansukan ilo toojo, sabap ra surat i nampaikang ra guang nilo.

³²I Judas am i Silas, ondo' karuruo ti nabi, nampasaboi ra masuang pambalaan am nampaikang ra guang ru ulun Kristian koson makakau' ilo boo.

³³Pakaayan ilo ra giu' i ra kukula' buoi, pasimpungan ulun Kristian no pana nampasaguli' risilo ra intor nilai. [

³⁴Kaa' i Silas ti siminoroi ayuk boo ra giu' i.][36]

³⁵I Paulus am i Barnabas niayuk minayan ra Antiokia ra kukula' buoi. Nabaya' ra kukula' ngaulun ra bokon, nangila' am nampasaboi ilo ra bala' intor ra Tuhan.

³⁶Kukula' buoi boo ragili, indagu i Paulus ri Barnabas, “Ongoyo' takau poyo ilai' ulun-ulun Kristian ra ngaangai' nampasabayan takau ra bala' intor ra Tuhan i, koson mapandayan boo rumondon ilo kia mangintopot ra Tuhan.”

³⁷Masaga' raan i Barnabas magibit ri Juanis Markus,

³⁸kaa' kalo iniou io ri Paulus, sabap ra nangiruan i Markus risilo ragili giu' ra Pampilia, am kalo kinai' no kandoi nilai.

³⁹Ginio boo nangkinibit ri Paulus am i Barnabas nansangor toojo am pupus i nantuliar ilo boo: I Barnabas nagibit boo ri Markus am minongoi ilo ra pulu' Siprus.

⁴⁰Kaa' i Paulus nagibit ri Silas. Minugar ilo malupus pasimpungan ulun Kristian nampataak risilo ri Aki Kapuuno' ondo' magalung toojo risilo.

⁴¹Ongoi ilo ra Siria am Kilikia koson mampaikang ra pasimpungan ulun Kristian ra giu' no.