Read Timugon Murut 2 KORINTUS 9 Bible Online

2 KORINTUS 9 - Timugon Murut bible

2 KORINTUS 9

¹Sotopot no kalo boo pana mamatik aku ramuyun intor ra ruit paindanganon pataakin ra ulun ri Aki Kapuuno' ra Jirusalim.

²Nakapandai aku ra akau masaga' mangindangan. Koson ragitio ompor kuno ramuyun ra ulun ru Makidonia ra aku minindagu risilo, “Pabukat min ra Kristian ra pagun ru Akaya nakatampos noyo kalalair ra taak nilai intor ra sambilaran i.” Kinataau min ti noyo nampakapirot ra guang ru kasuangan nilai.

³Raino poongoyon ku i Titus am ruo ngaulun ungkuyon i, maa' raginio ompor maili ramuyun sala' ka raragu ayuk, kaa' motopot ondo' rinagu kuli ra nakatampos kano mangindangan.

⁴Ati boo kulaan amon ru mokoondo' ulun ru Makidonia ti mabaya' raki' mongoi ramuyun, am ilai' nilo ra kalo niayuk nakatampos kau. Mumpara' boo uyu' mai, kaa' mulu' piboo uyu' min, sabap ra nakalansan akai ramuyun.

⁵Ginio nai ra aku nampaguang ra moonsoi poongoyon ku talu ngaulun i ramuyun magulu intor raki', maa' raginio makatampos kau ra ruit paindanganon ondo' binantu' min i. Kon boo raginio nakatampos noyo ruit paindanganon mino ra aku makasuku'. Ginio koson mampakito ra mangani' kau maya' ra kinataau ru guang min, am sala' ka najajalan kau.

⁶Karaa' min! Ulun ondo' sanganu ayuk sampug tiason no, sanganu niayuk kumoson no. Kaa' ulun ondo' masuang sampug tiason no, masuang niayuk kumoson no.

⁷Pangani' kano sumugut ra ondo' inaru' mino. Pai' min paginduoon guang min mangani', kapoam koson ra jajalin kau, sabap ri Aki Kapuuno' motogom ra ulun ondo' mangani' intor ra guang maansayan.

⁸Kalo lumonggo' i Aki Kapuuno' mambarakat ramuyun, maa' raginio akau galama' masalok maukapan am malabaan kau niayuk koson makapangani' ra osoi ayuk makakaatangan raginio.

⁹Tinulisan noyo ra Buuk Kitab, “Tatayaro' No ra ulun musikin, am kinataau ru guang Nano[10] mantilayun.”

¹⁰I Aki Kapuuno' noyo mangani' ra sampug ra ulun mapatias am poyo akanon ru itakau ulun. Io niayuk ondo' mangani' am mampatuu' ra tiniasan mino suku' rumuang ampos no, maa' raginio makapangani' kau ra ulun bokon.[11]

¹¹I Aki Kapuuno' mangani' ramuyun ra kaukapan suku' makapangani' kau ra ulun bokon, am koson raginio masuang ulun maringkuanang ri Aki Kapuuno' sabap ra ruit paindanganon ondo' tinaakan min mumbaya' ramon.

¹²Pangindangan minti sala' ka pangingiru' ayuk ra kapaganan ru ulun ri Aki Kapuuno' giu' ra Jirusalim, kaa' niayuk mangkinibit ra ulun masuang maringkuanang ri Aki Kapuuno'.

¹³Masuang ulun Kristian ra Jirusalim mongompor ri Aki Kapuuno' sabap ra indangan min, am ginio mampakito ati kulaan pampagagayaan min ra Tanou Moonsoi ri Kristus ondo' pabalaan min. Mongompor ilo poyo ri Aki Kapuuno' sabap ra kinataau ru guang min, saboi ruit min tinayar-tayar risilo am poyo ra ngaangai' ulun ra bokon.

¹⁴Ginio ra moondom ilo ramuyun, am ra moonong pakiasian nilai mangkara' ilo ra ati kulaan gayo ru kataawan ri Aki Kapuuno' no ramuyun.

¹⁵Paringkuanang takano ri Aki Kapuuno' sabap ra taak Nano ondo' kalalabaan ayuk.