Read Timugon Murut ROMA 14 Bible Online

ROMA 14 - Timugon Murut bible

ROMA 14

¹Apuo' noyo ulun ondo' malawo pangintapatan am pai' noyo ansangi' io sabap ra pamaguangan galama' nano.

²Mokoondo' ulun ondo' mangintopot ra atan-atan ayuk maakan, kaa' ulun malawo pangintapatan no kalo mangakan ra kual.

³Kaa' ulun ondo' makaakan ra atan-atan ayuk pai' noyo pagasab riso ondo' kalo mangakan ra kual. Ulun ondo' kalo mangakan ra kual, pai' noyo sonsolo' io ondo' makaakan ra atan-atan ayuk, sabap ra inapu io noyo ri Aki Kapuuno'.

⁴Kolondo' kuasa' muno mononsol ra ulipon ru ulun bokon. Matanda' io kapoam kalo, ginio aruon ru tuan nano galama' ayuk. Maaru' makapambaal io ra matanda' sabap ra Tuhan niayuk mangindangan riso.

⁵Mokoondo' ulun mampakaatang ra orou inaru' nilo intor orou ra bokon. Mokoondo' ulun mangkara' ra ngaangai' orou mogondo' ayuk. Polosoon noyo itakau gumagaya' ra bolos ru guang sigagama'.

⁶Osoi ayuk mampakaatang ra orou inaru' no, baalon no ginio koson mangurumat ra Tuhan. Osoi ayuk makaakan ra atan-atan ayuk, baalon no ginio koson mangurumat ra Tuhan, sabap ra maringkuanang io ri Aki Kapuuno' ra nangani' ra akanon. Osoi ayuk kalo mangakan ra kual, mangurumat io niayuk ra Tuhan am maringkuanang io ri Aki Kapuuno'.

⁷Kolondo' sangulun intor ritakau maayag kapoam matoi sabap ra kaatangan nano galama'.

⁸Iou pana maayag kapoam matoi, itakau musiti' mangurumat ra Tuhan. Iou pana maayag kapoam matoi, itakau ti Tuhan ayuk tatangan.

⁹Ginio ra i Kristus minatoi am naayag saguli' koson masauk ra Tuhan ru ulun maayag am ulun namagatoi.

¹⁰Intor raginio, kua guat pononsol kau ra pabukat Kristian ra bokon? Am kua guat pagasab kau ra pabukat Kristian ra bokon? Itakau ti ngaangai' paumaan am akimin ri Aki Kapuuno'.

¹¹Sabap ra tinulisan noyo ra Buuk Kitab, kon ru Tuhan, “Aku ti i Aki Kapuuno' ondo' maayag, moonong ulun migulatur ra saang Kuno, am poyo mangiou ra Aku ti i Aki Kapuuno'.”

¹²Intor raginio itakau sigagama' mampataam ri Aki Kapuuno' ra atan binaal takau.

¹³Intor raginio, pai' takano pononsol ra rondo' am bokon. Kaa' aruo' noyo kalo mambaal ra atan-atan ondo' mampakalayau kapoam mangkinibit ra pabukat Kristian makatula.

¹⁴Sabap ra pinaintutun aku toojo ru Tuhan Jisus, ginio ra mangintopot aku ra ngaangai' akanon karaan ri Aki Kapuuno' ra maakan. Kaa' amon ru sasangulun mangintopot ra mokoondo' akanon mampajamol riso sumugut ra kaulayan ru ugama, akanon raginio niayuk mampajamol riso.

¹⁵Ginio ra amon ru mampakasinduol kou ra pabukat Kristian muno sabap ra atan ondo' akanon muno, ginio kalo boo inimpuun ra togom. Pai' noyo pompoloso ra atan ondo' akanon muno mangkinibit ra sasangulun lumugut, sabap ri Kristus minatoi noyo koson mamayag riso.

¹⁶Intor raginio, pai' polosoo' ra akau sangkaakani' ra atan ayuk karaan ru ulun ra bokon ra malaat.

¹⁷Sabap ra amon ru mamarinta i Aki Kapuuno'[32] ra kaayagan ru sasangulun, akanon am inumon sala' ka boo maatang. Kaa' gitio noyo ondo' maatang; gumagaya' ra kasagaan Nano, katasuan ru guang am kaansukan, ondo' ringai' no pataakin ru Ambiluo ri Aki Kapuuno'.

¹⁸Osoi ayuk mangandoi ri Kristus koson raginio, io no ondo' mampakaansuk ri Aki Kapuuno' am urumaton poyo ru ulun.

¹⁹Intor raginio, kasalok takano mirot[33] maayag ra rondo' guang am magigikang ra pangintapatan.

²⁰Pai' kau pampajajou ra atan ondo' binaal noyo ri Aki Kapuuno' sabap ra akanon palion min. Ngaangai' ru akanon maakan, kaa' akau ra sala amon ru atan ondo' akanon min mangkinibit ra ulun bokon makatula.

²¹Ginio ra moonsoi poyo kalo mangakan ra kual, manginum ra wain kapoam mambaal ra atan ayuk, amon ru ginio poyo mangkinibit ra pabukat Kristian muno makatula.

²²Atan ayuk intopoton min ra maatang intor raginio, raguon min ayuk ri Aki Kapuuno'. Pakaansuk noyo ulun ondo' mambaal ra intopoton ru guang nano am kalo makaliman ra makasala io.

²³Kaa' osoi ayuk maimamang ra atan ondo' inakan no, sonsolon io ri Aki Kapuuno' amon ru akanon no ginio. Sabap ra binaal no ginio manggal ra atan karaan no ra moonsoi, am atan ayuk manggal ra moonsoi, ginio noyo makatula.