Read Timugon Murut 1 KORINTUS 3 Bible Online

1 KORINTUS 3 - Timugon Murut bible

1 KORINTUS 3

¹Pabukat kau ngaangai', sotopot no ragili kalo nakaindagu aku ramuyun koson ra ulun ondo' nokoowot ra Ambiluo ri Aki Kapuuno'. Kaa' rinagu ku ayuk ramuyun koson ra ulun ondo' maayag sumugut ra kasagaan ru tana' ti, ioginio kalo maikang pangintapatan mino ri Kristus.

²Ginio nai ra koson ra susu' ayuk pinataak kuno ramuyun, sala' ka koson ra akanon ondo' mapagon sapaan, sabap ra kalo poyo nasukor kau toojo koson mangapu raginio. Am raino pana lakat kau ayuk poyo kalo makaapu ra pangilaan malandom ti.

³Sabap ra paliso mino lakat ayuk poyo koson ra ulun ru tana' ti. Mangusolon am mansasangor kau ra rondo' am bokon. Sala' kia ka gitio mampakito ra kaayagan min lakat ayuk poyo sumugut ra paliso ru ulun ondo' kalo makaulig ri Aki Kapuuno'?

⁴Amon ru mokoondo' mindagu ra, “Maya' aku ri Paulus,” am bokon mindagu ra, “Maya' aku ri Apolos,” sala' kia ka paliso mino koson ra ulun makatula?

⁵Sotopot no, osoi i Apolos no? Am osoi poyo Aku? Akai ulipon ayuk ri Aki Kapuuno', ondo' nangkimait ramuyun mangintopot ri Kristus. Akai sigagama' maya' ayuk ra ondo' pakandayin ru Tuhan.

⁶Aku mantanom am i Apolos manguas, kaa' i Aki Kapuuno' galama' mapatuu' ra tatanom no.

⁷Sala' ka ulun ondo' mantanom kapoam manguas no maatang. Kaa' i Aki Kapuuno' ayuk maatang, sabap ra Io noyo mapatuu' ra tatanom no.

⁸Ginio ra ondo' mantanom am ondo' manguas mogondo' ayuk; sabap ri Aki Kapuuno' mangani' ra ampos ra moonong ulun sumugut ra kandoi nilono sigagama'.

⁹Akai masisinggau' mangandoi ri Aki Kapuuno'; am akau koson ra umo Nano. Koson ra tinambalayan kau niayuk ri Aki Kapuuno'.

¹⁰Maya' ra kapintaran ondo' pinataak ri Aki Kapuuno' raki', aku noyo nambaal ra turungan ru lugu' am ulun boo ra bokon manunggul panambaloi. Kaa' musiti' pagilalain ru moonong ulun ati kulaan io manunggul ra kandoi ti.

¹¹Sabap ri Aki Kapuuno' galama' nangatang ri Jisus Kristus ti rorondo' ayuk puun ru panambalayan no.

¹²Kaa' mansalinut poyo kuliamos pananambaloi ru ulun; mokoondo' intor ra mas, pirok am poyo batu parmata. Kaa' mokoondo' poyo manambaloi ayuk intor ra tataun, sakot ra mapua' kapoam rami.

¹³Kaa' bonsoi ru kandoi ru moonong ulun no makito niayuk paat ra orou ratangan saguli' ri Kristus. Sabap ra paat raginio, kandoi ru moonong ulun makito am bonsoi ru kandoi nano pana kinamin ru apui.

¹⁴Amon ru pangilaan nano tumaan ra pangkinaman ti, ulun ragitio mokoowot ra ampos.

¹⁵Kaa' amon ru kandoi ru ulun no mosolob, matatakan io raginio; kaa' io galama' bayagon koson sangulun magiru' intor ra baloi mosolob.

¹⁶Kalo kia nakapandai kau ra akau koson ra baloi ri Aki Kapuuno' am Ambiluo Nano sumimpung ramuyun.

¹⁷Osoi ayuk mampalunsai ra baloi ri Aki Kapuuno', io pana lunsayon ri Aki Kapuuno'. Sabap ra matulai toojo ayanan ri Aki Kapuuno' am akau noyo ayanan Nano.

¹⁸Pai' sasangulun pana miruruung galama'. Amon ru mokoondo' intor ramuyun makapangkaraan ra mapintar io sumugut ra pagilangan ru ulun ru tana' ti, moonsoi ulun no mangkara' ra io sasambungon, am maa' raginio totopot io mapintar.

¹⁹Sabap ra ondo' karaan ru ulun ru tana' ti ra mapintar, karaan ri Aki Kapuuno' ra sasambungon. Sabap ra mokoondo' tinulisan ra Buuk Kitab, “Linandak ri Aki Kapuuno' ulun mangapintar ra kapintaran nilo galama'.”

²⁰Mokoondo' poyo tinulisan ra Buuk Kitab, “Nakapandai i Aki Kapuuno' ra pangkaraan ru ulun mangapintar kolondo' onong.”

²¹Sabap raginio, pai' kau limbau ra kapandayan ru ulun, sabap ra ngaangai' no pinataak noyo ramuyun ri Aki Kapuuno':

²²Aku, i Apolos, am i Pitrus pana pinataak noyo ramuyun. Am niayuk tana' ti, kaayagan kapoam kapatayan, am poyo paat ra raino ti am paat ra orou matong pana. Ngaangai' no akau noyo tatangan.

²³Am akau i Kristus noyo tatangan, am i Kristus no i Aki Kapuuno' noyo tatangan.