Read Timugon Murut 2 KORINTUS 11 Bible Online

2 KORINTUS 11 - Timugon Murut bible

2 KORINTUS 11

¹Malansan aku ra pokoorot kau raki' kabalu' pana raino ilain ayuk ra sasambungon aku koborok. Maaru' moorot min.

²Maayo guang kuno ramuyun am i Aki Kapuuno' pana koson raginio. Akau ti karaan koson ra ralaa mapasau toojo ondo' pawatin ku ra rondo' ayuk toojo ungkuyon, ioginio i Kristus.

³Maimamang aku ramuyun ra maampon kinulau lair pampagagayaan min ri Kristus, mogondo' ri Awa, ondo' ra galing i rinuung ru kukuo ra maabau-abau i.

⁴Nailian takamin ra maluoi kau manguma' ra osoi ayuk matong mampabala' ra i Jisus, kaa' kalo mogondo' ra atan ondo' pinatanou maili. Mangapu kau niayuk ra ambiluo am tanou moonsoi ra bokon ondo' sala' ka toojo Ambiluo ri Aki Kapuuno' am Tanou Moonsoi ondo' inapu min noyo intor ramon.

⁵Kaa' guang ku kalo niayuk nakatauli aku intor ra “rasul” ondo' kinaatang mino.

⁶Mailo aku lair mampabala' ramuyun, kaa' kapandayan kuno ra Tanou Moonsoi malandom toojo, am ginio pinaintutun mai noyo toojo ramuyun.

⁷Paat ra aku nampabala' ra Tanou Moonsoi ramuyun kalo nakibalos aku ra atan-atan. Ginio binaal kuno ra guang minggana' koson mangurumat ramuyun. Nakasala aku kia? Kalo!

⁸Koson ayuk boo ra nangingkaut aku ra pasimpungan ulun Kristian ra bokon no ondo' nampagaji' raki', maa' raginio makapangandoi aku ramuyun.

⁹Kalo igondo' aku pantipagon ramuyun, kabalu' pana ragili kolondo' ruit kutu; pabukat Kristian ondo' minatong intor ra pagun ru Makidonia noyo nangindangan pangani' ra atan ondo' kalo maukop raki'. Intor poyo ragili am suku' ra orou matong pana kalo noyo mantipagon aku ramuyun!

¹⁰Sabap ra katapatan ri Kristus ondo' intopoton kuno,[12] nambantu' aku ra kolondo' sangulun kon pana ra titikop pagun ru Akaya makapanginga' raki' mindagu koson raginio.

¹¹Kua indagu aku koson raginio? Sabap ra aku kalo motogom ramuyun? Sala'. Nakapandai i Aki Kapuuno' ra motogom aku ramuyun.

¹²Atan ondo' baalon kuno raino, ginio ayuk rayuson kuno, maa' raginio “rasul” ra bokon no kolondo' boo sasaban lumimbau am mindagu rokoon ra mangandoi ilo koson ramon.

¹³Sabap ra ilo ti sala' ka rasul ra motopot. Maabau-abau am sumalu ilo ti ra rasul ri Kristus ondo' motopot.

¹⁴Ginio kalo makaimuag! Tingganai ru riwato pana makasalu ra malaikat ri Aki Kapuuno' ondo' makasinda.

¹⁵Ginio nai ra kalo niayuk makaimuag amon ru ulipon-ulipon ru Tingganai ru riwato no sumalu ra ulipon ru katapatan.[13] Pupus no balasin ilo maya' ra ondo' binaal nilai no.

¹⁶Sagulio' ku poyo: pai' pangkara' ra aku ti sasambungon. Kaa' amon ru ginio poyo pangkaraan min, polosoo' noyo aku ondo' sasambungon ti lumimbau koborok.

¹⁷Amon ru lumimbau aku koson raginio, ginio sala' ka intor ra Tuhan, kaa' sumugut ra paliso ru ulun sasambungon.

¹⁸Masuang toojo ulun lumimbau ra kinaatang nilai giti ra tana' ti, ginio nai ra aku galama' pana masaga' lumimbau.

¹⁹Maansayan kau ra guang mataan ra ulun sasambungon no, sabap ra akau ti rokoon mapintar toojo.

²⁰Polosoon min ilo mangulipon, mangingkaut, mamparuung, magasab am mampakauyu' ramuyun.

²¹Balain takamin toojo: kalo sama' akai tumilu risilo! Amon ru makakau' ilo lumimbau, aku pana makakau'! (Sasambungon aku mindagu koson raginio.)

²²Konilo ra ulun ilo ru Jaudi. Aku pana! Kon poyo, pagun nilono Israil. Iou, mogondo' raki'! Ragu nilo poyo ra papag ilo ri Abragam. Ba, aku niayuk!

²³Konilo ra ulipon ilo ri Kristus, kaa' mulu' poyo aku ka ilo, kabalu' pana mantuyang lair iningon ragu kutu. Aku ondo' mapirot toojo mangandoi ka ilo ngaangai'. Magail aku ayuk pasubolon ra pangaputan. Magail aku niayuk loposon. Magail aku ayuk makauma' ra baal makapatoi.

²⁴Inlimo aku no loposo' ru ulun ru Jaudi ra pitol lalapos, am moonong igondo' linapos aku intalu ngoopor am siam.

²⁵Intalu aku niayuk linapos ru ulun ru Roma; am igondo' aku bobolo' ra batu. Intalu aku pakaili' ra kapal nakalom, am igondo' aku no nakalabui ra tatanga' ru raat buoi songorou am sorondom.

²⁶Buoi ra pangkiralanan kutu, magail aku ayuk makakapaganan; masakaban am matakawan, inuupan aku ru ulun ru Jaudi am niayuk ulun sala' ka Jaudi. Makakapaganan aku ra bandar, liwar ru bandar am niayuk giu' ra raat, am poyo tinipagon aku ru ulun ondo' migiangku ra ilo Kristian.

²⁷Mirot aku mangandoi suku' matipatoi; malukou aku am magail kalo maukop akanon kapoam inumon; magail aku ayuk maitilan, masimuan am poyo kolondo' ralinan kapoam ayanan.

²⁸Am makakapaganan poyo bokon, koson ra moonong orou maimamang aku ra atan masauk ra ngaangai' pasimpungan ulun Kristian.

²⁹Amon ru sasangulun no malawo, aku pana makaliman ra kalawaan no. Amon ru sasangulun no makatula, aku pana mangiluk toojo guang.

³⁰Amon ru lumimbau aku, moonsoi lumimbau aku ra atan ondo' mampakito ra kalawaan kuno.

³¹I Aki Kapuuno', Ama' ru Tuhan Jisus, nakapandai ra kalo magabau aku. Koompor inggalan Nano ra sabuoi-buoi no.

³²Paat ra aku soroi ra bandar Damsyik, gabenor ru raja' Aritas nanusub ra saujor-saujor nano magawang ra moonong umpasan ru bandar i koson mamparakop raki'.

³³Kaa' intor ra rondo' gigimpalan ra timbok i pinatuun aku ra rondo' bakul, gili boo nakapagiru' aku intor ra gabenor i.