Read Timugon Murut RINALATAN 5 Bible Online

RINALATAN 5 - Timugon Murut bible

RINALATAN 5

¹Mokoondo' sangulun ungkuyon makainggalan ri Ananias am andu' no i Sapira. Nantalan ilo ra sampila' tana' nilai.

²Santayaran ru ruit no pinauli' no galama' am santayaran no poyo pinataak no ra rasul-rasul. Andu' nali pana nangiou ra binaal nali.

³Indagu i Pitrus riso, “Ananias, kua polosoo' mu Tingganai ru riwato mangkinibit rirun magabau ra Ambiluo ri Aki Kapuuno', ra inalap mu santayaran ra ruit ru tana' tinalan muli?

⁴Tana' i okou tatangan ra kalo poyo natalan. Katalan mu raiti, ruit i pana lakat ayuk poyo okou tatangan. Kua kasaga' kou mambaal raginio? Sala' ka ulun inabawan muni, kaa' i Aki Kapuuno'!”

⁵Pakaining ayuk i Ananias ra ragu ni, kaaba' io am patoi. Ngaangai' ulun ondo' nokorongog ra baal no nangalaa'.

⁶Ratong boo kukula' ngaulun tuu'-bagu nangulumput ra baangkai ri Ananias, paingkualo' nilo am ongoyo' lobongo'.

⁷Pakatalu nganjam raiti, umpos andu' ri Ananias, kaa' kalo nakapandai io ra atan ondo' nasauk ni.

⁸Pangkuot boo i Pitrus riso, “Pambala', gitio ayuk kia logo ru tana' ra tinalan mini?” “Iou, ginio ayuk,” kono.

⁹Indagu i Pitrus riso, “Kua pampakat kau mansawo nangkinam ra Ambiluo ru Tuhan? Ilai'! Ulun ondo' nompolobong ra ralaki muli nakasaguli' noyo. Okou po paingkualon nilo.”

¹⁰Paat ragili niayuk i Sapira naaba' am patoi ra saang ri Pitrus. Umpos kukula' ngaulun tuu'-bagu am kakito nilo ra minatoi io no. Paingkualo' nilo boo baangkai i am pagumbiro' lobongo' ra ralaki nali.

¹¹Ngaangai' ulun mangintopot am ulun ra bokon nangalaa' toojo nakaining ra baal raginio.

¹²Masuang kaimuagan am tatandu' sinauk ru rasul-rasul ra gino ngai' ru ulun masuang. Ngaangai' maamaya' ri Jisus masalok tumimung ra Langgar Salomo.[14]

¹³Ilo ondo' kalo poyo mangintopot ri Jisus kalo makakau' lumatok ra maamaya' ri Jisus no, kabalu' pana urumaton ilo toojo ru ulun masuang.

¹⁴Ginio ra buoi-kabuoi rumuang poyo ulun mangintopot ra Tuhan, ungkuyon am ruandu'.

¹⁵Sabap ra kaimuagan ondo' binaal ru rasul-rasul no, ulun mangarualan palanganon ra tilam kapoam apin, am ibiton ilo boo ra ralan koson malansan makatiu' ra babara' ri Pitrus, paat ra io mansail ra giu' i.

¹⁶Ratong boo masuang ulun intor ra pekan mamaar ra Jirusalim. Inibit nilo ulun mangarualan am ondo' sinubol ru riwato, am ngaangai' ilo binabas.

¹⁷Tingganai Maayo Imam Jaudi am ngaangai' maamaya' nano, ondo' niayuk ulun ru Saduki, tumalimpuun gumuor sabap ra mangusolon ilo kaga' ra rasul-rasul.

¹⁸Rokopo' nilo rasul-rasul no am pasubolo' ra lamin pangaputan ru bandar.

¹⁹Kaa' rondom ragili, sangulun malaikat ru Tuhan nangukab ra kulobon-kulobon ru lamin pangaputan no, am ibito' no rasul-rasul no miningkual. Indagu malaikat no risilo, kono,

²⁰“Ongoi kau ra Baloi Tuhan no am potonowo' min noyo ra ulun masuang no intor ra kaayagan bagu ti.”

²¹Rasul-rasul no giminagaya' ra bilin ru malaikat i. Riminondom ilo minongoi ra Baloi Tuhan no am timinalimpuun ilo mangila'. Tingganai Maayo Imam Jaudi am maamaya' nano nampiau ra ngaangai' tingganai ru ulun ru Jaudi matong ra miting ru Majlis Ugama. Panusub ilo boo koson ibiton rasul-rasul no intor ra lamin pangaputan paumaan risilo.

²²Kaa' pakasuku' ulun sinusub ra lamin pangaputan i, ilai' nilo kalio boo rasul-rasul ra giu' i. Saguli' ilo am pambala' ra Majlis Ugama, konilo,

²³“Pakasuku' akai ra lamin pangaputan i, ilai' mai kulobon no nakaput toojo, am soroi magagalung ra liwar ru kulobon i. Kaa' paat ra ukabo' mai kulobon i, kolondo' sangulun pana natuum mai ra giu' i.”

²⁴Pakaining tingganai magagalung ra Baloi Tuhan am tingganai imam Jaudi ra ragu raginio, naliangan ilo ra atan kinua' nasauk ra rasul-rasul no.

²⁵Umpos boo sangulun ungkuyon pambala' risilo, kono, “Ulun-ulun ra inaput mini soroi ra Baloi Tuhan raino, am mangila' ilo ra ulun masuang!”

²⁶Tingganai magagalung ra Baloi Tuhan mabaya' ra magagalung ra bokon no minongoi pamparakop saguli' ra rasul-rasul no. Kaa' kalo jinajalan nilo rasul-rasul no sabap ra malaa' ilo ra bobolon ru ulun masuang ra batu.

²⁷Ibito' nilo rasul-rasul no paumaan ra Majlis Ugama. Indagu Tingganai Maayo Imam Jaudi no, kono,

²⁸“Linolob takamin noyo ra pai' kau pangila' ra pangilaan ru ulun ragili. Kaa' ilai' boo binaal min! Nampatabual kau ra pangilaan min ra titikop ru Jirusalim ti, am nanguu' kau poyo ra akai no nangkinibit ra pinatayan ru ulun i.”

²⁹I Pitrus am rasul ra bokon no timinaam, “Akai musiti' gumagaya' ri Aki Kapuuno' am sala' ka ulun.

³⁰I Jisus ondo' pinatoi min salipo' i, binayag noyo saguli' intor ra kapatayan ri Aki Kapuuno', ondo' sambaan ru kinamatuaan takali.

³¹Pinainsawat Io ri Aki Kapuuno' ra tampilon pamiris Nano, ioginio intok makakuasa', koson masauk ra Tingganai am Mamamayag, maa' raginio bansa' ru Israil ti makatalikur intor ra tula nilo am maampun ilo.

³²Akai no sasi' ra ngaangai' raginio — akai am Ambiluo ri Aki Kapuuno' niayuk, ondo' pataakon ri Aki Kapuuno' ra ulun ondo' gumagaya' Riso.”

³³Pakaining ulun-ulun ru Majlis Ugama ra ragu ni, siminangit ilo toojo saboi masaga' ilo ra rasul-rasul no ukumin ra potoyon.

³⁴Kaa' ralalom Majlis Ugama no mokoondo' sangulun ru Parisi makainggalan ri Gamalil. Io sangulun mangingila' ra Ukum ri Musa ondo' urumaton toojo ru ngaangai' ulun. Bigor io am panusub ra rasul-rasul no paingkualon sangkinolor.

³⁵Indagu io boo ra Majlis Ugama no, “Pabukat ku ulun ru Israil, karaa' min toojo atan baalon min ra ulun-ulun raginio.

³⁶Ragili mokoondo' sangulun inggalanin ri Tiudas ondo' migiangku ra io tingganai maatang. Mokoondo' olo'-olo' apat ngaatus ngaulun minaya' riso, kaa' pinatoi io am ngaangai' maamaya' nali nantutuliar, am kandoi nali pana napuso.

³⁷Kopongo raginio, paat ra panguntaban ra ulun, mokoondo' poyo sangulun, io no i Judas intor ra Galilia. Nangkinibit io ra masuang ulun minaya' riso. Kaa' io niayuk pinatoi am ngaangai' maamaya' nali nantutuliar boo.

³⁸Sabap raginio, pinsonon takamin ra pai' kau pambaal ra atan-atan ra ulun-ulun no. Paugaron ilo ayuk, sabap ra amon ru atangon am atan ondo' baalon nilono intor ra ulun ayuk, maaru' mapuso ra tauli no.

³⁹Kaa' amon ru ondo' baalon nilono intor ri Aki Kapuuno', kalo maala min ilo. Ati lair i Aki Kapuuno' galama' anggalon min.” Pinson ri Gamalil iniou ru Majlis Ugama.

⁴⁰Piawo' nilo saguli' rasul-rasul no, am palapasi' boo am inggalari' ilo manabit ra inggalan ri Jisus. Kopongo ragili pinalabus ilo.

⁴¹Naansukan rasul-rasul no ra ilo miningkual ra Majlis Ugama, sabap ra ilo ti kinara' noyo ri Aki Kapuuno' maaya' imboloon sabap ra inggalan ri Jisus.

⁴²Moonong orou, giu' ra Baloi Tuhan kapoam baloi ru ulun niayuk, kalo linanggaan nilo mangila' am mampabala' ra Tanou Moonsoi, ra i Jisus noyo Mamamayag ondo' sinusub ri Aki Kapuuno'.