Read Timugon Murut GALATIA 5 Bible Online

GALATIA 5 - Timugon Murut bible

GALATIA 5

¹Itakau raino mokoondo' noyo ra kaluagan sabap ra pinalabus takano ri Kristus! Intor raginio, porondon kau ra kaluagan no, am pai' kau kasaga' uliponon poyo saguli'.

²Rongogo' min, aku i Paulus ondo' mindagu ti: Amon ru makisunat kau, kolondo' boo toojo onong i Kristus no ramuyun.

³Igondo' poyo aku mampakara' ramuyun: Osoi masaga' sunatin, ulun no musiti' mampagagaya' poyo ra ngaangai' ru Ukum ri Musa no!

⁴Akau ondo' mangkinam mobonsoi saguli' ri Aki Kapuuno' mumbaya' Ukum ri Musa no, ginio mogondo' ayuk ra ukaton min boo pabukatan min ri Kristus am kalo boo makaapu kau ra asi' ri Aki Kapuuno'.

⁵Kaa' akai, malansan ayuk ri Aki Kapuuno' noyo mopobonsoi saguli' ramon Riso sabap ra pangintapatan mai. Ginio noyo inaanin mai ralalom ru kuasa' ru Ambiluo ri Aki Kapuuno'.

⁶Paat ra itakau sumimpung ri Kristus, baal ra sunatin kia kapoam kalo, ginio kalo boo maatang. Ondo' maatang toojo, ioginio mangintopot ri Kristus, ondo' makito intor ra motogom takau ra rondo' am bokon.

⁷Ragili matanda' toojo binaal mini! Kaa' raino osoi nangkinibit ramuyun kalo boo mampagagaya' ra pangilaan motopot intor ri Aki Kapuuno'? Ati guat kulaan kau nakimaitan poyo?

⁸Maaru' ginio sala' ka intor ra kinibit ri Aki Kapuuno' ondo' nampiau ramuyun no.

⁹Maya' ra abig, “Ragi ru ruti' ra sanganu ayuk makapampagayo ra ngaangai' ru tapung ondo' nakutou no.”

¹⁰Kaa' lakat aku po mangintopot ra ralalom ru Tuhan kalo boo kumulau guang mino. Osoi ayuk pana ulun ondo' mampajajou ramuyun no, maaru' ukumin io ri Aki Kapuuno'.

¹¹Pabukat kau ngaangai', amon ru totopot ku potonowo' baal ru sunat ti, kua ra aku ti lakat poyo nai imboloon? Amon ru motopot gitio, tanou ra pinasaboi kutu intor ra salip ri Kristus kalo ga pana imuagon.

¹²Malansan aku ra ulun ondo' mampajajou ramuyun no, polosoon ilo manunat ra inan nilo saboi intaliin ilo galama'.

¹³Kaa' koson ramuyun, pabukat kau ngaangai', napiau kano masauk ra ulun nakalabus. Kaa' pai' min polosoo' kaluagan raginio mangkinibit ramuyun makatula, koson mampagagaya' kau ayuk ra kasagaan ru guang min. Ondo' ayuk am gitio; kotogom am koonsoi kano ra rondo' am bokon.

¹⁴Ngaangai' suang ru Ukum ri Musa no sinimpung kariwaa' ra rondo' ayuk panusuban, iogitio: “Kotogom no ra ngaangai' ulun koson okou monogom ra inan muno galama'.”

¹⁵Amon ru malaat kau saboi mamparuol ra rondo' am bokon, ilalai' min, amon ru kalo, makapabaya' kau ngaangai' mapuso.

¹⁶Gitio noyo kon kutu; Polosoo' ayuk Ambiluo ri Aki Kapuuno' manguasa' ra bayag min, am pai' gagayaa' kalaatan ru guang mino galama'.

¹⁷Sabap ra paliso ru ulun manggal ra Ambiluo ri Aki Kapuuno', am Ambiluo ri Aki Kapuuno' niayuk manggal ra paliso ru ulun. Karuo ruo ti mantula', saboi kalo makapambaal kau ra ondo' sotopot no kasagaan min.

¹⁸Kaa' amon ru Ambiluo ri Aki Kapuuno' maningganai ramuyun, kalo boo kinuasa' kau ru Ukum ri Musa.

¹⁹Kinibit ru paliso ru ulun nauligan noyo: Ioginio baal ru pansasawaan, baal majamol am baal makauyuyu';

²⁰sumamba ra sinungkalalaing am kapandayan ra sihir. Mangkinibit ra ulun mantutula', mansasangor, magigingot, masasangit am masaga' makiompor ra ulun, kalo mogondo' guang am mansusuai ayuk.

²¹Am mangkinibit poyo ra mangusolon, magauk, rumamai ra jajajou am mansalinut poyo. Pinakara' ku ramuyun raino mogondo' ra aku nampakara' noyo ramuyun ragili; ulun ondo' makapaliso koson raginio kalo makaliman ra Pamarintaan ri Aki Kapuuno'.[9]

²²Kaa' gitio noyo ampos amon ru ulun tingganayon ru Ambiluo ri Aki Kapuuno': montotogom ilo, maansukan, maayag ra rondo' guang ra rondo' am bokon, mataan guang, masaga' mangindangan, moonsoi guang, mampagagaya',

²³am minggana' guang am poyo mapandai mongorot. Baal koson raginio kalo iningaan ru atan ayuk pana ukum.

²⁴Am ondo' maamaya' ri Kristus Jisus, koson nasalip nilo noyo guang malaat nilai mabaya' ra ngaangai' ru kasagaan am ondo' gogoton ru guang.

²⁵Amon ru inanian takau ru Ambiluo ri Aki Kapuuno' ra kaayagan bagu; maaru' Io no musiti' manguasa' ra kaayagan takau.

²⁶Pai' takau pakiompor, mamparuol ra guang ru bokon, kapoam magusolon ra sangulun am bokon.