Read Timugon Murut ROMA 3 Bible Online

ROMA 3 - Timugon Murut bible

ROMA 3

¹Amon ru koson poyo raginio, atan kaansayan ru ulun ru Jaudi intor ra ulun sala' ka Jaudi? Am atan kia onong ru sunat risilo?

²Maaru' masuang onong! Intor poyo ra talimpuun i, ulun ru Jaudi noyo napalansanan ri Aki Kapuuno' ra ragu Nano.

³Kaa' atan koson amon ru mokoondo' ulun ru Jaudi kalo mampagagaya' ra ragu Nano? Ginio kia mangkinibit ra i Aki Kapuuno' kalo manugut ra bantu' Nano risilo?

⁴Maaru' kalo! Ondo' raguon ri Aki Kapuuno' motopot, kabalu' pana ngaangai' ulun maabau-abau. Mokoondo' tinulisan ra Buuk Kitab intor ri Aki Kapuuno', “Paat ra Okou mindagu, ngaangai' makapandai ondo' raguon Muno motopot, am paat ra Okou uwin, maala ngaangai' ondo' manguu' Rirun.”

⁵Kaa' amon ru kalaatan takati mampainono' ra i Aki Kapuuno'[8] mabanis guang, atan taaman takau? Makasala kia i Aki Kapuuno' amon ru mangukum Io ritakau? (Ragu kutu maya' ra pangkaraan ru ulun ayuk.)

⁶Maaru' kalo! Sabap ra amon ru guang ri Aki Kapuuno' kalo mabanis, maaru' kalo noyo makapangakim Io ra ulun ru tana' ti.

⁷Amon ru intor ra baalon kuno ondo' kalo motopot, guang mabanis ri Aki Kapuuno'[9] makito saboi omporon Io ru ulun, kua guat sonsolo' aku ra sangulun makatula?

⁸Kua guat pai' takau raguo', “Moonsoi mambaal takau ra malaat, bagu atan ondo' moonsoi no masauk”? Mokoondo' niayuk kukula' ngaulun boo magasab am manguu' raki', konilo, “Mindagu i Paulus koson raginio!” Ukumin ilo ri Aki Kapuuno' maya' ra binaal nilai no.

⁹Koson poyo raginio, ralalom pagilangan ri Aki Kapuuno', akai ulun ru Jaudi moonsoi poyo kia intor ra ulun sala' ka Jaudi? Maaru' kalo![10] Pinabala' ku noyo ra iou pana ulun ru Jaudi kapoam sala' ka Jaudi, ngaangai' noyo kinuasa' ru tula.

¹⁰Koson ra tinulisan ra Buuk Kitab; “Kolondo' sangulun motopot ra pagilangan ri Aki Kapuuno',

¹¹kolondo' ra sangulun pana makarati' ra atan ondo' motopot am sumamba ri Aki Kapuuno'.

¹²Ngaangai' ulun timinalikur intor ri Aki Kapuuno'; ilo ngaangai' kolondo' onong; kolondo' sangulun pana mambaal ra motopot, topot-topot kolondo'.

¹³Ragu nilo mangkinibit ra kapatayan; mamparuung ilo ra ulun mansail ra abau nilo, am ragu simbaal nilo, koson ra bisa' ru kukuo.

¹⁴Moporos ulas nilono.

¹⁵Malingas ilo mangimbolo' am mamatoi.

¹⁶Mangkinibit ilo ra kaluusan am kapaganan ra ati ayuk angayan nilo.

¹⁷Kalo makatutun ilo ra ralan pabansayan,

¹⁸am kalo mangurumat ilo ri Aki Kapuuno'.”

¹⁹Ginio ra raino mapandayan takau noyo ra ngaangai' ondo' tinulisan ra Ukum i, pasukuon risilo ondo' gumagaya' ra Ukum no. Kolondo' sasaban boo ru sangulun pana am ngaangai' ulun ru tana' ti maukum ri Aki Kapuuno'.

²⁰Sabap ra kolondo' sangulun pana pobonsoyon ri Aki Kapuuno' sabap ra sumugut io ra panusuban ru Ukum no. Sotopot no, Ukum raginio mambala' ayuk ra itakau ulun makatula.

²¹Kaa' raino manulu' i Aki Kapuuno' ra ralan ati kulaan itakau mobonsoi saguli' Riso.[11] Ralan raginio sumiang intor ra Ukum ri Musa, kabalu' pana Ukum ri Musa am Kitab Nabi-Nabi nampaintutun noyo ritakau ra baal raginio.

²²Ralalom pangintapatan ri Jisus Kristus ayuk ulun mobonsoi saguli' ri Aki Kapuuno'. Ginio saukon ra ulun ru Jaudi am poyo sala' ka Jaudi sabap ri Aki Kapuuno' kalo mampili' ra ulun.

²³Ngaangai' ulun makatula noyo am maalur intor ri Aki Kapuuno' ondo' mamayag risilo.

²⁴Ralalom asi' ri Aki Kapuuno' ondo' tinaakan ayuk, ulun mobonsoi saguli' Riso: ioginio, ralalom inggalan ri Kristus Jisus ondo' mampalabus risilo.

²⁵Ginio ra i Jisus Kristus pinataak ri Aki Kapuuno' ra potoyon maa' raginio ra pinatayan Nano, tula ru ulun ampunon amon ru mangintopot ilo Riso. Binaal ri Aki Kapuuno' ginio koson manulu' ra kinabanis ru guang Nano, sabap ra galing i mataan guang Nano ra tula ru ulun saboi kalo nangukum risilo.

²⁶Kaa' raino kalo boo polosoon No tula ru ulun koson mampakito ra kinabanis ru guang Nano. Ginio mampakito ra i Aki Kapuuno' motopot am mopobonsoi saguli' Io ra moonong ulun ondo' mangintopot ri Jisus.

²⁷Ginio ra kolondo' boo sasaban takau lumimbau. Kua guat koson raginio? Sabap ra itakau gumagaya' ra Ukum ri Musa kia? Kalo, kaa' sabap ra mangintopot takau.

²⁸Arati' ru ngaangai' raginio, ulun mobonsoi saguli' ri Aki Kapuuno' sabap ra mangintopot io ri Jisus Kristus am sala' ka sabap ra gumagaya' ra Ukum ri Musa.

²⁹Ginio ra i Aki Kapuuno' intopoton ru ulun ru Jaudi ayuk kia? Maaru' kalo! Intopoton Io niayuk ru ulun sala' ka Jaudi.

³⁰I Aki Kapuuno' rondo' ayuk, Io no mopobonsoi saguli' ra ulun ru Jaudi Riso maya' ra pangintapatan nilo. Io niayuk mopobonsoi saguli' ra ulun sala' ka Jaudi Riso maya' ra pangintapatan nilo.

³¹Motopot kia sabap ra pangintapatan takau ri Kristus Ukum ri Musa no patirin boo? Maaru' kalo! Sotopot no mangurumat takau ra Ukum ri Musa no.