Read Timugon Murut ROMA 9 Bible Online

ROMA 9 - Timugon Murut bible

ROMA 9

¹Ondo' raguon kutu motopot; siminimpung aku ri Kristus am kalo magabau aku. Bolos ru guang kuno ondo' kinuasa' ru Ambiluo ri Aki Kapuuno' mampainono' ra kalo magabau aku.

²Mangiluk toojo am maimbolo' guang kutu paat ra aku

³mangkara' ra pabukat-pabukat kuno, ioginio bansa' kuno galama'. Gama' ru makapangindangan aku risilo, amon ru kitaakon tumampos aku ukumin ri Aki Kapuuno' am patuliaron intor ri Kristus.

⁴Ilo no ulun ru Israil ondo' pinili' ri Aki Kapuuno'. Piniau ilo noyo ri Aki Kapuuno' ra anak Nano galama', am pinakito No ilo ra katulayan Nano. Binantuan No ilo am inanian No ilo ra Ukum ri Musa. Tinuluan No ilo ra sambayang ondo' motopot am naapu nilo ondo' binantu' Nali.

⁵Ilo ti papag ru kinamatuaan takali ra nauligan, am intor ra papag ri Kristus ra ulun no, inanak Io sangulun Israil. Gama' ru i Aki Kapuuno' ondo' manguasa' ra ngaangai', omporon ra sabuoi-buoi no.[23] Amin.

⁶Kalo mindagu aku ra bantu' ri Aki Kapuuno' i kalo nasugut. Kaa' sala' ka ngaangai' bansa' ru Israil pinili' ri Aki Kapuuno',

⁷am sala' ka ngaangai' papag ri Abragam no anak ri Aki Kapuuno'. Sabap ra kon ri Aki Kapuuno' ri Abragam, “Ondo' papag ri Isak ayuk sabiton ra papag muno.”

⁸Arati' no, sala' ka ngaangai' papag ri Abragam[24] no sabiton anak ri Aki Kapuuno', kaa' ilo ayuk ondo' inanak maya' ra bantu' Nali.

⁹Sabap ragitio noyo ondo' binantu' ri Aki Kapuuno' ri Abragam, kon Nano, “Sumaguli' Aku ra orou ondo' inaru'[25] noyo am paat raginio maganak i Sara ra sangulun anak ungkuyon.”

¹⁰Sala' ka ginio ayuk. Rondo' ayuk ama' ru ruo ngaulun anak ungkuyon ri Ribika, ioginio i Isak kinamatuaan takali.

¹¹Koson mampakito ra sangulun intor ra anak-anak pilian Nano, minindagu i Aki Kapuuno' ri Ribika, “Anak ra katuaan no mangandoi ra boborok nano.” Ginio rinagu Nano ra kalo poyo karuruo anak ni inanak am kalo poyo nambaal ilo ra moonsoi kapoam malaat. Maa' raginio makito toojo ra pilian ri Aki Kapuuno' no kalo inimpuun ra baal nilo, kaa' maya' ra pampiawan Nano galama' ayuk.

¹³Koson ra tinulisan ra Buuk Kitab, kon ri Aki Kapuuno', “Motogom Aku ri Jakub, kaa' masisang Aku ri Isau.”

¹⁴Intor raginio, atan boo paraguon takau? Mabanis kia guang ri Aki Kapuuno'? Maaru' Io mabanis guang!

¹⁵Indagu i Aki Kapuuno' ri Musa, “Mambarakat Aku ra osoi ayuk pilion Kuno, am makaasi' Aku ra osoi ayuk kasagaan Kuno.”

¹⁶Baal raginio kalo maya' ra kasagaan kapoam kapiratan ru ulun, kaa' maya' ra kataawan ri Aki Kapuuno'.

¹⁷Sabap ra tinulisan noyo ra Buuk Kitab, kon ri Aki Kapuuno' ra raja' Misir, “Pinasauk tokou ra raja' maa' raginio ralalom rirun mampakito Aku ra kuasa' Kuno, am maa' raginio inggalan Kuno mauligan ra ati-ati ayuk ra tana' ti.”

¹⁸Ginio nai ra, amon ru masaga' i Aki Kapuuno' makaasi' ra sasangulun, ginio baalon No. Am poyo, amon ru masaga' Io mambaal ra sasangulun mokotog ulu, ginio baalon No.

¹⁹Raino makamangkuot lair raki', “Amon ru koson ragino kua guat lakat ayuk poyo mampasala i Aki Kapuuno' ra ulun? Sabap ra kolondo' sangulun pana makaanggal ra kasagaan ri Aki Kapuuno'.”

²⁰Pabukat kuno, makakau' kou kia tumaam ri Aki Kapuuno' koson raginio? Makapangkuot kia rarapu' no ra mambabaal no, “Kua guat baalo' mu aku koson ragitio?”

²¹Mambabaal no makakuasa' mangalap ra tana' lia' no mampasauk ra atan ayuk kasagaan nano galama'. Intor ra tana' lia' ra nogondo', baalon no rarapu' mologo am niayuk rarapu' kalo mologo.

²²Mogondo' niayuk ra atan ondo' binaal ri Aki Kapuuno'. Masaga' Io mampakito ra sangit am kuasa' Nano, kaa' mataan Io risilo ondo' sotopot no sama' sangitin am luuson Nano.

²³Masaga' Io niayuk mampakito ritakau ra kaluaban ru kaansayan Nano. Ginio tinaakan Nano ritakau ondo' asiin Nano, ioginio itakau ondo' pinongo Nano makaapu ra kaansayan Nano.

²⁴Itakau ti noyo ondo' piniau Nano, am sala' ka itakau ulun ru Jaudi ayuk, kaa' ulun sala' ka Jaudi pana.

²⁵Gitio kon ri Aki Kapuuno' ra Kitab ru Nabi Gosia; “Ulun ondo' sala' ka ulun Kuno, sabiton Ku ‘Ulun Kuno’. Am ulun ondo' kalo tagamin Kuno, sabiton Ku ‘Ulun tagamin Kuno’.

²⁶Giu' ra intok ondo' inindaguan ri Aki Kapuuno' risilo ‘Akau sala' ka ulun Kuno,’ giu' no niayuk sabiton ilo ra anak ri Aki Kapuuno' ondo' maayag.”

²⁷Kon poyo ru nabi Jisaya intor ra ulun ru Israil, “Kabalu' pana suang ru ulun ru Israil no koson ra agis ru raat, kaa' sanganu ayuk bayagon,

²⁸sabap ra ukumin ri Aki Kapuuno' ra mataki' ngaangai' ulun ru tana' ti.”

²⁹Kon poyo ru nabi Jisaya ragili, “Amon ru Tuhan Ondo' Maayo Kaga' Kuasa' kalo nanatang ritakau ra papag, maaru' maluus takau koson nasauk ra mamagun ru bandar Sodom am Gomora i.”

³⁰Gitio noyo arati' ru raguon mai; ulun sala' ka Jaudi ondo' kalo mirot mobonsoi saguli' ri Aki Kapuuno', ilo noyo pinobonsoi saguli' ri Aki Kapuuno' ralalom ru pangintapatan nilo Riso.

³¹Kaa' ulun ru Israil ondo' mansail ra Ukum ri Musa mirot mobonsoi saguli' ri Aki Kapuuno', kalo nokoowot ilo.

³²Kua guat? Sabap ra mangkinam ilo mobonsoi saguli' ri Aki Kapuuno' ralalom ru kapiratan nilo galama', am sala' ka ralalom ru pangintapatan nilo ri Aki Kapuuno'. Ginio ra ilo nakasaru ra ‘batu nasaruan’.

³³Tinulisan noyo ra Buuk Kitab intor ra batu no koson ragitio; “Ilai', mapabanta' Aku ra batu giu' ra Sion,[26] ondo' kasaruan ru ulun, rondo' batu maayo ondo' karatuan ru ulun. Kaa' osoi ayuk mangintopot Riso kalo mangkaus.”