Read Timugon Murut RINALATAN 2 Bible Online

RINALATAN 2 - Timugon Murut bible

RINALATAN 2

¹Paat nasuku' orou Pentekosta,[5] rondo' pangiantakan maayo ru ugama Jaudi, ngaangai' ulun ondo' mangintopot ri Kristus timinimung ra rondo' intok.

²Sangkinolor ragili morongog bolos intor ra rasawat koson ra bagiu' mapuor, am baloi ondo' nanturungan ru ulun-ulun no pana natikop ru bolos i.

³Kakito nilo boo simbula' ru apui koson ra rila' mugar-ugar am minorop ra rasawat ru ulu nilai sigagama'.

⁴Ilo ngaangai' kinuasa' ru Ambiluo ri Aki Kapuuno'. Tumalimpuun ilo mindagu ralalom nansalinut ragu ra bokon maya' ra atan ondo' tinaakan ru Ambiluo ri Aki Kapuuno' no risilo.

⁵Paat ragili masuang ulun ru Jaudi intor ra nansusuai pagun ru tana' ti minongoi ra Jirusalim. Ilo ti am ulun ondo' sumamba ri Aki Kapuuno'.

⁶Pakaining ra bolos raginio, masuang ulun nantitimung boo ra giu' i. Ilo ngaangai' nakatigog mangining ra maamaya' ri Kristus mindagu ra ragu nilai sigagama'.

⁷Nabaya' ra sioro' am imuag indagu ilo, “Sala ka kia ondo' pasaragu ti ulun Galilia?

⁸Ati kulaan maining takati ilo makaindagu ra ragu intor ra pagun takano sigagama'?

⁹Itakau ulun intor ra Partia, Midia am Ilam; am intor poyo ra Misopotamia, Judia am Kapadokia; am ondo' intor ra Pontus am pagun Asia,

¹⁰am intor poyo ra Prigia am Pampilia, intor ra pagun ru Misir am intor ra libung ru Libia ondo' mamaar ra bandar Kirini. Mokoondo' ulun takau minatong intor ra Roma,

¹¹iou pana ulun ru Jaudi am niayuk ulun bansa' ra bokon ondo' siminubol noyo ra ugama Jaudi; am poyo mokoondo' minatong intor ra pulu' Krita am pagun Arab. Itakau ngaangai' makaining risilo mindagu ra ragu takau sigagama' intor ra baal kaimuagan ondo' sinauk ri Aki Kapuuno'!”

¹²Nabaya' ra imuag am liang pasakuot ilo ra rondo' am bokon, “Atan kia arati' ragitio?”

¹³Kaa' mokoondo' niayuk magasab ra maamaya' ri Kristus, konilo, “Ulun-ulun raginio nangagauk ayuk!”

¹⁴Bigor boo i Pitrus nababaya' ra mopor am rondo' rasul ra bokon am indagu io ra ulun masuang ra bolos mosongou, kono, “Pabukat kau ngaangai', ulun ru Israil am ngaangai' ondo' mayan ra Jirusalim! Rongogo' toojo atan ondo' pabalaan kuno ramuyun.

¹⁵Ulun-ulun ragitio kalo nagauk koson ra pangkaraan min, sabap ra raino jam kasiam ayuk poyo ra susuab.

¹⁶Kaa' baal ragitio pinabala' noyo ri Aki Kapuuno' mansail ra nabi Joil:

¹⁷Kon ri Aki Kapuuno', ‘Paat ra orou pupus pataakon Ku Ambiluo Kuno ra ngaangai' ulun. Ginio ra anak ungkuyon am ruandu' mino mampasaboi ra bala' intor Raki'; Tuu'-bagu mino makakito ra baal ondo' pakitonon Kuno risilo, am matutuo mino maginupi ra baal ondo' paintalangon Kuno risilo.

¹⁸Atan poyo, osoi ayuk ulipon Kuno, ungkuyon kapoam ruandu' pana, pataakon Ku risilo Ambiluo Kuno paat ra orou raginio. Mampasaboi ilo ra bala' intor Raki'.

¹⁹Mampakito aku ra kukula' kaimuagan giu' ra limbowon, am niayuk tatandu' ra tana' ti Mokoondo' raraa', apui am binuun ru lisun.

²⁰Mato ru orou lumondom, bulan lumia' koson ra raraa', ra kalo poyo Orou ru Tuhan, orou ondo' maayo am maatang toojo no rumatong.

²¹Paat raginio, osoi ayuk makiindangan ra Tuhan, bayagon io.’

²²“Pabukat kau ngaangai' ulun ru Israil, rongogo' min ragu kuti: I Jisus ulun ru Nasarit i sinusub ri Aki Kapuuno'. Ginio pinakito ramuyun ralalom kaimuagan am tatandu' ondo' binaal ri Aki Kapuuno' ralalom ru Inggalan Nano. Akau ngaangai' makatutun noyo raginio, sabap ra ginio nasauk noyo ra tatanga' min.

²³Sumugut ra nangaruan ri Aki Kapuuno', nakapandai Io noyo intor poyo ra galing i koson i Jisus ti pataakon ramuyun. Pinatoi min Io ra nangkinibit kau ra ulun makatula no nanalip Riso.

²⁴Kaa' binayag Io saguli' ri Aki Kapuuno' intor ra kapatayan. Pinalabus Io ri Aki Kapuuno' intor ra kaimbalaan ru kapatayan, sabap ra kalo lair maaput Io ru kapatayan.

²⁵Naragu noyo ru raja' Daut intor ri Jisus ti, kono, ‘Masalok aku makakito Rirun Tuhan ra saang kuno, sumumbaya' Kou raki' saboi kolondo' mantipagon raki'.

²⁶Ginio ra aku makaansuk am ragu kuno ra mongongompor; kabalu' pana aku ulun ayuk, kaa' malansan aku ayuk Rirun,

²⁷sabap ra Okou kalo mangiruan raki' ralalom intok ru ulun namagatoi.[6] Kalo mompoloso Kou ra inan ru ulipon Muno ondo' gumagaya' Rirun no mapasa'.

²⁸Okou nanulu' raki' ra ralan ondo' mongoi ra kaayagan motopot. Naansukan aku kaga' sabap ra Okou no mabaya' raki'.’

²⁹“Pabukat ku ngaangai', raino balain takamin toojo ondo' nasauk ra raja' Daut i, sangulun kinamatuaan takali. Minatoi io am nolobong noyo, am saboi raino lobong nano pana lakat ayuk poyo soroi ra tatanga' takau.

³⁰I Aki Kapuuno' nambantu' noyo ri Daut nabaya' ra ibot ra sangulun intor ra papag ri Daut saukon ra raja' koson ri Daut galama'. Nakapandai i Daut raginio sabap ra io sangulun nabi niayuk,

³¹am nakapandai io ondo' saukon ri Aki Kapuuno' ra tauli no. Ginio ra nambala' io intor ra Mamamayag ondo' sinusub ri Aki Kapuuno' i, ra bayagon Io saguli' intor ra kapatayan. Kon ri Daut, ‘Kalo iruanin Io ralalom ru intok ulun namagatoi; inan Nano kalo mapasa' ra lobong.’

³²I Jisus ti noyo ondo' binayag saguli' ri Aki Kapuuno' intor ra kapatayan. Akai ngaangai' sasi' ra baal raginio.

³³Kinayang Io mongoi ra intok makakuasa' ra tampilon pamiris ri Aki Kapuuno' am niayuk nakaapu ra Ambiluo ri Aki Kapuuno' ondo' binantu' ri Ama'. Ondo' makito am morongog min raino ti am Ambiluo no ondo' pinataak ri Jisus ramon.

³⁴Sala' ka i Daut ondo' nagaloi ra suruga', kaa' io galama' minindagu ra, ‘Tuhan minindagu ra Tuhan kuno: Panturung ra tampilon pamiris Kutu,

³⁵saboi baalon Ku pantula' Muno tuminduku' Rirun.’

³⁶“Ginio ra ngaangai' ulun ru Israil musiti' makapandai ra i Jisus ondo' sinalip mini, Io noyo ondo' sinauk ri Aki Kapuuno' ra Tuhan am Mamamayag!”

³⁷Pakaining ulun-ulun no ra ragu ri Pitrus ni, napasilak guang nilai. Pangkuot ilo boo ri Pitrus am rasul ra bokon no, “Pabukat kau, raino atan kia maaru' baalon mai?”

³⁸Taam i Pitrus, “Talikur kau ngai' intor ra tula mino. Musiti' akau riwon ralalom inggalan ri Jisus Kristus, koson ra tula mino ampunon. Akau pana makaapu ra taak intor ri Aki Kapuuno', ioginio Ambiluo ri Aki Kapuuno'.

³⁹Ginio binantu' ri Aki Kapuuno' ramuyun am papag mino poyo, am niayuk ra ngaangai' ulun ondo' mangaalur intok — ioginio osoi ayuk piawon ri Aki Kapuuno', Tuhan takau, koson matong Riso.”

⁴⁰Ginio noyo ragu ri Pitrus nambala' toojo risilo. Masuang poyo ragu nano ra bokon manusub risilo koson magibayag intor ra pangukuman ri Aki Kapuuno' ondo' paratuon ra ulun mangalaat ra pagun ti.

⁴¹Masuang ulun nangintopot ra rinagu ri Pitrus, am ilo pana riniu'. Suang ru ulun nangintopot ri Kristus paat ra orou raginio riminuang poyo ra talu ngaribu ngaulun.

⁴²Mapirot toojo ilo migigila' intor ra rasul-rasul. Nakipabukat ilo ra rondo' am bokon, magugulung mangakan am mababaya' makiasi' ri Aki Kapuuno'.

⁴³Masuang toojo kaimuagan am tatandu' ondo' binaal ru rasul-rasul saboi ngaangai' ulun nangimuag am nalaa'.

⁴⁴Ngaangai' maamaya' ri Kristus masalok tumimung am nagagapu ilo ra kuliamos nilo.

⁴⁵Mokoondo' intor risilo mantalan ra rapu' nilai, am ruit i tinayar-tayar ra popolos nilo maya' ra pakuan ru sasangulun.

⁴⁶Ginio ra moonong orou tumimung ilo ra Baloi Tuhan, am mabaya' ra bansuk am guang minggana' masalok ilo magugulung mangakan giu' ra baloi nilai.

⁴⁷Mongongompor ilo ri Aki Kapuuno' am kaansayin ilo ru ngaangai' ulun. Moonong orou ruangin ru Tuhan suang nilo ra ulun ondo' bayagon ri Aki Kapuuno'.