Read Timugon Murut RINALATAN 8 Bible Online

RINALATAN 8 - Timugon Murut bible

RINALATAN 8

¹I Saulus niayuk nangiou ra namatayan ri Stipanus. Orou ragili niayuk pasimpungan ulun Kristian ra Jirusalim inimbolo' ra maaja'. Ngaangai' ulun nangintopot nantutuliar pagiru' ra Judia am niayuk Samaria, kaa' rasul-rasul ayuk kalo.

²Mokoondo' kukula' ngaulun ondo' sumugut toojo ri Aki Kapuuno' nompolobong ra baangkai ri Stipanus, am tangii' nilo boo io.

³Kaa' i Saulus mangkinam mamuso risilo. Ginio ra mongoi io ra baloi nilai am ralaaton no ulun-ulun nangintopot am pasubolon no ilo ra lamin pangaputan.

⁴Ulun-ulun nangintopot ondo' nantutuliar minongoi ra ati ayuk intok am nampasaboi ilo ra Tanou Moonsoi ra ati ayuk kasukuan nilo.

⁵I Pilipus niayuk minongoi ra pekan maatang ra Samaria[19] am pampatanou ra ulun ondo' minayan ra giu' i ra i Jisus no Mamamayag ondo' sinusub ri Aki Kapuuno'.

⁶Paat ra ulun-ulun no nokorongog ra rinagu ri Pilipus am nakakito ra kaimuagan binaal no, nampaguang ilo toojo raginio.

⁷Sabap ra masuang riwato ondo' siminubol ra ulun miningkual intor risilo liliwa' gogolok am masuang niayuk ulun kalo makalulu' am kimpo' nababas.

⁸Ginio ra nakaansuk tojojo ulun ru bandar Samaria i.

⁹Giu' no mokoondo' niayuk sangulun ungkuyon makainggalan ri Simon. Nabuoi noyo io nambaal ra ulun Samaria mangaliangan koson magilong ra baal kaimuagan nali. Io rokoon sangulun mapandai mangingilong,

¹⁰am ngaangai' ondo' minayan ra bandar i pana siminugut riso. Konilo, “Io ti makakuasa' intor ri Aki Kapuuno' ondo' kauligan ra ‘Kuasa' Maayo’ no.”

¹¹Ginio ra rongogon nilo io, sabap ra nabuoi noyo kapandayan nali namunduk ra guang nilai.

¹²Kaa' nangintopot ilo ra bala' ri Pilipus, ioginio Tanou Moonsoi intor ra Pamarintaan ri Aki Kapuuno' am i Jisus Kristus, am riniu' ilo, ungkuyon am niayuk ruandu'.

¹³I Simon galama' pana nangintopot ra Tanou raginio. Kariu' io raiti am baya' io ayuk boo ri Pilipus, am nangimuag io nakakito ra tatandu' am kaimuagan ondo' binaal ri Pilipus.

¹⁴Kaining boo rasul-rasul ru Jirusalim ra ulun Samaria nangapu ra Tanou Moonsoi, susubo' nilo boo i Pitrus am i Juanis minongoi ra giu' i.

¹⁵Pakasaboi ilo ayuk ra giu' i, nakiasi' ilo koson ra ulun nangintopot no makaalap ra Ambiluo ri Aki Kapuuno'.

¹⁶Sabap ra kolondo' ra sangulun intor risilo i nokoowot raginio. Ilo ti riniu' ayuk poyo ralalom inggalan ri Jisus.

¹⁷Ginio ra pabantaa' boo ri Pitrus am i Juanis kalindu' nilai ra ulun-ulun no, am ilo pana nokoowot ra Ambiluo ri Aki Kapuuno'.

¹⁸I Simon nakakito ra Ambiluo ri Aki Kapuuno' pinataakan ra ulun paat ra rasul-rasul napabanta' ra kalindu' nilai ra ulun i. Ginio boo ra pagibit io ra ruit ri Pitrus am i Juanis,

¹⁹am indagu, “Pataako' raki' niayuk kuasa' raginii, maa' raginio amon ru pabantaan ku kalindu' kutu ra osoi ayuk pana, ulun no mokoowot ra Ambiluo ri Aki Kapuuno'.”

²⁰Kaa' taam i Pitrus, “Mausung kou mabaya' ra ruit muno, sabap ra indoson muno kia ra maalap mu kabali taak ri Aki Kapuuno'!

²¹Kolondo' tayar muno ralalom kandoi mai, sabap ra guang muno kalo motopot ra pagilangan ri Aki Kapuuno'.

²²Talikur kono ayuk ra paliso malaat muno, am pakiasi' no ra Tuhan maa' raginio pangkaraan muno ra malaat no ampunon No!

²³Sabap ra nakapandai aku ra guang muno mapanu' ra solon am lakat kou ayuk poyo kinuasa' ru tula.”

²⁴Indagu i Simon ri Pitrus am i Juanis, “Indangano' min aku makiasi' ri Aki Kapuuno' koson kalo matiu' aku ra atan ayuk ondo' rinagu min ra raitii' ni.”

²⁵Kopongo ilo nangani' ra sasi' am nampatanou ra bala' ru Tuhan, i Pitrus am i Juanis siminaguli' ra Jirusalim. Ralalom pangkiralanan nilai nampasaboi ilo ra Tanou Moonsoi ti ra ati ayuk pekan ru ulun ru Samaria.

²⁶Mokoondo' rondo' malaikat ru Tuhan minindagu ri Pilipus, “Tampos no am ongoi ra tampilon ra rabugus,[20] giu' ra ralan Jirusalim ondo' mongoi ra Gaja.” (Ralan i kalo boo bayain.)[21]

²⁷Ginio ra tampos boo i Pilipus am ugar io. Giu' ra tanga' ru ralan i mokoondo' sangulun pagawai Itiopia ondo' mangkiralan muli' ra pagun nali. Io ti pagawai ondo' magalung ra ngaangai' rapu' ri Kandaki, raja' ruandu' ru pagun Itiopia. Pagawai i minongoi sambayang giu' ra Jirusalim ra sumamba ri Aki Kapuuno', am raino mangkiralan muli'. Nanturung io ra sinakayan nali liliwa' mambasa' ra kitab Nabi Jisaya.

²⁹Indagu Ambiluo ri Aki Kapuuno' no ri Pilipus, “Inggaari' sinakayan nano.”

³⁰Pasimbul i Pilipus am inggaari' no sinakayan i am korongog no ulun no nambasa' ra kitab Nabi Jisaya. Pangkuot i Pilipus riso, “Mangarati' kou kia ra binasa' muno?”

³¹Taam ulun no, “Ati kulaan aku mangarati' amon ru kolondo' ulun mapaintutun raki'?” Kimaiti' no boo i Pilipus siminakoi, am pagumbir ilo nanturung.

³²Gitio noyo ondo' binasa' nali, ioginio: “Koson Io ra domba ondo' potoyon; koson ra anak domba mongkoror paat ra lamparin ra bulu; koson niayuk Riso, kalo minindagu Io.

³³Tinauyu' Io am inakim Io ra kalo motopot. Bayag Nano napuso ra tana' ti, saboi kolondo' sangulun pana makapantunung ra papag Nano.”

³⁴Indagu pagawai no ri Pilipus, “Balai' aku, osoi kia kon ru nabi i? Io kia galama' kapoam ulun ru bokon?”

³⁵Intor ra tinulisan ru nabi raginio pambala' i Pilipus ra Tanou Moonsoi ri Jisus.

³⁶Paat ra ilo nanunggul ra pangkiralanan nilai, pakasuku' ilo ra intok makatimug. Indagu pagawai no, “Ilai', giti makatimug. Atan poyo manginga' raki' ra aku riwon?” [

³⁷Indagu i Pilipus, “Mariu' tokou amon ru mangintopot kou toojo.” Taam io, “Mangintopot aku ra i Jisus Kristus i noyo Anak ri Aki Kapuuno'.”][22]

³⁸Panusub boo pagawai no mampauog ra sinakayan nano. Pakauog ayuk tuun ilo karuo, am tapung ra timug am riwo' io boo ri Pilipus.

³⁹Pakaasak ilo, ibito' i Pilipus ru Ambiluo ru Tuhan intor ra giu' i. Kalo boo nakito io ru pagawai i, am tungguli' nilo boo pangkiralanan nabaya' ra kaansukan.

⁴⁰I Pilipus pana nakaliman ra giu' io noyo ra Asdod. Ongoi io ra ngaangai' intok ru libung ragitio am mampatanou ra Tanou Moonsoi intor ri Jisus saboi nakasuku' io ra Kaisaria.