Read Timugon Murut ROMA 7 Bible Online

ROMA 7 - Timugon Murut bible

ROMA 7

¹Pabukat kau ngaangai', maaru' nakapandai kano ra ukum, am ra ukum no makakuasa' ra sasangulun buoi ra io maayag ayuk.

²Koson panginuuyan ragitio: maya' ra ukum, ruandu' makaralaki no musiti' masimpung ra ralaki nano buoi ra io maayag ayuk. Kaa' amon ru matoi ralaki nano nakalabus ruandu' no intor ra ukum raginio.

³Kaa' amon ru ruandu' no sumimpung ra ungkuyon ra bokon paat ra ralaki nano lakat ayuk poyo soroi, ruandu' no sabiton ra lumapau. Kaa' amon ru minatoi noyo ralaki nano, nakalabus noyo ruandu' no intor ra ukum am sala' ka lumapau io amon ru mangindalaki io poyo.

⁴Pabukat kau ngaangai', koson niayuk raginio ramuyun. Maya' ra pagilangan Ukum ri Musa koson ra minatoi kau noyo, sabap ra siminimpung kau ra inan ri Kristus. Akau raino i Kristus noyo tatangan, Io ondo' binayag saguli' intor ra kapatayan, maa' raginio kaayagan takau mokoonong ri Aki Kapuuno'.

⁵Ra galing i kaayagan takau kinuasa' ru paliso ru ulun, am sabap ra kinibit ru Ukum ri Musa, mansalinut kasagaan makatula miningkual intor ra guang takau. Ginio noyo nangkinibit ritakau ra kapatayan.

⁶Kaa' raino nakalabus takau noyo intor ra Ukum ri Musa no, sabap ra koson ra ulun minatoi takau noyo, ioginio kalo boo manguasa' io ritakau. Raino kalo boo mangandoi takau ri Aki Kapuuno' maya' ra ukum ondo' tinulisan, kaa' maya' ra ralan bagu ondo' tuluin takau ru Ambiluo ri Aki Kapuuno'.

⁷Amon ru ginio poyo, atan boo paraguon takau? Malaat kia Ukum ri Musa no? Maaru' kalo! Kaa' Ukum ri Musa niayuk ondo' mampatutun raki' ra atan sotopot no tula. Amon ru kolondo' tinulisan ra Ukum ri Musa no, “Pai' pagingkaut,” maaru' kalo makapandai aku ra arati' ru magingkaut.

⁸Kaa' mansail ra ukum no, tula noyo mangkinibit ra nansalinut kasagaan magingkaut ralalom ru guang kuno. Amon ru kolondo' ukum, tula no kolondo' boo kuasa'.

⁹Ragili kalo nakatutun aku toojo ra ukum, kaa' pakatutun aku ra ukum no, tumalimpuun tula no manguasa' raki',

¹⁰am koson ra minatoi aku. Ukum ondo' inaru' mangani' ra kaayagan, sotopot no mangkinibit raki' ra kapatayan.

¹¹Mansail ra ukum no, makakaluagan tula mamparuung am mangkinibit raki' ukumin ra potoyon.

¹²Ginio ra Ukum ri Musa no intor ri Aki Kapuuno' am moonong susuban Nano mabanis am moonsoi.

¹³Amon ru koson poyo raginio, ondo' moonsoi no kia mangkinibit raki' ra kapatayan? Maaru' kalo! Mansail ra ukum ondo' moonsoi, tula noyo ondo' mangkinibit raki' ra kapatayan. Guang mambaal ra tula mauligan toojo am mansail ra ukum mapandayan noyo ra kinalaat ru tula no.

¹⁴Makapandai takau noyo ra Ukum ri Musa no intor ra Ambiluo ri Aki Kapuuno', kaa' aku ti ulun ayuk ondo' inulipon ru tula.

¹⁵Kalo makarati' aku ra baalon kutu. Sabap ra ondo' kasagaan kuno, kalo makapambaal aku; kaa' ondo' kasisangin kuno, ginio noyo ondo' baalon kuno.

¹⁶Amon ru mambaal aku ra ondo' sala' ka kasagaan kuno, arati' no mangiou aku ra Ukum ri Musa no motopot.

¹⁷Ginio ra sotopot no sala' ka aku ondo' mambaal ra malaat, kaa' tula ondo' manguasa' ra guang kuno mangkinibit raki'.

¹⁸Ginio ra kolondo' moonsoi soroi ra guang kutu, ioginio paliso kuno ra ulun. Sabap ra iou pana masaga' aku mambaal ra moonsoi, kalo makapambaal aku.

¹⁹Kalo makapambaal aku ra moonsoi ondo' kasagaan kuno, kaa' mambaal aku ra malaat ondo' sotopot no sala' ka kasagaan kuno.

²⁰Amon ru mambaal aku ra ondo' sala' ka kasagaan kuno, arati' no sala' ka aku ondo' mambaal ra malaat, kaa' tula ondo' manguasa' ra guang kutu mangkinibit raki'.

²¹Intor raginio ilain ku makakuasa' ukum ragitio: Amon ru masaga' aku mambaal ra moonsoi, ondo' malaat ayuk rorondo' pilion kuno.

²²Maansukan guang kuno ra ukum intor ri Aki Kapuuno'.

²³Kaa' matutunan ku ralalom ru guang kuno mokoondo' poyo ukum ondo' mantutula' ra ukum ondo' iowon ru guang kuno. Ginio ra uliponon aku ru ukum ru tula ondo' manguasa' ra inan kuno.

²⁴Koson ragitio kaayagan kutu: Ralalom ru guang kuno masaga' aku gumagaya' ra ukum ri Aki Kapuuno', kaa' paliso kuno ra ulun kinuasa' ru tula. Aku noyo koson ra ulun inibatan! Osoi kia makapamayag raki' intor ra inan ti ondo' mangkinibit raki' ra kapatayan? Paringkuanangan ri Aki Kapuuno'; sabap ra ralalom inggalan ri Jisus Kristus mamayag Io raki'.