Read Timugon Murut RINALATAN 25 Bible Online

RINALATAN 25 - Timugon Murut bible

RINALATAN 25

¹Nataluan noyo i gabenor Pistus nakasaboi ra Kaisaria, ugar io ongoi ra Jirusalim.

²Giu' i, tingganai imam Jaudi am tingganai ru ulun ru Jaudi nambala' riso ra panguwan nilai ri Paulus. Kitaakon nilo toojo ri Pistus

³ra i Paulus ibiton ra Jirusalim sabap ra mokoondo' noyo naguguuman nilai koson mamatoi ri Paulus ralalom pangkiralanan.

⁴Kaa' taam i Pistus, “Giu' ra Kaisaria ayuk nangaputan ri Paulus, am aku galama' pana kalo mabuoi sumaguli' poyo ra giu'.

⁵Ginio ra, moonsoi tingganai min ti mabaya' raki' mongoi ra Kaisaria am manguu' riso ra giu' i, amon ru mokoondo' io ra sala.”

⁶Soroi i Pistus olo'-olo' balu' kapoam mopor ngoorou poyo ra Jirusalim am saguli' io boo ra Kaisaria. Iosuabon no, panturung io ra makama koson mangakim am i Paulus sinusub porotongo'.

⁷Paat ri Paulus minatong, ulun ru Jaudi ondo' intor ra Jirusalim minongoi limpu riso am tumalimpuun manguu' riso ra maagat. Kaa' panguwan nilo ngaangai' kolondo' sasi'.

⁸Nagisaung i Paulus, “Kolondo' rondo' pana sala kutu ra Ukum ri Musa, ra Baloi Tuhan kapoam ra Kaisar Roma.”

⁹Kaa' masaga' i Pistus mampagamis ra guang ru ulun ru Jaudi. Ginio ra kuati' no boo i Paulus, kono, “Masaga' kou kia poongoyon ra Jirusalim koson giu' ayuk pamisaraan kuno rirun?”

¹⁰Taam i Paulus, “Gitio noyo Makama Kaisar Roma. Giti ayuk pana pamisaraan raki'. Okou galama' niayuk nakapandai ra kolondo' sala kuno ra ulun ru Jaudi.

¹¹Amon ru inanggal ku ukum am nambaal ra kalaatan ondo' maukum ra potoyon, polosoon ayuk aku potoyon. Kaa' amon ru panguwan nilai no kalo motopot, kolondo' sangulun pana makakuasa' mampataak raki' risilo. Kitaakon ku ra aku bisaraan ru Kaisar Roma galama'!”

¹²Kopongo i Pistus nansusunur ra mangingindangan ru Makama, indagu io, “Kinitaak mu noyo ra bisaraan ru Kaisar Roma, sabap raginio paatarin tokou toojo paumaan riso.”

¹³Kalo nabuoi ragili, raja' Agripa am i Birniki minongoi panguma' ri Pistus ra Kaisaria.

¹⁴Kukula' ngoorou buoi nilo ra giu' i, pambala' boo toojo i Pistus ra raja' Agripa ondo' nasauk ri Paulus i. Indagu i Pistus, kono, “Giti mokoondo' sangulun ondo' tinatang ayuk ri Piliks ra pangaputan.

¹⁵Paat ra aku giu' ra Jirusalim, tingganai imam Jaudi am tingganai ru ulun ru Jaudi nanguu' ra ulun no am nakitaak raki' ra ukumin io.

¹⁶Kaa' taamo' ku ilo ra kalo maindalom ulun ru Roma mompoloso ayuk ra sasangulun ukumin ra io kalo poyo mabisara' ra saang ru ulun ondo' nanguu' riso, am aniin poyo ra kaluagan magisaung.

¹⁷Pakaratong ilo ayuk ragiti, kalo naginaa aku mabuoi, kaa' suabon ragili niayuk panimung aku ra makama am panusub ra ulun no paumaan.

¹⁸Paat ra ulun nambala' ra panguwan nilai, kolondo' rondo' pana kalaatan nakasalula' nilo ra maukum io.

¹⁹Kaa' atan ondo' nagansangan nilai ti iono kinibit ayuk ru ugama nilo galama' am niayuk sangulun ungkuyon makainggalan i Jisus, ondo' minatoi noyo, kaa' karaan ri Paulus ra naayag io kunu'.

²⁰Sabap ra kalo noyo makapanalasai aku raginio, kuati' ku i Paulus amon ru masaga' io mongoi ra Jirusalim, koson giu' ayuk bisaraan.

²¹Kaa' makialung toojo i Paulus am makibisara' ayuk ru Kaisar Roma. Ginio boo ra susubo' ku io aputon saboi mokoondo' aku ra kaluagan mangator riso ra Kaisar.”

²²Indagu i Agripa ri Pistus, “Aku galama' pana masaga' mangkirongog ra ulun no.” Taam i Pistus, “Susuab mokorongog kou niayuk riso.”

²³Suabon ragili, i Agripa am Birniki siminubol ra Makama mabaya' ra tingganai maayo ru saujor am poyo ulun maatang ru bandar no, maya' ra kaulayan ru raja'. Panusub boo i Pistus ra nampaumpos ri Paulus.

²⁴Indagu i Pistus, “Raja' Agripa am niayuk ngaangai' ondo' siminimpung ti! Inuwan ulun ti ru ulun ru Jaudi, giu' ra Jirusalim am ragiti niayuk. Gumolok ilo ra ulun ti kalo noyo maaya' maayag.

²⁵Kaa' kolondo' natuum kuno ra atan ayuk kasalaan nano ra io maalap kaukum ra potoyon. Io galama' nangitaak makibisara' io ri Kaisar, ginio ra pootoron ku io ra Kaisar.

²⁶Kaa' kalo makapandai aku ra atan kia musiti' ku tulisin intor riso ra surat posoboyon kuno ra Kaisar. Ginio nai ra pinatuum ku io ramuyun am mulu' poyo okou, raja' Agripa. Binaal ku koson raginio ra mopongo io maimumuyan mu, bagu makapanulis aku ra surat.

²⁷Sabap ra pangkaraan kuno, kalo moonsoi pootoron ku sangulun inaput amon ru kalo mabalaan toojo panguwan no.”