Read Timugon Murut IPISUS 5 Bible Online

IPISUS 5 - Timugon Murut bible

IPISUS 5

¹Tilu kano ri Aki Kapuuno' sabap ra akau noyo anak ondo' tagamin Nano.

²Kaayag kano sumugut ra togom, mogondo' ri Kristus nonogom noyo ritakau ra Io nampataak ra painawo Nano sabap ra itakau. Nasauk Io koson ra taak simbalui ra maamis owou ondo' mampakatasu' ra guang ri Aki Kapuuno'.

³Akau ti noyo ulun ri Aki Kapuuno'. Ginio ra atan ayuk baal ru pansasawaan, baal makauyuyu' kapoam mangangkum, kalo masauk ra tatanga' min.

⁴Ginio poyo, kalo moonsoi akau manabit ra ragu makauyuyu', sasambungon, kapoam anja' ra jajajou. Kaa' moonsoi ru mindagu kau ayuk ra paringkuanangan ri Aki Kapuuno'.

⁵Karaa' min gitio: osoi ayuk makapaliso ra makauyuyu', malaat, kapoam mangangkum (gitio mogondo' ayuk koson sumamba ra sinungkalalaing), ulun koson raginilo kalo makaliman ra pamarintaan ri Kristus am i Aki Kapuuno'.[8]

⁶Pai' min polosoo' sangulun pana mamparuung ramuyun ra abau. Sabap ra paliso ragitio noyo mampakasalula' ra sangit ri Aki Kapuuno' ra ulun ondo' kalo gumagaya' Riso.

⁷Pai' kano pakimangkubayau risilo ti.

⁸Gili akau galama' lakat ayuk poyo ra kalandaman, kaa' raino nasauk kano ra ulun mangintopot ra Tuhan, ginio ra kaayag kano ralalom ru sinda.

⁹Sabap ra maayag ralalom ru sinda[9] no magibit ra ampos, ioginio nansalinut baal ra moonsoi, matanda' am motopot.

¹⁰Pirot kano maguyum ra atan ondo' mampakatasu' ra guang ru Tuhan.

¹¹Pai' pagibaya' ra sauk ru kalandaman ondo' kolondo' ampos moonsoi. Kaa' pabalaa' noyo baal koson raginio.

¹²Paat ra ngaangai' no pabalaan, bagu no makito paliso nilo ra sotopot no. (Manabit ayuk ra baal ondo' nakasibuni nilai no pana am makauyuyu' toojo.)

¹⁴Sabap ra atan ayuk pasalulaan ru sinda, makaintalang noyo.[10] Ginio sabap ru ragu ragitio, “Tirong kano, ondo' nombolong, am kaayag noyo saguli' intor ra kapatayan! I Kristus suminda ramuyun.”

¹⁵Ginio ra ilai' min toojo ati kulaan baal ru kaayagan mino. Pai' kau koson ra ulun bungas, kaa' kapintar kano.

¹⁶Moonong kaluagan ondo' mokoondo' ramuyun, alapo' min ginio koson mambaal ra moonsoi, sabap ra raino ti masuang kapaganan takau.

¹⁷Ginio ra pai' kau noyo bungas, kaa' uyumo' min noyo atan ondo' kasagaan ru Tuhan.

¹⁸Pai' kau kagauk ra anggur, ginio magibit ra paliso malaat. Kaa' sotopot no, moonsoi amon ru Ambiluo ri Aki Kapuuno' no manguasa' ramuyun.

¹⁹Moonsoi mindagu kau ra sangulun am bokon ra ragu Mazmur, rimbai mongompor ri Aki Kapuuno' am poyo rimbai Kristian. Rimbayo' noyo gitio ra Tuhan mabaya' ra guang makaansuk.

²⁰Ra pasimpungan min ri Tuhan Jisus Kristus, kasalok kano maringkuanang ri Aki Kapuuno', Ama' takau, ra ngaangai' ru atan ayuk.

²¹Gagaya' kano ra sangulun am bokon, sabap ra akau mangurumat ri Kristus.

²²Andu' kau ngai', gagaya' kano ra ralaki min, koson niayuk ra akau mangurumat ra Tuhan.

²³Sabap ra ralaki noyo ondo' maningganai ra andu' nano, mogondo' ri Kristus maningganai ra pasimpungan ulun Kristian, ioginio inan Nano.

²⁴Koson ilo gumagaya' ri Kristus, mogondo' niayuk sangulun andu' musiti' gumagaya' ra ralaki nano ralalom ru ngaangai' baal.

²⁵Ralaki kau ngai', tagami' noyo andu' mino, mogondo' ri Kristus nonogom noyo ra pasimpungan ulun Kristian am niayuk nampataak ra painawo Nano koson ilo.

²⁶Binaal ri Kristus raginio, maa' raginio maimpasawan ilo no mumbaya' ra bala' Nano am poyo mabaya' ra pamariwan.[11]

²⁷Koson raginio noyo, ralalom pagilangan ri Kristus, ilo moonsoi, mapasau am niayuk matanda', am kolondo' boo malaat risilo.

²⁸Mogondo' raginio, moonong ralaki musiti' motogom ra andu' nano koson io monogom ra inan nano galama'. Osoi ayuk motogom ra andu' nano, kaayagan nano galama' niayuk tagamin no. (

²⁹Kolondo' sangulun pana masisang ra inan nano galama', kaa' paikangon am alungin no toojo, koson niayuk i Kristus magalung toojo ra pasimpungan ulun Kristian no.

³⁰Sabap ra itakau ti noyo tayar ru inan ri Kristus no.)

³¹Mokoondo' niayuk tinulisan ra Buuk Kitab ra, “Ginio sabap ra sangulun ungkuyon sumuai ra matuo nano am masimpung ra andu' nano, am ilo karuo no masauk rondo'.”

³²Malandom kaga' arati' ru gitio, kaa' ondo' kon kuni, abig ru pabukatan ri Kristus am pasimpungan ulun Kristian no.

³³Ginio pana makakulawit niayuk ramuyun: moonong ralaki musiti' motogom ra andu' nano koson riso galama', am niayuk moonong andu' musiti' gumagaya' ra ralaki nano.