Read Timugon Murut RINALATAN 3 Bible Online

RINALATAN 3 - Timugon Murut bible

RINALATAN 3

¹Paat ra sangarawan i Pitrus am i Juanis minongoi ra Baloi Tuhan paat ra jam katalu ra mamai', ginio nakaintuma' ra pakiasian mamai'.

²Giu' ra tuma' ru Baloi Tuhan, mamaar ra subalan ondo' sabiton ra ‘Kulobon Garabang Moonsoi’, mokoondo' sangulun ungkuyon ondo' kalo makalulu' intor ra io inanak. Moonong orou io ibiton ra giu' no koson makitaak ra ulun ondo' sumubol ra Baloi Tuhan.

³Pakakito io ra i Pitrus am i Juanis sumubol ra Baloi Tuhan, pakitaak io risilo.

⁴Tantangi' nilo io, indagu boo i Pitrus riso, kono, “Ponontong ramon!”

⁵Ponontong io risilo ra malansan mokoondo' taakin nilo riso.

⁶Kaa' indagu i Pitrus riso, “Kolondo' ruit kutu. Kaa' atan ondo' mokoondo' raki' ti, ginio pataakin kuno rirun: ra kuasa' ru Tuhan Jisus Kristus, ulun Nasarit, igugar no!”

⁷Guuto' boo ri Pitrus kalindu' pamiris ru ulun kalo makalulu' no am indangano' no io migor. Namulali' maikang boo kalayam am buntingol ru ulun i.

⁸Ginio ra ingkakat io boo, bigor am mugar-ugar io boo. Subol io ra Baloi Tuhan nabaya' ri Pitrus am i Juanis, liliwa' io minugar pagitindak am pongongompor io ri Aki Kapuuno'.

⁹Ngaangai' ulun nakakito riso minugar am mongongompor ri Aki Kapuuno'.

¹⁰Kauligi' nilo ra io no makikitaak ondo' masalok manturung giu' ra ‘Kulobon Garabang Moonsoi’ ra Baloi Tuhan i, mangimuag ilo toojo am nakasioro' nakakito ra atan ondo' nasauk riso i.

¹¹Ulun no siminunu' ri Pitrus am i Juanis. Pakasuku' ilo ra liliut ondo' sabiton ra ‘Langgar Salomo’, ngaangai' ulun nasisimbul am limpu risilo sabap ra nakasioro' ilo.

¹²Pakakito i Pitrus ra ulun ra masuang no, indagu io risilo, “Pabukat kau ngaangai' ulun ru Israil, kua pangimuag kau ragitio? Kua urioo' min akai? Guang min kia ra ulun ti makaugar sabap ra makakuasa' akai, kapoam mampagagaya' akai toojo ri Aki Kapuuno'?

¹³I Aki Kapuuno' ondo' sambaan ri Abragam, Isak am Jakub, am kinamatuaan takali, nampatulai noyo ra Ulipon Nano, i Jisus. I Jisus noyo ondo' pinataak min ra kuasa' ru parinta min, am kalo inapu min Io paat Io inibit ra saang ri Pilatus, kabalu' pana i Pilatus makaguang mampalabus Riso.

¹⁴I Jisus noyo matulai am moonsoi, kaa' kalo inapu min Io, am kinitaak min i Pilatus nampalabus ra sangulun mamamatoi.

¹⁵Akau namatoi Riso, Io ondo' manaak ra kaayagan motopot ra ngaangai' ulun. Kaa' binayag Io saguli' ri Aki Kapuuno' intor ra kapatayan am akai noyo sasi' ra baal raginio.

¹⁶Ra kuasa' ri Jisus[7] ulun kalo makalulu' ti pinaligag. Atan ondo' makito am matainuan min nasauk sabap ra nangintopot io ri Jisus am kuasa' Nano. Sabap ra ulun ti nangintopot ri Jisus, nababas io, koson ra nakito min galama'.

¹⁷“Pabukat kau ngaangai'! Raino nakapandai aku ra atan ondo' binaal min am tingganai mino ri Jisus i, ginio binaal min sabap ra kalo nakarati' kau.

¹⁸Ra galing i pinabala' galing ra ngaangai' nabi, nambala' i Aki Kapuuno' ra Mamamayag ondo' sinusub Nano[8] musiti' maimbolo', am ginio nasauk koson ra kasagaan Nano.

¹⁹Ginio nai ra, talikur kano intor ra tula mino am saguli' kano ri Aki Kapuuno', maa' raginio pusoon No ngaangai' tula mino.

²⁰Amon ru tumalikur kau, makaliman kau ngaangai' ra panalimbaguan ru guang. Susubon ru Tuhan i Jisus matong ramuyun, sabap ra Io inaru' noyo masauk ra Mamamayag min.

²¹Io musiti' mayan ra limbowon saboi talimbaguin ri Aki Kapuuno' ngaangai' no, koson ra rinagu ri Aki Kapuuno' ondo' pinabala' galing ra nabi-nabi matulai Nano paat ra galing i.

²²Nakaindagu i Musa, ‘Tuhan, i Aki Kapuuno' mino manusub sangulun nabi intor ra bansa' mino, koson ra Io nanusub raki'.[9] Akau musiti' mangkirongog ra ngaangai' ondo' raguon no ramuyun.

²³Osoi ayuk kalo gumagaya' ra raguon ru nabi no, ulun no suayon intor ra ulun ri Aki Kapuuno' am pusoon.’

²⁴Ngaangai' nabi ondo' nakapampasaboi noyo ra bala' intor ri Aki Kapuuno', tumalimpuun intor ra nabi Samuil am suku' ra nabi ra bokon ondo' minatong ra tauli i, ngaangai' i nambala' ra baal ondo' masauk ra raino ti.

²⁵Bantu' intor ri Aki Kapuuno' ondo' pinasaboi ru nabi pataakin niayuk ramuyun. Ralalom bantu' ri Aki Kapuuno' ondo' binaal no ra kinamatuaan mini, ragu Nano ri Abragam, ‘Intor ra papag muno barakaton Ku ngaangai' bansa' ru tana' ti.’ Bantu' raginio pinataak niayuk ramuyun.

²⁶Ginio sabap ri Aki Kapuuno' nampili' am nanusub ra Ulipon Nano matong ramuyun galing koson mambarakat Io no ramuyun. Binaal No ginio koson akau ngaangai' tumalikur intor kiralan ru bayag min ra malaat.”