Read Timugon Murut RINALATAN 28 Bible Online

RINALATAN 28 - Timugon Murut bible

RINALATAN 28

¹Pakaasak akai ngaangai', bagu napandayan mai intok raginio pulu' Malta.

²Mamagun ra intok ti mongoonsoi ngaangai' ramon. Nangkimait ilo ramon makararang ra apui, sabap ra timinalimpuun noyo rumasam am angin niayuk sumoyob masimu'.

³Nakiluton i Paulus am nampaang ra apui. Ingkual boo sanginan kukuo intor ra apui i sabap ra malasu' kaga' am paninduk boo ra longon ri Paulus.

⁴Pakakito namagun ra pulu' no ra kukuo i nakatayung ayuk ra kalindu' ri Paulus, pansusunur ilo ra rondo' am bokon, “Maaru' ulun ti sangulun mamamatoi, sabap ra kabalu' pana binayag io noyo intor ra raat, kaa' kalo lair polosoon io maayag ru Dewi Katimpakan.”

⁵Kaa' tagago' boo ri Paulus kukuo i ralalom ru apui am kolondo' nalimanan no ra atan ayuk ruol.

⁶Pangkaraan nilai maaru' longon ri Paulus lumanit kapoam matoi io pamuaga'. Nabuoi ilo niayuk naginaa, kaa' kolondo' nasauk riso koson ra pangkaraan nilai. Ginio ra nakulau boo pangkaraan nilai am indagu ilo ra, “Io ti maaru' dewa.”

⁷Kalo maalur intor ra giu' i, mokoondo' intok ru gabenor ru pulu' i, makainggalan i Pabilus. Io nanguma' ramon ra guang moonsoi, saboi nataluan io tinambului mai ra baloi no.

⁸Paat ragili niayuk ama' ri Pabilus luluya' marualan, sabap ra natiu' ra salom am makatai' ra raraa'. Ginio ra subol i Paulus ra lamin nano, pakiasi' io, pabantaa' no boo kalindu' nali riso am kababas io boo.

⁹Ginio boo ngaangai' ulun ondo' marualan giu' ra pulu' i minongoi uma' ri Paulus am ilo ti pana binabas niayuk.

¹⁰Nangani' ilo ra masuang tangguang ramon. Paat ra akai masaga' masundoi, ibiti' nilo akai ra kapal ra atan ayuk kuliamos ru pangkiralanan mai.

¹¹Talu ngambulan buoi mai ra giu' i, am iruani' mai pulu' i am sakoi ra rondo' kapal ondo' minapit ra pulu' ti buoi ru bulintok masimu'. Kapal raginio intor ra Aliksandria am giu' ra saang no mokoondo' ruo tuhan sinungkalalaing ondo' ininggalanan niayuk ra “Dewa Magapir”.

¹²Apit akai ra bandar Sirakusa, saboi nataluan akai ra giu' i.

¹³Intor ra giu', pasundoi akai po ra bandar Rigium. Io suabon ragili, tumalimpuun magangin intor ra rabugus. Buoi naruaan nakasuku' akai boo ra bandar Putioli.

¹⁴Giu' no niayuk nakatuum akai ra kukula' ngaulun Kristian. Nangkimait ilo ramon mayan risilo am saminggu' akai ra giu' i. Kopongo ragili, narayus akai boo ra Roma maya' ra lantur.

¹⁵Kaa' ulun Kristian ra Roma nakaining noyo ra tanou intor ramon am minongoi ilo uma' ramon giu' ra ruo pekan ondo' ininggalanan ra Apius am Talu Ngaintok Apitan. Pakauma' i Paulus risilo, naringkuanang io ri Aki Kapuuno' am guang nali pana pinaikang boo.

¹⁶Pakasaboi ra Roma, i Paulus iniou mayan sangulun ra rondo' baloi, kaa' alungin io niayuk ru sangulun saujor.

¹⁷Pakasail nataluan, timungo' ri Paulus tingganai-tingganai ru ulun ru Jaudi. Pakatimung ilo, pambala' boo i Paulus, kono, “Pabukat kau ngaangai'! Kolondo' sala kuno ra bansa' takau galama', kapoam kalo minanggal aku ra kaulayan ru kinamatuaan takali. Kabalu' pana koson raginio, rinakop aku niayuk giu' ra Jirusalim am pinataak aku ra ulun ru Roma.

¹⁸Kaimumuyi' nilo toojo aku, makaguang ilo mampalabus raki', sabap ra kolondo' noyo kalaatan binaal kuno ra makapangukum ilo raki' ra potoyon.

¹⁹Kaa' minanggal ulun ru Jaudi ragitio, ginio ra nakibisara' aku boo ra Kaisar Roma, kabalu' pana kolondo' panguwan kuno ra bansa' kuno galama'.

²⁰Ginio sabap ra nakiuma' am nakimansunur aku ramuyun. Binangkil aku sabap ra Io ondo' kalansanan ru bansa' ru Israil.”

²¹Kaa' indagu ilo riso, “Kolondo' surat naapu mai intor ra Judia nambala' koson rirun. Kolondo' sangulun pana minatong intor ra giu' i nagibit ra pambalaan kapoam tanou ra kalaatan muli.

²²Kaa' akai pana masaga' mangkirongog ra pangkaraan muno. Sabap ra akai ngaangai' nakaining noyo ra pangilaan ondo' binayaan muno anggalon ra ati ayuk intok.”

²³Ginio ra aruo' nilo rondo' orou pangumaan am masuang ulun minatong ra inayanan ri Paulus. Intor ra iosusuab saboi mamai', nampaintutun toojo i Paulus risilo ra Pamarintaan ri Aki Kapuuno'. Mapirot i Paulus mampaintopot risilo ra ondo' tinulisan ralalom Ukum ri Musa am niayuk Kitab ru Nabi-Nabi bala' niayuk intor ri Jisus.

²⁴Mokoondo' intor risilo nangintopot ra atan rinagu ri Paulus i, kaa' mokoondo' niayuk kalo nangintopot riso.

²⁵Nantutuliar am nansasangor ilo boo ra rondo' am bokon intor ra rinagu ri Paulus ragitio, kono, “Motopot toojo rinagu ru Ambiluo ri Aki Kapuuno' ra kinamatuaan mini ondo' pinabala' galing ra Nabi Jisaya, kon Nano;

²⁶‘Ongoi no pambala' ra bansa' ragitio: Mangining kau ayuk, kaa' kalo maratian min; Monontong kau ayuk, kaa' kalo makito min.

²⁷Mokotog toojo guang ru bansa' ragitio, sinilong nilo talingo nilai, am sinilian nilo mato nilai. Sabap ra amon ru kalo, makito nilo tupo, am morongog nilo niayuk, am guang nilo pana matanda', am sumaguli' ilo boo Raki', am babason Ku ilo, kon ri Aki Kapuuno'.’ ”

²⁸Pupus no indagu boo i Paulus, “Balain takamin: Raino ti pambalaan ru pamayagan intor ri Aki Kapuuno' pinabala' noyo ra bansa' ondo' sala' ka Jaudi. Ilo ti masaga' mangkirongog.” [

²⁹Pakaindagu i Paulus raginii, iruani' ru ulun ru Jaudi intok i am nantataam ilo boo rondo' am bokon.][56]

³⁰Buoi ruo ngambilor i Paulus minayan ra Roma, giu' ra baloi siniwaan nali. Masaga' io mangapu ra ngaangai' ulun ondo' minongoi uma' riso i.

³¹Nangila' io risilo ra tanou intor ri Jisus Kristus am Pamarintaan ri Aki Kapuuno'. Kalo nalaa' io am kolondo' niayuk nongompong riso.