Read Timugon Murut ROMA 16 Bible Online

ROMA 16 - Timugon Murut bible

ROMA 16

¹Giti masaga' aku mampaulig ramuyun ra pabukat takau ra i Pibi, ondo' mangindangan ra pasimpungan ulun Kristian giu' ra bandar Kingkiria.

²Apuo' min io koson ra pabukat Kristian, ioginio kaindalaman ru ulun ri Aki Kapuuno' mangapu ra rondo' am bokon. Atan ayuk pakiindanganan nano indangano' min noyo, sabap ra io galama' nakapangindangan noyo masuang ulun am aku niayuk.

³Posoboyon ku poyo bilin kaansayan kuno ri Priskila am i Akwila, ilo ti rangan kuno mangangandoi ri Kristus Jisus.

⁴Ilo ti maar noyo matoi paat nangindangan pamayag raki'. Paringkuanangan ku risilo, am sala' ka aku ayuk, kaa' ngaangai' ulun Kristian sala' ka Jaudi niayuk maringkuanang risilo.

⁵Bilin kaansayan ku niayuk ra pasimpungan ulun Kristian ondo' tumimung ra baloi nilono. Bilin kaansayan kuno ra rangan tagamin ku i Ipinitus, io ti ulun kasaa' ondo' nangintopot ri Kristus ra libung ru Asia.

⁶Bilin kaansayan kuno ri Maria ondo' mirot toojo pangandoi mangindangan ramuyun.

⁷Bilin kaansayan ku niayuk ri Andronikus am i Junias,[34] ilo ti ulun ru Jaudi koson raki' ondo' nakaaya' raki' inaput. Mauligan ilo noyo ra rasul-rasul am nakasigulu ilo mangintopot ri Kristus ka aku.

⁸Bilin kaansayan kuno ri Ampliatus ondo' rangan tagamin ku sabap ra pasimpungan mai ra Tuhan.

⁹Bilin kaansayan ku niayuk ri Urbanus, rangan mangangandoi takau ri Kristus, am rangan tagamin kuno i Stakis.

¹⁰Bilin kaansayan kuno ri Apilis ondo' nampagagayaan no ri Kristus mauligan noyo. Bilin kaansayan kuno poyo risilo giu' ra baloi ri Aristobulus.

¹¹Bilin kaansayan ku ri Irodion, ulun ru Jaudi koson raki'. Bilin kaansayan ku niayuk ra pabukat Kristian giu' ra baloi ri Narkisus.

¹²Bilin kaansayan kuno ri Tripina am i Triposa ondo' mirot mangandoi ra Tuhan. Bilin kaansayan kuno ra rangan tagamin kuno i Pirsis ondo' mirot tojojo pangandoi ra Tuhan.

¹³Bilin kaansayan kuno ri Rupus, io sangulun mangangandoi ra Tuhan ondo' urumaton, am bilin kaansayan ku niayuk ra ina' nano ondo' pinangkaina' kuno.

¹⁴Bilin kaansayan kuno ri Asinkritus, i Pligon, i Irmis, i Patrobas, i Irmas am ngaangai' pabukat Kristian ondo' mababaya' risilo.

¹⁵Bilin kaansayan kuno ri Pilologus am i Julia, i Nirius am pagaka' ra ruandu' nano, i Olimpas am ngaangai' ulun ri Aki Kapuuno' ondo' mababaya' risilo.

¹⁶Paat ra akau manguma' ra rondo' am bokon indagu kano ra kaansayan mabaya' ra guang mapasau. Ngaangai' pasimpungan ulun Kristian mampasaboi ramuyun ra bilin kaansayan nilono.

¹⁷Pabukat kau ngaangai', kitaakon takamin toojo, pagilalai' noyo ilo ondo' mampatuliar am mampalingou ra pangintapatan ru ulun Kristian. Pangilaan nilo kalo mogondo' ra nangilaan ramuyun i. Ginio ra inggalur kano risilo!

¹⁸Sabap ra ilo ondo' mambaal raginio kalo mampakaatang ri Kristus, Tuhan takau, kaa' mampakaatang ayuk ra kasagaan nilo galama'. Ragu nilo ra mangaamis am mangambi' mamparuung ra ulun ondo' kalo maindalom ra kalaatan.

¹⁹Napandayan noyo ru ngaangai' ulun ra nampagagayaan mino ra Tanou Moonsoi, am intor raginio maansukan aku ramuyun. Masaga' aku ra makatutun kau ra atan ayuk moonsoi am kalo noyo maindalom ra atan ayuk kalaatan.

²⁰Am i Aki Kapuuno', intaran ru ngaangai' kaansayan, mamuso ra kuasa' ru Tingganai ru riwato saboi kumuku' io ramuyun. Gama' ru Tuhan takau i Jisus Kristus mambarakat ramuyun.

²¹I Timotius, rangan kuno mangangandoi, mampasaboi ra bilin kaansayan nano ramuyun. Kon niayuk i Lukius, i Jason am i Sosipatir, rangan-rangan ku ra Jaudi no.

²²Am ondo' nangindangan panulis ra surat ragitio[35] am aku, i Tirtius. Mampasaboi aku ra bilin kaansayan ramuyun koson ra sangulun ondo' mangintopot ra Tuhan.

²³Puun baloi inayanan kutu pana, i Gayus, mampasaboi ramuyun ra bilin kaansayan nano. Ulun-ulun Kristian no mantitimung ra baloi nano. I Irastus, bendahari ru bandar Korintus, mampasaboi ramuyun ra bilin kaansayan nano, am koson niayuk i Kuartus, pabukat takau ra Kristian. [

²⁴Gama' ru Tuhan takau i Jisus Kristus mambarakat ramuyun ngaangai'. Amin.]

²⁵Omporo' noyo i Aki Kapuuno'! Makakuasa' Io mampaikang ra pangintapatan mino sumugut ra Tanou Moonsoi intor ri Jisus Kristus ondo' pinabala' kuno ramuyun. Ginio potonowon kuno sumugut ra ondo' pinaintalang noyo ri Aki Kapuuno' raki', ioginio katapatan ondo' kalo igondo' pinabala' intor ra galing i.

²⁶Kaa' raino katapatan raginio pinasalula' mansail ra namatikan ru nabi-nabi. Am sumugut ra susuban ri Aki Kapuuno' ondo' mantilayun, katapatan raginio potonowon ra ngaangai' bansa', maa' raginio mangintopot am gumagaya' ilo boo Riso.

²⁷I Aki Kapuuno' noyo rorondo' ayuk am Io no intaran ru ngaangai' kapandayan. Omporo' Io no ra mantilayun mansail ri Jisus Kristus. Amin.