Read Timugon Murut RINALATAN 4 Bible Online

RINALATAN 4 - Timugon Murut bible

RINALATAN 4

¹Liliwa' i Pitrus am i Juanis lakat ayuk poyo makimansunur ra ulun masuang, ratong boo imam Jaudi,[10] tingganai ru magagalung ra Baloi Tuhan am niayuk ulun-ulun ru Saduki.

²Siminangit ilo ri Pitrus am i Juanis ra ilo nambala' ra ulun masuang ra i Jisus binayag saguli' intor ra kapatayan. Ginio mampainono' ra ulun matoi bayagon saguli'.

³Rokopo' nilo boo ruo ngaulun rasul i am pasubolo' ra lamin pangaputan. Sabap ra molondom noyo, pinoloso ilo ra giu' i saboi ra suabon.

⁴Kaa' masuang ulun ondo' nokorongog ra pambalaan ru rasul-rasul nangintopot ri Jisus. Suang nilo riminuang saboi olo'-olo' limo ngaribu ngaulun.

⁵Suabon no, tingganai imam Jaudi, tingganai ru ulun ru Jaudi am mangingila' ra Ukum ri Musa timinimung ra Jirusalim.

⁶Naguguma' ilo ra Tingganai Maayo Imam Jaudi, i Anas am i Kayapas, i Juanis am i Aliksandir, am ngaangai' pabukat ru Tingganai Maayo Imam Jaudi no.

⁷I Pitrus am i Juanis pinauma' risilo am kuati', “Ati kulaan akau nakapamabas ra ulun kalo makalulu' no? Atan kia ra kuasa' kapoam osoi kia ra kuasa' naalap min mambaal raginio?”

⁸I Pitrus kinuasa' ru Ambiluo ri Aki Kapuuno' ra io timinaam risilo, kono, “Akau ngai' tingganai ulun ru Jaudi am tuu' lair-tuu' lair!

⁹Bisaraan min akai orou raiti' sabap ra nangindangan akai ra ulun kalo makalulu' no, am poyo ra moogot kau makapandai ati kulaan ulun no binabas.

¹⁰Akau tingganai am niayuk ngaangai' ulun ru Israil ra bokon musiti' makapandai ra ulun ti ondo' migor ra saang min nababas sabap ra kuasa'[11] ri Jisus Kristus, ulun ru Nasarit. Sinalip min Io, kaa' binayag Io saguli' ri Aki Kapuuno' intor ra kapatayan.

¹¹I Jisus noyo kon ru ragu ti ra Buuk Kitab, ‘Batu ondo' inimpayan ru ulun manambaloi, — ioginio akau galama' — nasauk ra batu maatang kaga'.’

¹²Ralalom inggalan ri Jisus ulun bayagon, sabap ra giti ra tana' ti kolondo' ulun ra bokon makaalap ra kuasa' intor ri Aki Kapuuno' koson mamayag ritakau.”

¹³Ulun ru Majlis Ugama nangimuag magilong ra kinabaani ri Pitrus am i Juanis, am poyo katutuni' nilo karuo rasul ti sala' ka ulun maatang am kolondo' sikul. Katutuni' nilo boo ruo ngaulun rasul ti rangan toojo ri Jisus.

¹⁴Kaa' kalo boo nakapaguta' ilo, sabap ra nakito nilo ulun ra nababas no bigor ra giu' no nabaya' ri Pitrus am i Juanis.

¹⁵Susubo' nilo ruo ngaulun rasul no miningkual ra lamin Majlis Ugama no, am pansusunur ilo boo.

¹⁶Pasakuot ilo, “Atan kia musiti' takau baalon ra ruo ngaulun ni? Ngaangai' mamagun ra Jirusalim nakapandai noyo ra ilo nambaal ra kaimuagan i. Baal raginio kalo maali' takau.

¹⁷Kaa' koson baal raginio kalo makatabual poyo ra ulun masuang, moonsoi lolobon takau ilo ruo no koson kalo boo mampatanou ra osoi ayuk pana ralalom inggalan ri Jisus.”

¹⁸Piawo' nilo boo ruo ngaulun rasul i sumubol saguli' am inggalari' ilo ra kalo boo pasabitin inggalan ri Jisus kapoam makapangila' ralalom inggalan Nano.

¹⁹Kaa' taam i Pitrus am i Juanis, “Guango' min galama' atan motopot ra pagilangan ri Aki Kapuuno': Gumagaya' ramuyun kia kapoam gumagaya' ri Aki Kapuuno'?

²⁰Sabap ra kalo malanggaan mai mindagu ra atan nakito am norongog mai galama'.”

²¹Lolobo' poyo ru ulun ru Majlis Ugama i Pitrus am i Juanis, am palabuso' nilo boo karuo-ruo no. Kalo nakatuum ilo ra sasaban koson mangukum risilo, sabap ra ngaangai' ulun nongongompor ri Aki Kapuuno' sabap ra ondo' nasauk i.

²²Ulun ondo' nababas ra kaimuagan i nasailan noyo apat ngoopor ngambilor.

²³Pakalabus ayuk i Pitrus am i Juanis, saguli' ilo ra rangan nilai am tunungo' boo ngaangai' ondo' rinagu ru tingganai imam Jaudi am tingganai ru ulun ru Jaudi.

²⁴Kaining nilo ginio, pakiasi' ilo ra rondo' guang ri Aki Kapuuno', konilo, “Tuhan, Okou no nambaal ra limbowon, tana' am raat nabaya' ra suang nano.

²⁵Ralalom ru Ambiluo Muno,[12] minindagu Kou ra kinamatuaan maili, i Daut ulipon Muno, Kamu, ‘Kua ulun sala' ka Jaudi sumangit? Kua bansa' ra bokon no mangatang ra kolondo' onong?

²⁶Raja' ru tana' rati nakatampos noyo mongoi ra pangayawan, am mangunguasa' no nakatimung noyo gumula' ra Tuhan am Mamamayag ondo' sinusub ri Aki Kapuuno'.’

²⁷Motopot ra raja' Irodis am i Pontius Pilatus naguma' ra ulun sala' ka Jaudi am poyo ulun ru Israil giti ra bandar ti, koson manggal ri Jisus Ulipon Muno ra matulai, ondo' sinauk Mu ra Mamamayag.

²⁸Ilo rondo' guang nambaal ra ngaangai' ondo' inaru' Muno kalalair masauk. Inaru' Muno koson raginio maya' ra kuasa' am kasagaan Muno.

²⁹Raino Tuhan, ilai' ati kulaan akai lolobon nilo. Anii' akai, ulipon-ulipon Muti, ra kakawan mampabala' ra tanou Muno.

³⁰Paintalango' noyo kuasa' Muno koson ra ulun marualan mababas. Gama' ru kaimuagan am tatandu' ra bokon masauk ralalom ru kuasa'[13] ri Jisus, Ulipon Muno ra matulai.”

³¹Kopongo ilo makiasi', intok tinimungan nilai nauyog. Kinuasa' ilo ngaangai' ru Ambiluo ri Aki Kapuuno', am tumalimpuun ilo mampabala' ra tanou intor ri Aki Kapuuno' ra kalo malaa'.

³²Ngaangai' maamaya' ri Jisus toojo rondo' guang. Kolondo' sangulun pana intor risilo nangkara' am nangangku ra kuliamos nano galama', kaa' nagagapu ilo ra kuliamos.

³³Ra kuasa' maayo, rasul-rasul no nangani' ra kaintutunan ra Tuhan Jisus binayag noyo saguli'. Ginio boo ri Aki Kapuuno' nambarakat toojo risilo.

³⁴Ngaangai' ilo maukop ra atan-atan. Sabap ra osoi ayuk makatana' kapoam baloi, talanon nilo rapu' raginio am ampos ru ginio pataakin nilo ra rasul-rasul.

³⁵Ruit no boo tatayaron ra moonong ulun ondo' makapakuan.

³⁶Koson niayuk ri Jusup. Io ti am sangulun papag ru Liwi am inanak Io giu' ra pulu' Siprus. Sabiton io ru rasul ri Barnabas (arati' nano ‘Mampapirot ra guang’).

³⁷Nantalan io ra tana' nano am pataako' no boo ruit i ra rasul-rasul.