Read Timugon Murut IPISUS 4 Bible Online

IPISUS 4 - Timugon Murut bible

IPISUS 4

¹Ginio sabap ra aku ti ondo' inaput sabap ra mangandoi ra Tuhan, makitaak toojo ramuyun ra kaayag kano maya' ra atan ondo' inaru' noyo ri Aki Kapuuno' paat ra Io nampiau ramuyun.

²Paingganaa' noyo guang min, kolomoi am kasalok kano mataan guang. Pakitono' noyo kinotogom min ra mangindangan kau ra rondo' am bokon.

³Pirot kano pagalung ra pasimpungan mino, ondo' tinaakan ru Ambiluo ri Aki Kapuuno', ralalom pabansayan ondo' mampasimpung ramuyun.

⁴Rondo' ayuk inan am rondo' ayuk Ambiluo ri Aki Kapuuno', mogondo' niayuk ra rondo' kalansanan mino ra akau piniau ri Aki Kapuuno'.

⁵Rondo' ayuk Tuhan, pangintapatan am pamariwan.

⁶Rondo' ayuk i Aki Kapuuno', Ama' ru ngaangai' ulun. Io noyo maningganai am manguasa' ra ngaangai', am sumoroi niayuk ra ngaangai'.

⁷Itakau sigagama' inanian ra kapandayan maya' ra kataawan ri Kristus.

⁸Koson tinulisan ra Buuk Kitab, “Paat ra nagaloi Io giu' ra rasawat kaga', nampaaya' Io po ra masuang ulun rinakop; am nangani' Io ra ulun ra taak.”

⁹Arati' ru “nagaloi Io giu' ra rasawat kaga'”, ioginio, kasaa' no timinuun Io ra tana' ti, am nakasuku' Io poyo ra ragana' toojo.[6]

¹⁰Io ondo' timinuun i, Io niayuk ondo' nagaloi giu' ra rasawat, ondo' masawat poyo intor ra ngaangai' limbowon, koson sumoroi Io ra ngaangai' no.

¹¹Io no nangani' ra ulun ra taak; mokoondo' sinauk Nano ra rasul am bokon no nabi; mokoondo' poyo sinauk Nano ra ulun mampasaboi ra Tanou Moonsoi, am bokon no magagalung kapoam mangingila' ra pasimpungan ulun Kristian.

¹²Gitio binaal Nano koson momongo ra ngaangai' ulun ri Aki Kapuuno' mangandoi ra Tuhan, koson mapaikang ra inan ri Kristus.

¹³Koson raginio ra pangintapatan am kapandayan takau ngaangai' ra Anak ri Aki Kapuuno' no mogondo' ayuk. Masauk takau ra ulun maikang pangintapatan, ondo' buoi-kabuoi, makatilu ra paliso ri Kristus.

¹⁴Bagu no itakau kalo boo makapaliso koson ra lalaing, ondo' lilingganon ru kinulun am sisiabin ru angin, ioginio mangintopot ra mangingila' ondo' mapandai toojo mamparuung am mampalayau ra ulun.

¹⁵Sotopot no, kalo. Mindagu takau ra katapatan mabaya' ra togom, am koson raginio makatilu takau ra paliso ri Kristus, ondo' maningganai ritakau.

¹⁶Maya' ra paningganayan Nano, moonong tayar ru inan mokoondo' noyo ra intok sigagama', am inan no matunggul toojo ru parangaban. Amon ru moonong tayar ti mambaal ra kandoi nano galama', ulun no sumukor boo, koson maikang takau boo ralalom ru togom.

¹⁷Sabap boo raginio, ralalom ru kuasa' ru Tuhan, balain takamin toojo koson ragitio: Pai' kano kaayag koson ra ulun ondo' kalo makaulig ri Aki Kapuuno', sabap ra ilo makapangkaraan ayuk ra atan ondo' kolondo' onong.

¹⁸Pangaratian nilo pana molondom. Kalo niayuk nakaliman ilo ra kaayagan ondo' taakin ri Aki Kapuuno', sabap ra kalo masaga' ilo mintutun am mokotog toojo ulu nilo.

¹⁹Kolondo' boo guang mauyu' nilo; saboi maya' ilo ayuk ra kasagaan ru inan nilo galama', io no mambaal ra atan ayuk kalaatan ondo' makauyuyu'.

²⁰Kaa' i Kristus ondo' nauligan min, sala' ka koson raginio.

²¹Naining min noyo Io, am koson ra maamaya' Nano, inila' kano ra katapatan[7] ri Jisus.

²²Sabap raginio, iruo' min noyo kaayagan ra nakalair i ondo' nangkinibit ramuyun ragili — ioginio kasagaan nakalair ondo' namuso ra paliso am nampalayau ramuyun i.

²³Talimbagui' min noyo guang am pangkaraan mino.

²⁴Sauk kano ra ulun nakabagu ondo' saukon mansalu ri Aki Kapuuno', ioginio kaayagan motopot, ondo' mabanis ra pagilangan ri Aki Kapuuno'.

²⁵Pai' kano boo pagabau! Musiti' kau mindagu ra motopot ra rondo' am bokon, sabap ra itakau ngaangai' ti makatayar noyo ra inan ri Kristus.

²⁶Amon ru sumangit kau, pai' polosoo' sangit mino mangkinibit ramuyun makatula. Pai' bulii' sangit minti suku' ra talapan ru orou.

²⁷Pai' min anii' Tingganai ru riwato no ra kaluagan mangkinam ramuyun.

²⁸Osoi ayuk mantatakou, moonsoi langgain no am mangandoi koson maginakan io galama' am niayuk makapangindangan boo ra ulun musikin.

²⁹Paat ra akau makimansunur, pai' raguo' ondo' makaruol ra guang. Indagu ayuk ra mokoonong, koson ra ragu mangila' am mangindangan, maa' raginio ondo' sinunur mino magibit ra kaansayan ra ulun ondo' mangkirongog.

³⁰Pai' noyo pangiluko' Ambiluo ri Aki Kapuuno' no, sabap ra Io sumoroi ramuyun noyo tinatanduan kau ri Aki Kapuuno' ra akau ti Io no tatangan. Ambiluo raginio noyo ondo' mapakalansan ramuyun ra matong niayuk orou pampalabusan ramuyun ri Aki Kapuuno'.

³¹Langgai' noyo paliso ra mangusolon, guang ra malaat am masasangit. Pai' kau pakimansangor kapoam magasab ra ulun. Inggalur kano ra guang ra masisang.

³²Kaa' kataau am koonsoyo' noyo guang mino ra sangulun am bokon, am ampuno' noyo rondo' am bokon, mogondo' ri Aki Kapuuno' nangampun ramuyun ralalom ri Kristus.