Read Timugon Murut RINALATAN 18 Bible Online

RINALATAN 18 - Timugon Murut bible

RINALATAN 18

¹Iruani' boo ri Paulus Atina am ongoi ra Korintus.

²Giu' i nakatuum io ra sangulun ru Jaudi makainggalan ri Akwila nabaya' ra andu' nali, i Prisila. Intor nilo am pagun Pontus kaa' minayan ilo ra bandar Roma giu' ra pagun Itali. Bagu ilo ayuk poyo minatong ra Korintus sabap ra Kaisar Klaudius napaingkual ra ngaangai' ulun ru Jaudi intor ra Roma. Ongoi i Paulus tuum risilo

³am siminimpung risilo, sabap ra nogondo' ayuk kondoyon nilo, koson mambaal ra kim.

⁴Moonong orou Sabat, minongoi i Paulus pangila' giu' ra baloi sambayangan koson mangkimait ra ulun ru Jaudi am niayuk ulun ru Junani mangintopot ri Jisus.

⁵Pakasaboi i Silas am i Timotius intor ra Makidonia, narayus i Paulus pampasaboi ra tanou ra ngaangai' ulun ru Jaudi ra i Jisus i noyo Mamamayag ondo' sinusub ri Aki Kapuuno'.

⁶Kaa' ulun-ulun minanggal riso mabaya' ra ragu malaat. Ginio ra tingkabuli' ri Paulus jamol ru bayang nali koson mansawai risilo, kono, “Akau no galama' ra sala amon ru maluus kau. Kolondo' sala kuno ramuyun. Intor raino mongoi aku ayuk pampatanou ra ulun sala' ka Jaudi.”

⁷Ginio ra iruani' no ilo am ongoi ayan ra rondo' baloi ondo' nansapapa' ra baloi sambayangan. Tatangan ra baloi ti am sangulun sala' ka Jaudi makainggalan ri Titius Justus, ondo' sumamba ri Aki Kapuuno'.

⁸Kaa' tingganai ru baloi sambayangan, io no i Krispus am ilo sambaloi, nangintopot ri Jisus. Masuang niayuk ulun Korintus ra bokon nokorongog ra pinasaboi ri Paulus am nangintopot ilo ri Jisus am riniu' ilo.

⁹Sarandaman ragili, ralalom pagilangan minindagu Tuhan ri Paulus, kono, “Pai' kalaa'! Pai' langgai' pangilaan muno,

¹⁰sabap ra mabaya' Aku rirun. Kolondo' sangulun pana mampakaruol rirun sabap ra masuang ulun Kuno ra bandar ti.”

¹¹Ginio ra ayan boo i Paulus ra Korintus buoi sambilor naintanga' am nangila' io ra bala' intor ri Aki Kapuuno' ra ulun ra giu' no.

¹²Paat ri Galio nasauk ra gabenor libung Akaya, nampapakat ulun ru Jaudi am namparakop ilo ri Paulus am ibito' io ra bisaraan.

¹³Nanguu' ilo riso, konilo, “Ulun ti nanusuk ra ulun masuang sumamba ri Aki Kapuuno', kaa' pangilaan nano kalo nogondo' ra ukum mai.”

¹⁴Taam raan i Paulus, kaa' indagu boo i Galio ra ulun ru Jaudi no, “Amon pinabala' min ti rondo' kasalaan kapoam kalaatan, rongogon ku niayuk raguon mino.

¹⁵Kaa' pansangaran min ti am intor ra ragu, inggalan am poyo ukum min ayuk galama'! Marara' aku manalasai raginio. Akau galama' niayuk musiti' manalasai raginio.”

¹⁶Pagiruo' nilo boo i Galio mingkual intor ra giu' i.

¹⁷Kaa' rokopo' nilo boo i Sostinis, tingganai ru baloi sambayangan i, am lambaa' nilo io ra saang ru intok pamisaraan i. Kaa' pinoloso ayuk ri Galio.

¹⁸Minayan i Paulus kukula' ngoorou poyo giu' ra Korintus. Iruani' no boo ulun Kristian ra giu' i am pasundoi ra Siria nabaya' ri Prisila am i Akwila. Kalo poyo minugar ilo intor ra Kingkiria, pambulut io. Binaal no gitio koson rondo' tatandu' ra nagibot io ra Tuhan.[40]

¹⁹Pakasaboi ayuk ra bandar Ipisus, tatango' boo ri Paulus i Prisila am i Akwila. Ongoi io ra baloi sambayangan am pakimansunur io ra ulun ru Jaudi ra giu' i.

²⁰Kitaako' nilo i Paulus mayan ra kukula' buoi ra giu' i, kaa' kalo iniou no.

²¹Indagu io, “Amon ru iowon aku ri Aki Kapuuno', sumaguli' aku po ra giti.” Io pana nasundoi boo intor ra Ipisus ti.

²²Pakasaboi io ra Kaisaria, ongoi io ra Jirusalim koson mangani' ra bilin kaansayan ra ulun Kristian ra giu' i. Parayus io poyo ra Antiokia.

²³Kopongo ra kukula' buoi io minayan ra Antiokia, ongoi io boo ra pamagunan Galatia am Prigia, koson mampaikang poyo ra pangintapatan ru ulun Kristian ra giu' i.

²⁴Mokoondo' poyo sangulun ru Jaudi makainggalan i Apolos. Io inanak ra bandar Aliksandria am bagu io ayuk minongoi ra Ipisus. Mapintar io toojo mindagu am niayuk makaintutun toojo ra ragu ru Buuk Kitab.

²⁵Inila' io no ra pangilaan intor ra Tuhan. Mapirot io toojo mampasaboi pangilaan ri Jisus ondo' motopot, kaa' koson ra pampariwan, pangilaan ri Juanis ayuk napandayan nali.

²⁶Makakau' io toojo mangila' ra baloi sambayangan. Paat i Prisila am i Akwila nakaining ra pangilaan nali, ibito' nilo io ra baloi nilai am pambala' riso ra motopot toojo intor ra pamayagan ri Aki Kapuuno' ralalom inggalan ri Jisus.

²⁷I Apolos pana makaguang boo mongoi ra Akaya. Ginio ra ulun Kristian ra Ipisus nanulis ra surat posoboyon ra ulun Kristian ra Akaya koson ra apuon nilo i Apolos ti. Pakasuku' ra giu' i, pangindanganan nali totopot mokoonong ra ulun Kristian, ondo' ralalom ru kataawan ri Aki Kapuuno' nangintopot ri Jisus.

²⁸Mapintar io toojo manggal ra ulun ru Jaudi ralalom pantataaman ra saang ru ulun masuang. Mampaintopot io risilo intor ra ragu ru Buuk Kitab ra i Jisus ti noyo Mamamayag ondo' sinusub i.