Read Timugon Murut GALATIA 2 Bible Online

GALATIA 2 - Timugon Murut bible

GALATIA 2

¹Kopongo mopor am apat ngambilor, siminaguli' aku poyo ra Jirusalim nabaya' ri Barnabas am pinaaya' niayuk i Titus.

²Minongoi aku ra Jirusalim maya' ra nanusuban ondo' pinatalang ri Aki Kapuuno' no raki'. Ralalom pagugumaan mai ra tingganai ru Kristian ayuk, pinabala' ku toojo risilo Tanou Moonsoi ondo' pinasaboi kuno ra ulun sala' ka Jaudi. Marara' aku ra ondo' pinasaboi ku noyo kapoam ondo' posoboyon kutu malubat ayuk.

³Kaa' i Titus pana, rangan kuno ondo' ulun ru Junani, kalo niayuk jinajalan nilo sunatin,

⁴kabalu' pana ginio gogoton ru ulun migiangku ra Kristian ondo' liminatok ramon. Giminogot ilo pangimumui ra kalabusan ondo' noowot mai intor ri Jisus Kristus. Nangkinam ilo mangulipon poyo saguli' ramon,

⁵kaa' kalo noyo kiminuku' akai risilo, maa' raginio maalungan mai kapasawan ru Tanou Moonsoi no ramuyun.

⁶Kaa' koson ilo ondo' karaan tingganai ru Kristian, kalo nangulau ilo ra pangilaan kutu. Sotopot no kalo pana nakiiou aku risilo sabap ra itakau ulun ti mogondo' ayuk ra pagilangan ri Aki Kapuuno'.

⁷Io pana nangiou niayuk ra aku ti noyo sinusub ri Aki Kapuuno' mampasaboi ra Tanou Moonsoi no ra ulun sala' ka Jaudi, mogondo' ri Pitrus sinusub ri Aki Kapuuno' mampatanou raginio ra ulun ru Jaudi.

⁸Sabap ra kuasa' ri Aki Kapuuno', sinauk aku ra rasul tayar ru ulun sala' ka Jaudi, koson ri Pitrus niayuk sinauk ra rasul tayar ru ulun ru Jaudi.

⁹I Jakubus, Pitrus am i Juanis ondo' karaan ra tingganai, nangiou ilo ra aku sinusub ri Aki Kapuuno' mambaal ra kandoi maatang ti. Ginio ra sikin ilo raki' am niayuk i Barnabas. Ginio tatandu' ra rondo' guang mai mangandoi, aku am i Barnabas mampatanou ra ulun sala' ka Jaudi, liliwa' ilo mampatanou ra ulun ru Jaudi.

¹⁰Rondo' ayuk kinitaak nilai, ra akai musiti' mangindangan ra ulun musikin ra Jirusalim. Gitio noyo ondo' piroton[3] kuno toojo baalo' ra buoi ti.

¹¹Paat ri Pitrus minongoi ra Antiokia, sinawai ku io ra saang ru ulun masuang sabap ra makasala io.

¹²Ra kalo poyo nakaratong ulun ondo' sinusub ri Jakubus, giminulung i Pitrus pangakan nababaya' ra ulun Kristian ondo' sala' ka Jaudi. Kaa' pakaratong boo ulun raginio, inggalur boo i Pitrus am marara' gumulung mangakan mabaya' ra ulun Kristian ondo' sala' ka Jaudi i. Binaal no ginio sabap ra nalaa' io ra ulun ondo' mangintopot ri Kristus ondo' moogot ra ngaangai' musiti' sunatin.

¹³Ulun Kristian bansa' ru Jaudi ra bokon no pana timinilu ra binaal ri Pitrus ti. Mulu' piboo ra Barnabas niayuk nakaaya'-aya' ra paliso nilai ra kalo matanda' ti.

¹⁴Kaa' paat ra aku nakakito ra kalo minaya' ilo toojo ra katapatan ru Tanou Moonsoi no, indagu aku ri Pitrus ra saang ru ngaangai' ulun ra giu' no, “Okou ti sangulun ru Jaudi, kaa' kaayagan muno koson ra ulun sala' ka Jaudi. Amon koson poyo raginio, ati kulaan okou mampajajal ra ulun sala' ka Jaudi sumugut ra kaulayan ru ulun ru Jaudi?”

¹⁵Motopot ra akai ti papag ru ulun ru Jaudi, am sala' ka ulun makatula koson ra ulun sala' ka Jaudi.

¹⁶Kaa' mapandayan noyo ra sasangulun no mobonsoi saguli' ri Aki Kapuuno' sabap ra mangintopot io ayuk ri Jisus Kristus, am pai' ru maya' ra Ukum ri Musa. Akai pana nangintopot ri Jisus Kristus, maa' raginio mobonsoi akai saguli' ri Aki Kapuuno' sabap ra pangintapatan mai ti, am sala' ka maya' ra Ukum ri Musa. Kolondo' sangulun pana mobonsoi saguli' ri Aki Kapuuno' maya' ra Ukum ri Musa.

¹⁷Amon ru mapandayan noyo ra akai pana ulun makatula koson ra ulun sala' ka Jaudi — kabalu' pana gumogot akai makimobonsoi saguli' ri Aki Kapuuno' ralalom pasimpungan mai ri Kristus — arati' nano i Kristus kia ondo' mangkinibit ritakau makatula? Topot-topot kalo!

¹⁸Amon ru sumaguli' aku po ra susuban ru Ukum ri Musa ondo' kalo boo suguton kuno, topot ra anggalon kuno Ukum.

¹⁹Maya' ra Ukum ri Musa, aku ti naukum noyo ra potoyon — koson ra minatoi aku no — maa' raginio mobonsoi aku saguli' ri Aki Kapuuno'. Koson aku ti pinasimpung noyo ri Kristus ra salip i.

²⁰Ondo' maayag raino ti sala' ka aku, kaa' i Kristus ondo' soroi ralalom kaayagan kuno. Sauk ru kaayagan kuno raino ti intor ra pangintapatan kuno ra Anak ri Aki Kapuuno' ondo' motogom raki' am nampataak ra painawo Nano sabap ra aku.

²¹Kalo noyo lilianin ku asi' ri Aki Kapuuno' ti. Amon ru sasangulun no mobonsoi saguli' ri Aki Kapuuno' sumugut ra Ukum ri Musa, arati' no pinatayan ri Kristus i kolondo' noyo onong!