Read Timugon Murut 1 KORINTUS 15 Bible Online

1 KORINTUS 15 - Timugon Murut bible

1 KORINTUS 15

¹Pabukat kau ngaangai', raino masaga' aku mampakara' saguli' ramuyun ra Tanou Moonsoi intor ri Aki Kapuuno' ondo' pinasaboi kuno ramuyun ragili. Ginio inapu min am nangintopot kau ri Kristus sabap ra tanou raginio.

²Amon ru mangintopot kau toojo ra Tanou Moonsoi ondo' pinasaboi kutu, ginio noyo mamayag ramuyun; ondo' ayuk amon ru kalo naratian min toojo.

³Tanou ra pinasaboi kutu ramuyun ti, iono ondo' naapu kuno galama' am ondo' maatang toojo ioginio: ra i Kristus minatoi sabap ra tula takau, koson tinulisan ra Buuk Kitab;

⁴linobong io, kaa' nalupus nataluan binayag io saguli'. Ginio niayuk natulisan noyo ra Buuk Kitab.

⁵Nambala' aku niayuk ramuyun ra i Kristus ondo' binayag saguli' i minintalang ri Pitrus, am tauli intalang Io poyo ra koopor am ruo ngaulun rasul-rasul Nano.

⁶Kopongo ragili igondo' Io po minintalang ra maamaya' Nano ondo' suang olo'-olo' limo ngaatus ngaulun. Kasuangan nilono lakat ayuk poyo maayag, kaa' kukula' ngaulun minatoi noyo boo.

⁷Kopongo ragili minintalang Io poyo ri Jakubus am tauli no ra ngaangai' ru rasul-rasul Nano.

⁸Pupus toojo minintalang Io niayuk raki' — aku ti ondo' kalo nakarampot Riso am tauli boo nasauk ra rasul.

⁹Aku no rasul ru Tuhan ondo' nakatauli toojo. Aku kalo maaya' piawon ra rasul, sabap ra nangimbolo' aku ra pasimpungan ulun Kristian.

¹⁰Kaa' kataawan ri Aki Kapuuno' niayuk ondo' nampasauk raki' ra osoi aku raino ti. Am kataawan Nano kalo niayuk nalubat. Kaa' sotopot no aku ondo' nangandoi toojo ka ngaangai' rasul ra bokon. Kaa' ginio noyo sala' ka aku galama', kaa' kataawan ri Aki Kapuuno' ondo' nangandoi nabaya' raki'.

¹¹Ginio sabap — ra intor raki' kia kapoam rasul ra bokon nangapuan min ra Tanou Moonsoi no — ginio kalo maatang, ondo' ayuk am atan pinasaboi mai raginio inintopot min.

¹²Mampatanou akai no ra i Kristus binayag saguli' intor ra kapatayan. Kaa' kua mokoondo' poyo intor ramuyun no mindagu ra ulun ondo' minatoi noyo kalo boo bayagon saguli'?

¹³Amon ru motopot ra ulun kalo boo bayagon saguli', arati' no i Kristus pana kalo binayag saguli'.

¹⁴Amon ru i Kristus kalo binayag saguli' intor ra kapatayan, kolondo' rondo' pana potonowon mai, am niayuk kolondo' rondo' pana intopoton min.

¹⁵Mulu' poyo amon ru ginio motopot, ilain ayuk koson magabau akai. Sabap ra mampatanou akai no ra i Aki Kapuuno' namayag saguli' ri Kristus intor ra kapatayan. Amon ru motopot ra ulun minatoi kalo bayagon saguli' intor ra kapatayan, i Kristus pana kalo binayag saguli'.

¹⁶Sabap ra amon ru ulun minatoi kalo bayagon saguli', i Kristus pana kalo niayuk binayag saguli'.

¹⁷Amon ru i Kristus kalo binayag saguli', pangintapatan mino kolondo' onong, am niayuk akau lakat ayuk poyo kuasaan ru tula.

¹⁸Arati' no poyo ra ulun Kristian ondo' minatoi pana kolondo' boo kalansanan.

¹⁹Amon ru malansan takau ri Kristus ra kaayagan takau giti ra tana' ti ayuk,[18] itakau noyo malaat nasip intor ra ngaangai' ulun ru tana' ti.

²⁰Kaa' motopot toojo ra i Kristus binayag noyo saguli' intor ra kapatayan. Ginio noyo puun ru kalansanan takau ra ulun ondo' minatoi noyo bayagon saguli'.

²¹Sabap ra itakau matoi sabap ra binaal ru sangulun ayuk, mogondo' niayuk ra itakau bayagon saguli' intor ra kapatayan sabap ra binaal ru sangulun ayuk.

²²Ginio boo ra itakau ulun mapandai matoi sabap ra nakaaya' takau ra tula ri Adam; am koson niayuk ra itakau ngaangai' ti bayagon saguli' sabap ra nakaaya' takau ri Kristus.

²³Kaa' sigagama' bayagon saguli' sumugut ra pangaruan Nano; kasaa' i Kristus; am tauli no paat ra Io matong saguli', bagu no ulun ondo' mangintopot Riso no.

²⁴Mopongo raginio, masauk pamupusan ru tana' ti. Paat raginio i Kristus mamuso ra ngaangai' ondo' maningganai, ondo' manguasa' am ondo' mamarinta ra tana' ti; am kuasa' Nano galama' koson ra raja' pataakon No ri Aki Kapuuno', Ama' takau.

²⁵Sabap ri Kristus musiti' mamarinta saboi ngaangai' pantula' Nano patindukuon ri Aki Kapuuno' Riso.

²⁶Pantula' ondo' pusoon ra pupus no, ioginio kapatayan.

²⁷Sabap ra mokoondo' tinulisan ra Buuk Kitab, “Ngaangai' ulun pinatinduku' noyo ri Aki Kapuuno' Riso.” Kaa' i Aki Kapuuno' galama' kalo tuminduku' ri Kristus, sabap ra Io no ondo' mapatinduku' ra ngaangai' ulun Riso.

²⁸Pakatinduku' noyo ngaangai' ulun Riso, ioginio ra Anak Nano, i Kristus galama' tuminduku' ri Aki Kapuuno'. Gili boo i Aki Kapuuno' galama' mamarinta ra ngaangai' ulun.

²⁹Raino, amon ru ulun minatoi kalo bayagon saguli', kua mokoondo' nai ulun makiriu' koson ra alig ru ulun ondo' minatoi noyo? Atan onong ru ginio? Amon ru motopot ulun minatoi kalo boo bayagon saguli', atan onong makiriu' ilo koson raginio?

³⁰Am atan pakuan mai magail ayuk makauma' ra kapaganan?

³¹Pabukat kau ngaangai', moonong orou aku makauma' ra baal makapatoi. Mindagu aku koson raginio sabap ra maansukan aku ra kaayagan mino ra nangintopot kano ra Tuhan takau, i Jisus Kristus.

³²Kolondo' onong aku gumula' ra ulun malaat giti ra bandar Ipisus, amon ru ampos no kaayagan ru tana' ti ayuk. Amon ru ulun minatoi kalo bayagon saguli', moonsoi maya' takau ra abig ragitio; “Ibok! Akan, inum am rumamai takau, sabap ra susuab matoi takano.”

³³Pai' kau karuung ru ulun. Pangkubayawan ra malaat mampakalaat ra paliso moonsoi.

³⁴Tandaa' noyo pangkaraan mino, am pai' boo pambaal ra tula. Sotopot no mauyu' kau ra mokoondo' intor ramuyun ondo' lakat ayuk poyo kalo makaulig ri Aki Kapuuno'.

³⁵Mokoondo' lair mangkuot ra, “Ati kulaan ulun namagatoi bayagon saguli'? Ati kulaan baal ru inan ondo' pataakin risilo paat ra ilo bayagon saguli'?”

³⁶Sasambungon kau toojo! Paat ra akau mantanom ra rorondo' unor, kalo tumuu' sampug no amon ru kalo mapasa' galing kulapa' ru unor no.

³⁷Ondo' tinanom mino, maampon ru gandum kapoam bokon, io no unor nati ayuk, sala' ka tutuu' nano, ginio tumuu' ayuk ra maagu no.

³⁸Kaa' i Aki Kapuuno' galama' ondo' mangaru' ra ati kulaan baal ru tutuu' no, sumugut ra pagilangan am kasagaan Nano galama'. Moonong tutuu' aniin No ra baal nilai no sigagama'.

³⁹Koson niayuk ngaangai' ondo' makapainawo no kalo nogondo' inan. Inan ru ulun sala', inan ru maayag ru lantur sala', inan ru susuit sala' am inan ru papait sala' poyo.

⁴⁰Mogondo' ra atan ondo' binaal ri Aki Kapuuno' giu' ra limbowon am giti ra tana' ti. Ondo' giu' ra limbowon sigagama' mokoondo' ra kinoonsoi nilai no galama', am ondo' giti ra tana' ti pana sigagama' mokoondo' ra kinoonsoi nilai no galama'.

⁴¹Mato ru orou makakinoonsoi galama', bulan pana makakinoonsoi galama' am koson niayuk ra butitin makakinoonsoi galama'. Am kinoonsoi ru rorondo' butitin kalo niayuk nogogondo'.

⁴²Koson niayuk raginio baal ru ulun namagatoi paat ra ilo bayagon saguli'. Inan ra lobongon mapandai malagas; kaa' inan ondo' bayagon saguli', mantilayun.

⁴³Paat ra io lobongon, baal ru inan no mapasa' am malawo; kaa' paat ra bayagon saguli', baal ru inan no moonsoi am maikang.

⁴⁴Ondo' lobongon, iono inan ondo' intor ra tana', kaa' ondo' bayagon saguli', iono inan intor ra suruga'. Amon ru mokoondo' inan intor ra tana', mokoondo' niayuk inan intor ra suruga'.

⁴⁵Koson ra tinulisan ra Buuk Kitab, “I Adam noyo ulun kasaa' inangun ra makapainawo”, kaa' i Adam ra pupus no, ioginio Ambiluo ondo' mampakaayag.

⁴⁶Ondo' kasaa' inangun am inan intor ra tana', am tauli ayuk boo inan intor ra suruga' no.

⁴⁷I Adam kasaa' binaal intor ra tana', kaa' i Adam kainduo no, intor ra suruga'.

⁴⁸Ulun-ulun ru tana' ti mogondo' ri Adam kasaa', inangun intor ra tana', kaa' ulun ru suruga' mogondo' Riso ondo' minatong intor ra suruga'.

⁴⁹Koson niayuk itakau raino mogondo' ri Adam ondo' binaal intor ra tana', kaa' maagu no itakau mogondo'[19] Riso ondo' intor ra suruga' i.

⁵⁰Pabukat kau ngaangai', ondo' kon kuli ra inan takau, iono kual am raraa', kalo makasubol ra Tana' Bagu ri Aki Kapuuno';[20] sabap ra inan ondo' mapandai mapuso no kalo noyo mantilayun.

⁵¹Rongogo', balain takamin ondo' kalo igondo' pinabala': Kalo ngaangai' takau matoi, kaa' pulali' kon ayuk itakau kulawon.

⁵²Koson ra sangkuliop ayuk, paat ra bujung ra pupus no samputin, ulun namagatoi bayagon saguli' mabaya' ra inan mantilayun, am itakau ti pana kulawon.

⁵³Ginio ra inan takau ra mapandai mapuso ti musiti' aligin ra inan ondo' kalo mapandai mapuso.

⁵⁴Paat ra ondo' mapuso no maaligan ra mantilayun, ioginio ondo' matoi maaligan ra kalo matoi, am masugut boo ragu ru Buuk Kitab ra, “Kapatayan mapuso noyo; namanang noyo i Aki Kapuuno'.”

⁵⁵“Alii kapatayan, ati boo kamanangan muli? Alii kapatayan, ati boo kuasa' muli?”

⁵⁶Kapatayan no makakuasa' ra ulun sabap ra makatula ilo, am makatula ilo sabap ra kalo sumugut ilo ra Ukum ri Musa.

⁵⁷Kaa' paringkuanangan ri Aki Kapuuno' ra pinamanang takano ralalom inggalan ru Tuhan takau, i Jisus Kristus!

⁵⁸Pabukat kau ngaangai' ondo' tagamin ku, ingkotog kano am ikango' toojo pangintapatan mino. Pirot kano pangandoi ra Tuhan, sabap ra nakapandai kano ra kandoi mino Riso kalo noyo malubat.