Read Timugon Murut GALATIA 6 Bible Online

GALATIA 6 - Timugon Murut bible

GALATIA 6

¹Pabukat kau ngaangai', amon ru marampatan min sasangulun no makasala, akau ondo' maikang toojo pangintapatan musiti' magibit ra ulun no sumaguli' ra katapatan mabaya' ra ragu mamunduk riso. Am ilalai' min galama' ra akau pana kalo matiu' ru pangkinaman.

²Pangindangan kano ra rondo' am bokon. Am koson ragitio noyo akau gumagaya' ra[10] susuban ri Kristus.

³Amon ru sasangulun mangkara' ra io no maatang, am sotopot no kalo, io galama' ayuk miruruung.

⁴Moonong sigagama' musiti' ilain toojo ra paliso nano galama'. Amon ru moonsoi paliso no, bagu no maansukan io ra atan kandoi nano, am kalo pana makimogondo' ra bokon,

⁵sabap ra moonong ulun mokoondo' noyo ra kandoi nano sigagama'.

⁶Moonsoi niayuk ru ulun ondo' ilaan ra pangintapatan ru Kristian, mantayar ra atan ayuk mokoondo' riso no ra mangingila' nano.

⁷Pai' kano miruruung. Kolondo' sangulun pana makapamparuung ri Aki Kapuuno'. Ondo' tonomon ru sasangulun, ginio niayuk kumoson nano.

⁸Amon ru sumugut io ra kasagaan nano galama', ioginio koson mantanom ra sampug malaat, kapatayan ondo' kumoson nano. Kaa' amon sumugut io ra kasagaan ru Ambiluo ri Aki Kapuuno', ioginio koson mantanom ra sampug moonsoi, kaayagan mantilayun no ondo' kumoson nano.

⁹Ginio ra, pai' takano kajala' mambaal ra ondo' moonsoi. Sabap ra amon ru kalo malawo guang takau, masuku' niayuk paat ra itakau mangkumos ra ampos nano.

¹⁰Intor raginio, buoi ra itakau makakaluagan, alapo' takau noyo ginio koson mobobonsoi ra moonong ulun, mulu' poyo risilo ondo' makimambukat takau mulu' poyo ra mogondo' pangintapatan.

¹¹Ilai' min noyo ati kulaan gayo ru tinulisan kutu galama'!

¹²Ulun ondo' lumimbau ra baal ondo' makito ru ulun, ilo ti noyo ondo' mompogogot ramuyun ra sunatin. Mambaal ilo ayuk koson raginio bagu kalo boo maimbolo' ilo sabap ra namatayan ri Kristus ra salip.

¹³Kaa' ulun ondo' manginsugut ra kaulayan ru sunat no pana kalo magagaya' nilo ngaangai' Ukum ri Musa. Kabalu' pana raginio, masaga' ilo niayuk sunatin kau, maa' raginio lumimbau ilo ra ginagaya' min kaulayan raginio.

¹⁴Kaa' aku kalo noyo lumimbau. Ondo' ayuk omporon ku am namatayan ru Tuhan takau i Jisus Kristus ra salip. Sabap ra namatayan ri Kristus ra salip, kaayagan ku ra tana' ti kolondo' boo arati' no raki'. Kalo boo mangkara' aku ra baal ondo' makito ru ulun.

¹⁵Kaulayan ru sunatin kapoam kalo, ginio kalo maatang. Kaa' ondo' maatang am makakaayagan bagu.

¹⁶Am ulun ondo' mampagagaya' ra panusuban ragitio, gama' ru aniin ilo ri Aki Kapuuno' ra kaansayan am asi', am niayuk ra ngaangai' ulun ri Aki Kapuuno'.

¹⁷Ondo' pupus ti poyo, pai' noyo sangulun pana pampakapagon raki', sabap ra pipilat ru inan kutu noyo mampakito ra aku ti nanginsugut toojo ri Jisus.

¹⁸Gama' ru Tuhan takau i Jisus Kristus masalok mambarakat ramuyun ngai'. Amin.