Read Timugon Murut 2 KORINTUS 13 Bible Online

2 KORINTUS 13 - Timugon Murut bible

2 KORINTUS 13

¹Gitio noyo kaintalu ra aku mongoi ramuyun. Tinulisan noyo ra Buuk Kitab, “Atan ayuk panguwan, musiti' mokoondo' ruo kapoam talu ngaulun sasi'.”

²Paat ra aku minongoi ramuyun ra kainduo i, nampakara' aku toojo ramuyun ngaangai' ra mangukum aku risilo ondo' kalo lumonggo' mambaal ra tula. Raino maalur aku ramuyun, kaa' sagulio' ku poyo, paat ra aku makasuku' ra kaintalu ti kolondo' makapagiru' intor ra pangukuman.

³Makaapu kau niayuk ra inono' ondo' gogoton mini ra topot-topot i Kristus mindagu mansail raki'. Paat ra Io mampatanda' ramuyun, kalo malawo Io, kaa' mampakito Io ra kuasa' Nano ramuyun.

⁴Kabalu' pana malawo Io paat ra Io sinalip, kaa' raino naayag Io po sabap ra kuasa' ri Aki Kapuuno'. Ralalom pasimpungan mai Riso pana makaliman akai ra malawo, kaa' paat ra akai makauma' ramuyun, akai pana maayag sabap ra kuasa' ri Aki Kapuuno', mogondo' ri Kristus.

⁵Kinami' min noyo guang mino koson magilong ra mangintopot kau kapoam kalo. Maaru' nakapandai kau ri Jisus Kristus soroi ramuyun, ondo' ak am ru kalo boo mangintopot kau.

⁶Kaa' malansan akai ra nakapandai kano ra akai ti totopot rasul.

⁷Makiasi' akai ri Aki Kapuuno' koson indanganon kau kalo mambaal ra sala. Ondo' maatang am mambaal kau ra kasagaan ri Aki Kapuuno' am makapambaal kau ra motopot. Kalo pana amon ru akai ilain ayuk ra kalo matanda' mangandoi.

⁸Sabap ra kalo makaanggal akai ra katapatan no, kaa' minsugut ayuk.

⁹Maansayan akai amon ru malawo akai am akau maikang. Makiasi' akai ri Aki Kapuuno' koson tumanda' kau boo toojo.

¹⁰Ginio nai ra aku nanulis ra surat ti paat ra aku maalur ramuyun; maa' raginio ra aku mongoi ramuyun ra maagu no, kalo pana boo malasang ragu kuno ramuyun sumugut ra kuasa' ondo' pinataak raki' ru Tuhan — kaa' sala' ka kuasa' koson mamuso, kaa' mampaikang ra pangintapatan min.

¹¹Pupusin ku pabukat kau ngaangai', tumoojo kau! Pirot kano toojo tumanda' am rongogo' noyo bilin kutu. Pogogondoo' noyo guang min am koonsoi kano ra rondo' am bokon. Gama' ru i Aki Kapuuno' ondo' monogom am manaak ritakau ra pabansayan mabaya' ramuyun.

¹²Paat ra akau manguma' ra pabukat Kristian indagu kano ra kaansayan mabaya' ra guang mapasau. Ngaangai' ulun ri Aki Kapuuno' pana mampasaboi ra kaansayan nilo ramuyun.

¹³Gama' ru Tuhan Jisus Kristus mambarakat ramuyun, i Aki Kapuuno' monogom ramuyun am niayuk pasimpungan ru Ambiluo ri Aki Kapuuno' mabaya' ramuyun ngaangai'.