Read Timugon Murut RINALATAN 22 Bible Online

RINALATAN 22 - Timugon Murut bible

RINALATAN 22

¹“Pabukat kau ngaangai'! Rongogo' min aku! Masaga' aku mapaintutun ramuyun ra sala' ka malaat aku.”

²Pokorongog ilo ra i Paulus minindagu ra ragu Ibrani, nongkokoror ilo. Tungguli' poyo ri Paulus ragu nali:

³“Ulun aku toojo ru Jaudi. Intor aku ra bandar Tarsus ra pagun Kilikia, kaa' giti ayuk ra Jirusalim ti nasukaran kuno am minigigila' aku ri Gamalil. Inila' aku toojo ra Ukum ri Musa ru kinamatuaan takau am patimpokon ku kaayagan kuno ri Aki Kapuuno' nogondo' ra akau ngaangai' ra orou raiti'.

⁴Nangimbolo' aku noyo ra ulun-ulun ondo' minaya' ra pangilaan bagu ti saboi mokoondo' minatoi. Mokoondo' niayuk ungkuyon am ruandu' intor risilo ti ondo' rinakop kuli am pinasubol ra lamin pangaputan.

⁵Tingganai Maayo Imam Jaudi am niayuk ngaangai' tingganai ru Majlis Ugama, makapangani' ra sasi' ra kalo magabau aku. Ilo no ondo' nangani' raki' ra surat kuasa' patuluon ra ulun ru Jaudi ra Damsyik, ioginio mangiou raki' mamparakop ra ulun ru Jaudi ondo' nangintopot ri Jisus koson ibiton ra Jirusalim ra ukumin.”

⁶“Paat ra nangkiralanan ku ragili am maar makasaboi ra Damsyik i ra io tanga' ru orou, pulusat ru silau ondo' mapaang kaga' intor ra limbowon liminiput raki'.

⁷Ginio ra laub aku ak boo ra tana' am nokorongog aku rondo' bolos minindagu raki', ‘Saulus, Saulus! Kua kia imboloo' mu Aku?’

⁸Nangkuot aku ra bolos i, ‘Osoi kou, Tuhan?’ Taam ru bolos no, ‘Aku ti i Jisus, ulun ru Nasarit ondo' imboloon mu.’

⁹Ulun-ulun ondo' minaya' raki' nakakito ra silau i, kaa' kalo nokorongog ilo ra bolos ondo' minindagu raki'.

¹⁰Pangkuot aku po, ‘Atan kia musiti' ku baalon, Tuhan?’ Taam boo Tuhan, ‘Sukal no am ongoi ra Damsyik. Giu' no bagu tokou balain ra ngaangai' ondo' inaru' noyo ri Aki Kapuuno' rirun.’

¹¹Paat ragili niayuk noolou aku sabap ra mapaang kaga' silau i. Ginio ra rangan-rangan kuno ayuk nangitang raki' mongoi ra Damsyik.

¹²Giu' i mokoondo' sangulun makainggalan ri Ananias. Io sangulun ondo' sumamba ri Aki Kapuuno' am sumugut niayuk ra Ukum ri Musa takau. Io niayuk kauligan ra sangulun moonsoi toojo ru ulun ru Jaudi ondo' minayan ra Damsyik.

¹³Minongoi io pagilong raki', bigor io ra sapapa' kuli am indagu, ‘Saulus pabukat kuno, pakakito no saguli'!’ Paat ragili niayuk nakakito aku saguli' am nagilong aku riso.

¹⁴Kono raki', ‘I Aki Kapuuno' ondo' sambaan ru kinamatuaan takau nampili' noyo rirun maa' raginio makapandai ra kasagaan Nano, makakito toojo ra Ulipon no ondo' masalok gumagaya' Riso am mokorongog ra bolos ri Jisus galama'.

¹⁵Ginio ra okou noyo masauk ra sasi' ra ngaangai' ulun ra atan ondo' nakito am niayuk norongog muli.

¹⁶Raino, pai' no boo paginaa. Kaa' sukal am pakiriu' kou no. Pakiasi' no ra Tuhan maa' raginio palabuson kou intor ra ngaangai' tula muno.’ ”

¹⁷“Pakasaguli' aku poyo ra Jirusalim am nakiasi' giu' ra Baloi Tuhan, nakakito aku ra pagilangan,

¹⁸ioginio, nakakito aku ra Tuhan am minindagu Io raki', ragu Nano, ‘Ribaki', iruani' Jirusalim ti ra mataki', sabap ra ulun ragiti kalo mangapu ra kaintutunan muno intor Raki'.’

¹⁹Kaa, taam aku, ‘Tuhan, nakatutun ilo ra aku noyo ondo' minongoi ra ati ayuk baloi sambayangan am namparakop am napalamba' ra ulun ondo' mangintopot Rirun.

²⁰Koson niayuk ra bulintok pinatayan ru sasi' Muli i Stipanus, aku galama' nangiou ra io pinatoi am aku poyo nantamung ra bayang ru ulun ondo' namatoi riso.’

²¹Kaa' indagu poyo Tuhan i raki', ‘Ugar no, sabap ra Aku noyo mopoongoi rirun ra intok maalur, mongoi ra ulun ondo' sala' ka Jaudi.’ ”

²²Ulun-ulun no lakat ayuk poyo nangkirongog ra atan rinagu ri Paulus, kaa' ondo' rinagu no ra pupus ti boo, golok ilo, “Potoyo' io! Kalo maaya' io maayag!”

²³Liliwa' nompogolok, tingkabuli' nilo bayang am niayuk pasiabo' nilo kaau ru tana'.

²⁴Ginio ra subol tingganai maayo ru saujor Roma i am nanusub io ra ibiton i Paulus ra kim ru saujor am palapasin io toojo koson mapandayan kua galaki' i Paulus ru ulun ru Jaudi.

²⁵Kaa' paat ri Paulus nabangkil koson loposon, indagu io ra tingganai ru saujor ondo' minigor ra giu' i, “Pai' poyo, sumugut ra ukum min, malapos mu kia ulun ru Roma, kabalu' pana ra io ti kalo poyo nabisara'?”

²⁶Korongog ayuk ru tingganai i ginio, parayus io ongoi uma' ra tingganai maayo i am pambala' io, “Atan kia baalon takau raino? Ulun ti warganegara Roma!”

²⁷Ginio ra ongoi boo tingganai maayo no tuum ri Paulus am pangkuot io, “Pambala' no, totopot kia okou ti warganegara Roma?” “Motopot,” kon ri Paulus.

²⁸Kaa' indagu poyo tingganai maayo ru saujor no, “Mologo toojo pinambayar kuno mangalap ra warganegara Roma.” Kaa' taam i Paulus, “Kaa' aku intor noyo ra aku inanak ayuk poyo.”

²⁹Paat ragili niayuk saujor-saujor ondo' masaga' mampalapos am mangkuot riso liminugut. Tingganai maayo ru saujor i niayuk nalaa', sabap ra namangkil io no ri Paulus ondo' sotopot no warganegara Roma.

³⁰Tingganai maayo ru saujor Roma no masaga' toojo mintutun ra kua ulun ru Jaudi manguu' ri Paulus. Ginio ra iosuabon, piawo' no tingganai-tingganai imam Jaudi am niayuk ngaangai' ulun ru Majlis Ugama i timinimung. Ginio ra bugalo' nilo pinamangkil ri Paulus i am ibito' io boo paumaa' risilo.