Read Timugon Murut RINALATAN 19 Bible Online

RINALATAN 19 - Timugon Murut bible

RINALATAN 19

¹Paat ri Apolos soroi ra Korintus, i Paulus nangkiralan mongoi ra intok nakaujok ra pagun ti am pupus i nakasuku' io ra Ipisus. Giu' i nakatuum io ra kukula' ngaulun ondo' nangintopot ri Jisus.

²Pangkuot io risilo, “Paat ra akau nangintopot ri Jisus, mokoondo' kia noowot min ra Ambiluo ri Aki Kapuuno'?” Taam ilo, “Kalo igondo' naining mai koson ra mokoondo' Ambiluo ri Aki Kapuuno'.”

³Pangkuot poyo i Paulus, “Amon ru koson poyo raginio, pampariwan ra atan kia akau riniu'?” Taam ilo, “Pampariwan ri Juanis Mampariu'.”

⁴Indagu i Paulus, “I Juanis ti nampariu' noyo ra ulun koson mambala' ra timinalikur ilo intor ra tula. Kaa' nambala' io poyo ra ulun ru Israil ra ilo ti musiti' mangintopot ra Ulun ondo' tumauli riso, io no i Jisus.”

⁵Pokorongog ilo raginio, riwo' ilo boo ralalom inggalan ru Tuhan Jisus.

⁶Pabantaa' ri Paulus kalindu' nali risilo am kinuasa' ilo ru Ambiluo ri Aki Kapuuno'. Ginio ra minindagu ilo ra ragu imuagan am nampasaboi ra pambalaan intor ri Aki Kapuuno'.

⁷Suang nilai olo'-olo' mopor am ruo ngaulun.

⁸Talu ngambulan buoi ri Paulus nampatanou ra ulun-ulun giu' ra baloi sambayangan am kalo malaa' io. Nakimansunur io risilo koson mampaintopot risilo intor ra Pamarintaan ri Aki Kapuuno'.

⁹Kaa' mokoondo' intor risilo i mokotog guang am kalo nangintopot, am nagasab ilo poyo ra pamayagan ri Aki Kapuuno' ra saang ru ulun masuang. Ginio ra i Paulus pana nangiruan risilo am ibito' no ulun ondo' nangintopot noyo ri Jisus am moonong orou[41] nangila' io risilo giu' ra intok igigilaan ri Tiranus.

¹⁰Sabuoi ruo ngambilor io nambaal raginio am ngaangai' ulun ra pagun ru Asia, io no ulun ru Jaudi am niayuk ulun sala' ka Jaudi, nokorongog niayuk ra bala' intor ra Tuhan.

¹¹Ralalom baalon ri Paulus i Aki Kapuuno' nambaal ra kukula' kaimuagan ondo' mapakabunduk toojo ra guang ru ulun masuang.

¹²Ginio ra konoon parasa' am poyo konoon ra bokon ondo' pinakai ri Paulus inibit ra ulun mangarualan. Maruol nilai pana nairu' am riwato pana pinagiru' intor risilo.

¹³Mokoondo' poyo kukula' ngaulun ru Jaudi ondo' mangkiralan ra ati ayuk intok koson mampagiru' ra riwato intor ra ulun sinubol. Ilo pana nangkinam mampagiru' ra riwato ralalom inggalan ri Jisus, konilo ra riwato, “Ralalom inggalan ri Jisus ondo' pabalaan ri Paulus no, pagiruon tokou!”

¹⁴Ondo' nampasauk raginio am tulu' ngaulun ungkuyon sangkaaka', anak ru sangulun Tingganai Maayo Imam Jaudi makainggalan ri Skiwa.

¹⁵Kaa' taam boo riwato no risilo, “Nakaulig aku ri Jisus am nakapandai aku niayuk ri Paulus, kaa' osoi guat akau ti?”

¹⁶Timinindak boo ulun sinubol ru riwato i am nambungkayut risilo ngai', saboi nangapilat am nagibabaang ilo nagiru' intor ra baloi ru ulun i.

¹⁷Ngaangai' ulun ru Jaudi am sala' ka Jaudi ondo' minayan ra Ipisus i nangalaa' paat ra ilo nokorongog ra nasauk i. Ginio ra inggalan ru Tuhan Jisus ti inompor poyo.

¹⁸Masuang ulun ondo' raino ti mangintopot ri Jisus nangiou ra saang ru ulun masuang ra kalaatan ondo' binaal nilo ragili.

¹⁹Ilo ondo' mapandai mangilong, nanimung ra buuk igigilaan nilo am solobo' ra saang ru ulun masuang. Logo ru ngaangai' buuk no mokoondo' lair limo ngoopor ngaribu ruit pirok.[42]

²⁰Kon raginio noyo ra bala' intor ra Tuhan[43] nakatabual poyo am masuang poyo boo ulun nangintopot ri Jisus.

²¹Kasauk ayuk ngaangai' raginio, makaguang i Paulus[44] mongoi ra Jirusalim mansail ra Makidonia am Akaya, kono, “Mopongo aku mongoi ra giu', musiti' aku mongoi niayuk ra Roma.”

²²Ginio ra, susubo' no ruo ngaulun mangingindangan riso, i Timotius am i Irastus, magulu mongoi ra Makidonia. Kaa' minayan io poyo ra kukula' buoi ra pagun Asia.

²³Paat ragili, kumuliangi-angi ulun giu' ra Ipisus sabap ra pangilaan intor ri Jisus ti.

²⁴Giu' ra bandar no, mokoondo' sangulun makainggalan ri Dimitrius, kandoi nano mambaal ra model kuil ru Dewi Artimis intor ra pirok. Masuang niayuk ruit moowot ru ulun mangandoi riso intor ra kandoi raginio.

²⁵Ginio ra piawo' no ngaangai' ondo' mangandoi riso i, am poyo mangngandoi ra bokon ondo' nogondo' niayuk kandoi nilai am indagu, “Pabukat kau ngaangai'! Nakapandai kano ra intor ra kandoi raginio itakau makaalap ra ruit masuang.

²⁶Raino nakito min am norongog min noyo galama' atan kia baalon ri Paulus ti. Mindagu io ra atan ayuk sinungkalalaing ondo' baalon ru ulun, ginilo sala' ka Tuhan toojo. Masuang ulun nangintopot riso, sala' ka giti ayuk ra Ipisus ti, kaa' maar makai' pagun Asia ti poyo.

²⁷Ginio kalaanin takau raino ti, sabap ra maaru' kondoyon takau kalaatin ru ulun. Sala' ka ginio ayuk, kaa' kuil Artimis niayuk kalo boo urumaton ru ulun am katulayan nano lumiot — kabalu' pana sambaan io ru ngaangai' ulun giti ra Asia am ngaangai' pagun ru tana' ti!”

²⁸Korongog nilo ragu ri Dimitrius i, siminangit am golok ilo, “Katulai noyo i Artimis, dewi ru ulun Ipisus!”

²⁹Kumuliangi-angi boo ulun ra ngaangai' ru bandar i. Ulun masuang namparakop niayuk ri Gayus am i Aristarkus, karuruo ti ulun Makidonia ondo' namparangan ri Paulus ralalom pangkiralanan nali. Ralaato' ilo boo ra stadium ru bandar i.

³⁰Masaga' i Paulus sumunu' risilo, kaa' ulun Kristian nanginga' riso.

³¹Kukula' ngaulun tingganai ru pagun Asia no pana, ondo' rangan ri Paulus i, nambilin riso koson kalo mongoi ra stadium no.

³²Kumuliangi-angi ulun ondo' timinimung ra stadium i. Mokoondo' giminolok koson ragitio am mokoondo' poyo bokon giminolok koson raginio, sabap ra kasuangan ru ulun ra giu' i kalo nakapandai ra kua guat tumimung ilo.

³³Mokoondo' nangkara' ri Aliksandir ti namuun raginio, sabap ra io ti ondo' jinuulan ru ulun ru Jaudi ra saang ru ulun masuang. Ginio ra nangani' i Aliksandir ra ulun-ulun no ra pulanu maa' raginio mongkoror, am masaga' io mambala' risilo atan masauk.

³⁴Kaa' pakapandai ilo ra io ti ulun ru Jaudi, pagagampan ilo nompogolok saboi ruo nganjam, konilo, “Katulai noyo i Artimis, dewi ru ulun Ipisus!”

³⁵Pupus i sangulun tingganai ru bandar i nakapampalinos risilo. Indagu io, “Rongogo' min, ulun-ulun ru Ipisus! Ngaangai' ulun nakapandai ra bandar Ipisus ti ondo' magalung ra kuil ru Dewi Artimis ondo' maayo, am niayuk batu matulai ondo' naratu' intor ra limbowon.

³⁶Kolondo' sangulun pana makaanggal raginio. Sabap raginio pongkoror kau ayuk am pai' kau jajajou.

³⁷Inibit min poyo ulun-ulun ragitio ragiti, kabalu' pana ra kalo nantakou ilo intor ra kuil mino kapoam nagasab ri Artimis, dewi takau.

³⁸Amon ru mokoondo' poyo panguwan ri Dimitrius am ulun mangngandoi riso no ra sasangulun, moonsoi salasayon nilo ayuk ra makama. Paat ra orou inaru' no moonsoi mongoi ilo ra makama am ginio salasayon ru akim ra giu' no.

³⁹Kaa' amon ru mokoondo' kau poyo kitaakon ra bokon, moonsoi salasayon ginio ra saang ru tingganai mamagun ondo' inaru' noyo.

⁴⁰Sabap ra atan ondo' nasauk ra orou raiti', itakau niayuk mauwan ra kumuliangi-angi. Kolondo' sasaban ru ginio polosoon takau.”

⁴¹Pakaindagu raginio, pinauli' no ulun-ulun no.