Read Timugon Murut ROMA 5 Bible Online

ROMA 5 - Timugon Murut bible

ROMA 5

¹Raino itakau mobonsoi saguli' ri Aki Kapuuno' sabap ra pangintapatan takau Riso am makapabansayan noyo Riso ralalom ru Tuhan takau, i Jisus Kristus.

²Sabap ra pangintapatan takau ri Kristus, nagibit Io ritakau mimong ra barakat ri Aki Kapuuno' ondo' malimanan takau raino. Sabap raginio maansukan takau am malansan ra magapu takau ra katulayan ri Aki Kapuuno'.

³Mulu' poyo itakau maansukan amon ru makakapaganan, sabap ra mapandayan noyo kapaganan no magibit ritakau mokoorot,

⁴am kaaratan no iowon ri Aki Kapuuno', am ginio mangani' ritakau ra kalansanan.

⁵Am kalansanan raginio kalo mangkinibit ritakau mangkaus, sabap ra nanaak noyo i Aki Kapuuno' ritakau ra Ambiluo Nano[14] ondo' mampakito ritakau ra togom ri Aki Kapuuno'.

⁶Gili poyo, paat ra itakau kolondo' kaindanganan, nakaintuma' ra inaru' ri Aki Kapuuno', minatoi i Kristus koson mamayag ra ulun makatula.

⁷Sabap ra mapagon sangulun masaga' matoi malit ra ulun ondo' mampakaatang ra ukum, kaa' mokoondo' lair sangulun makakau' matoi malit ra ulun moonsoi guang.

⁸Kaa' i Aki Kapuuno' nampakito ritakau ra togom Nano sabap ri Kristus minatoi mamayag ritakau, paat ra itakau makatula ayuk poyo.

⁹Raino itakau mobonsoi saguli' ri Aki Kapuuno' mansail ra pinatayan ri Kristus. Intor raginio maaru' bayagon takau ri Kristus intor ra sangit am ukum ri Aki Kapuuno'.

¹⁰Galing i mantutula' takau ri Aki Kapuuno', kaa' itakau pinobonsoi saguli' Riso mansail ra pinatayan ru Anak Nano. Raino, ra itakau rangan ri Aki Kapuuno', maaru' bayagon takau sabap ri Kristus maayag.

¹¹Sala' ka ginio ayuk, kaa' maansukan takau poyo ri Aki Kapuuno' ralalom ri Jisus Kristus Tuhan takau, ondo' raino magibit ritakau mabubukat ri Aki Kapuuno'.

¹²Tula riminatong ra tana' ti mansail ra sangulun, am tula nano nagibit ra kapatayan. Am sonor no ngaangai' ulun matoi, sabap ra ngaangai' ulun makatula noyo.

¹³Kalo poyo i Aki Kapuuno' nanaak ra Ukum ri Musa, makatula noyo ulun ru tana' ti. Kaa' amon ru kolondo' ukum, tula ru ulun kalo untobon ri Aki Kapuuno'.

¹⁴Kabalu' raginio, intor ri Adam suku' ri Musa, minatoi ngaangai' ulun, ilo pana ondo' kalo makatula koson kaanggalan ri Adam, ra io kalo giminagaya' ra panusuban ri Aki Kapuuno'. I Adam ti noyo panginuuyan ra Io ondo' matong no.

¹⁵Kaa' taak ri Aki Kapuuno' mansuai toojo ra tula ri Adam. Motopot, masuang ulun minatoi sabap ra tula ru sangulun i, kaa' mumpara' poyo barakat ri Aki Kapuuno' ra ulun masuang am taak Nano risilo sabap ra kataawan ru sangulun, Io no i Jisus Kristus.

¹⁶Am taak ri Aki Kapuuno' no maayo kaga' sonor no intor ra sonor ru tula ru sangulun i. Rondo' tula no mangkinibit ra ngaangai' ulun akimin ra, “Makasala”, kaa' kalupus masuang tula binaal ru ulun, mampakito i Aki Kapuuno' ra kataawan Nano am mindagu risilo, “Kalo makasala”.

¹⁷Motopot, mansail ra tula ru sangulun i, ngaangai' ulun minatoi sabap ra sangulun i, kaa' mulu' poyo sonor ru binaal ru sangulun ra bokon, Io no i Jisus Kristus. Mansail Riso noyo boo, ngaangai' ondo' mangapu ra barakat ri Aki Kapuuno' ondo' kalo mauntob am ra taak Nano, ilo mobonsoi saguli' Riso[15] am maayag am mamarinta ilo sabap ri Kristus.

¹⁸Intor raginio, ngaangai' ulun inukum sabap ra tula ru sangulun. Koson niayuk ngaangai' ulun iowon “Kalo makasala” am aniin ra kaayagan sabap ra binaal ru sangulun ondo' giminagaya' ra kasagaan ri Aki Kapuuno'.

¹⁹Am poyo intor ra sangulun kalo giminagaya' ra susuban ri Aki Kapuuno' ngaangai' ulun makatula. Koson niayuk intor ra binaal ru sangulun ondo' giminagaya' ra susuban ri Aki Kapuuno', ulun mobonsoi saguli' Riso.

²⁰Ukum ri Musa tinaakan ri Aki Kapuuno'. Kaa' kapiratan ru ulun gumagaya' raginio mangkinibit risilo manggal ra Ukum no am tumula ri Aki Kapuuno'. Kaa' rumuang pana tula no, mulu' poyo kataawan ri Aki Kapuuno' no rumuang.

²¹Intor raginio, koson niayuk ra tula nangkinibit ra ngaangai' ulun matoi, kataawan ri Aki Kapuuno' pana mangkinibit ritakau mobonsoi saguli' Riso, saboi mokoowot takau ra kaayagan motopot am mantilayun sabap ri Jisus Kristus, Tuhan takau.