Read Timugon Murut 1 KORINTUS 10 Bible Online

1 KORINTUS 10 - Timugon Murut bible

1 KORINTUS 10

¹Pabukat kau ngaangai', masaga' aku mampakara' ramuyun ra ondo' nasauk ra kinamatuaan takali paat ra nangkiralanan nilai mabaya' ri Musa. Ngaangai' nilo kinulumput ru gaun am namuntana' liminaup ra Raat Malia' i.

²Ralalom gaun am ralalom raat i, ngaangai' nilai koson ayuk boo ra riniu' masauk ra maamaya' ri nabi Musa.

³Ilo ngaangai' nangakan ra akanon ondo' inanian ri Aki Kapuuno' ralalom ru kuasa' Nano.

⁴Am niayuk nanginum ilo ra inumon ondo' pinaingkual ri Aki Kapuuno' intor ra batu ondo' namaya' risilo; sotopot no batu i Kristus galama'.

⁵Kabalu' pana koson ragili, kasuangan nilai kalo kaansayin ri Aki Kapuuno', am gili sabap ra baangkai nilai rumampalangan ayuk boo giu' ra tana' kaagisan.

⁶Ngaangai' no nasauk ra panginuuyan ritakau koson mampakara' ritakau ra pai' gogoto' baal malaat koson risilo ti.

⁷Niayuk maa' raginio pai' takau samba ra sinungkalalaing mogondo' ra binaal ru santayaran nilai. Mokoondo' tinulisan ra Buuk Kitab, “Nagagakan, nagiginum, am saligo'-ligo' ilo sumamba ra sinungkalalaing.”

⁸Pai' takau pansawa' koson ra binaal ru santayaran nilai, saboi mokoondo' ralalom songorou ruo ngoopor am talu ngaribu ngaulun intor risilo i minatoi sabap ra binaal nilo raginio.

⁹Pai' takau kinami' Tuhan[14] koson ra binaal ru santayaran nilai ragili, saboi minatoi ilo tininduk ru kukuo.

¹⁰Pai' takau bubutok sumangit ri Aki Kapuuno' koson ra binaal ru santayaran nilai ragili, saboi pinatoi ilo ru Malaikat Kapatayan.

¹¹Ngaangai' no nasauk risilo koson alapon ra panginuuyan ra ulun bokon. Ngaangai' no tinulisan niayuk koson rondo' pampakaraan ritakau, ondo' raino maayag ra paat ra pamupusan ru tana' ti.

¹²Pagilalai' noyo ulun ondo' indos no maikang pangintapatan nano maa' raginio kalo boo maratu' io.

¹³Moonong pangkinaman ondo' matuum mino, io no rondo' kaindalaman masalok matuum ru ulun. Kaa' suguton ri Aki Kapuuno' bantu' Nano am kalo mompoloso Io ramuyun kinamin makajanjai ra ikang mino. Paat ra akau matiu' ra pangkinaman, mampaikang Io ramuyun, maa' raginio moorot min.

¹⁴Ginio nai ra, pabukat kau ngaangai' ondo' tagamin ku, pai' min noyo sambaa' sinungkalalaing!

¹⁵Mindagu aku toojo ramuyun koson ra akau ti ulun matanda'. Guango' min noyo galama' rinagu kutu.

¹⁶Paat ra itakau manginum ra anggur no, maringkuanang takau ri Aki Kapuuno'; paat ra itakau manginum no, makapagagapu takau ra raraa' ri Kristus. Nogondo' niayuk ra ruti' ondo' pipilangon takano ra itakau mangakan, makapagagapu takau ra inan ri Kristus.

¹⁷Sabap ra rondo' ayuk ruti' no, itakau pana masauk ra rondo' inan, kabalu' pana itakau masuang, sabap ra itakau ngaangai' makapagagapu ra rondo' ruti'.

¹⁸Ilai' min ulun ru Jaudi: Ilo ondo' mangakan ra santayaran ru akanon ondo' pinabandai ra rasawat ru altar, makapagagapu am sumamba niayuk ri Aki Kapuuno'.

¹⁹Atan sotopot no kon kuni? Sinungkalalaing kapoam akanon ondo' pinampakan risilo no kolondo' toojo arati'.

²⁰Atan ondo' simbaluyon ra bandayan ru sinungkalalaing, sala' ka i Aki Kapuuno' papataakan, kaa' riwato-riwato. Ginio ra kalo masaga' aku ra akau magagapu ra riwato no.

²¹Pai' kau panginum ra anggur intor ra sangkir ru Tuhan am niayuk manginum poyo ra atan ondo' nakapakan ra riwato no. Nogondo' niayuk ra akau pai' pangapu ra inan ri Kristus am niayuk mangakan poyo ra ondo' nakapakan ra riwato no.

²²Kapoam masaga' takau kia mapasinduol ra guang ru Tuhan? Itakau ti kia maayo kuasa' intor ra Tuhan?

²³Mokoondo' ulun mindagu ra, “Atan ayuk kasagaan takau, ginio baalon takau.” Motopot, kaa' sala' ka ngaangai' kasagaan takau mokoonong. “Atan ayuk kasagaan takau, ginio baalon takau.” Motopot, kaa' sala' ka ngaangai' kasagaan takau mapasingkot ra kaayagan takau.

²⁴Pai' sangulun pana maguyum ra kaatangan ru kaayagan nano galama' ayuk, kaa' karaa' niayuk kaatangan ru ulun ra bokon.

²⁵Ngaangai' kual ondo' talanon giu' ra pasar maakan min. Kalo pana kuatin galing, maa' raginio kolondo' kaimamangan ru guang mino.

²⁶Sabap ra mokoondo' tinulisan ra Buuk Kitab, “Tana' ti am ngaangai' ru suang nano longgom ri Aki Kapuuno'.”

²⁷Amon ru piawon kau paakano' ru sangulun ondo' sala' ka Kristian am mongoi kau, akano' ayuk ondo' pasulungon nano ramuyun, kalo pana kuatin galing ati intor ru akanon no, maa' raginio kolondo' kaimamangan ru guang mino.

²⁸Kaa' amon ru mokoondo' mindagu ramuyun ra, “Akanon ti nakapakan noyo ra sinungkalalaing,” pai' noyo akano', sabap ra mangkara' ra kaatangan ru ulun no am sabap ra kaimamangan ru guang. (

²⁹Kon kuno sala' ka akau, kaa' kaimamangan ru guang ru ulun minindagu i.) Maampon lair mokoondo' mangkuot, “Kua kaluagan kuno musiti' ompongon koson sumugut ra kaimamangan ru guang ru ulun bokon?

³⁰Amon ru mangakan aku mabaya' ra paringkuanangan kuno ri Aki Kapuuno', kua ra ulun musiti' mononsol raki' sabap ra akanon ondo' naringkuanangan kuni ri Aki Kapuuno' ni?”

³¹Atan ayuk pana baalon mino, kapoam akanon am inumon min niayuk, baalo' min ngaangai' ginio koson mangurumat ri Aki Kapuuno'.

³²Kaayag kano koson raginio am pai' pangkinibit ra osoi ayuk pana makatula; koson ra ulun ru Jaudi, ulun sala' ka Jaudi kapoam ulun Kristian.

³³Tilu kano raki'. Koson ra atan ayuk pana baalon kuno, mangkinam aku mapabansuk ra guang ru ngaangai' ulun. Kalo niayuk maguyum aku ra kaatangan kuno, kaa' makara' ku ulun ra bokon, maa' raginio bayagon ilo.