Read Timugon Murut IPISUS 6 Bible Online

IPISUS 6 - Timugon Murut bible

IPISUS 6

¹Anak kau ngai', koson maamaya' ri Kristus,[12] gagaya' kano ra matuo mino sabap ragitio noyo musiti' baalon.

²“Urumato' noyo karuo matuo muno”. Gitio susuban kasaa' intor ri Aki Kapuuno' ondo' mabaya' ra bantu', ioginio:

³“Maa' raginio moonsoi ayuk kaayagan min am maawar boo umur min ra tana' ti.”

⁴Matuo kau ngai', pai' kau pampakaruol ra guang ru anak mino suku' ra malikokot ilo. Kaa', sotopot no alungi' am ilaa' min ilo ra pangilaan ru Tuhan.

⁵Ulipon kau ngai', gagaya' am urumato' noyo tuan mino; gagayaa' min ilo toojo koson ayuk gumagaya' kau ri Kristus.

⁶Pai' gagaya' ayuk paat ra akau tainuin, koson ra makiompor kau ayuk risilo. Kaa' suguto' min noyo toojo ra kasagaan ri Aki Kapuuno', koson ulipon kau ri Kristus.

⁷Paugaro' noyo kandoi min mabaya' ra guang maansukan, koson sala' ka ulun ayuk, kaa' Tuhan noyo pangandayan min.

⁸Karaa' min noyo ra moonong ulun, iou pana ulipon kapoam kalo, mokoowot ilo niayuk ra ampos intor ra Tuhan sumugut ra atan ondo' baalon nilo ra moonsoi.

⁹Tuan kau ngai', akau pana musiti' mampakito ra paliso matanda' ra ulipon mino. Karaa' min ra akau am ulipon mino mokoondo' sangulun Tuhan giu' ra suruga', am Io kalo mampili' ra ulun.

¹⁰Pupus no, kaikang kano ralalom pasimpungan min ra Tuhan ralalom ru kuasa' Nano ondo' maayo kaga'.

¹¹Alapo' noyo ngaangai' kinandoi mangayou ondo' pinongo ri Aki Kapuuno' ramuyun, maa' raginio makagula' kau ra ruung ru Tingganai ru riwato.

¹²Sabap ra sala' ka ulun anggalon takau, kaa' ngaangai' riwato giu' ra limbowon, ioginio mangunguasa' am kaikangan ru kalandaman ondo' raino mamarinta.

¹³Sabap raginio, alapo' min noyo kinandoi mangayou ondo' pinongo ri Aki Kapuuno' ramuyun. Maa' raginio, paat ra malaat no mantipagon ramuyun maalap min niayuk ilo kaanggal. Mopongo boo pangayawan mino, lakat poyo maikang pangintapatan min.

¹⁴Ginio ra tampos kano koson sangulun saujor; ragu min ra motopot koson ayuk ra abot mino am guang min ra motopot koson ra bayang basi' mino.

¹⁵Am poyo kapiratan ru guang mino mampabala' ra Tanou Moonsoi ondo' magibit ra pabansayan ti, koson ra kasut min.

¹⁶Pangintapatan min koson ra perisai; gitio noyo makapampalasa' ra ngaangai' anak pana makaapui ondo' papanaan ru Tingganai ru Riwato.

¹⁷Apuo' min noyo pamayagan ti koson ra tupi' basi' am niayuk bala' ri Aki Kapuuno' koson ra ilang ondo' pinongo kalalair ru Ambiluo ri Aki Kapuuno'.

¹⁸Pakayo' kuliamos ru saujor ti mabaya' ra pakiasian, koson makiindangan ri Aki Kapuuno'. Kasalok kano pakiasi' maya' ra paningganayan ru Ambiluo ri Aki Kapuuno'. Ilalai', pai' pombolong am kalo langgain pakiasian min. Kasalok kano pakiasi' ri Aki Kapuuno' ra ngaangai' ulun Nano.

¹⁹Aku pana karaan ra pakiasian min, maa' raginio mangani' i Aki Kapuuno' raki' ra katandaan paat ra aku mindagu. Maa' raginio makakau' aku boo mampabala' ra atan ondo' kalo igondo' pinabala' intor ra Tanou Moonsoi no.

²⁰Sabap ra kandoi mambala' ra Tanou Moonsoi ti pinakandayan raki' ri Jisus, kabalu' pana soroi aku ra pangaputan ti raino. Pakiasi' kano koson makakau' aku po mampabala' ra Tanou Moonsoi no maya' ra inaru' no.

²¹ I Tikikus mambala' ramuyun ra ngaangai' tanou kuno, maa' raginio makapandai kau ra ati kulaan kaayagan kuno. Io no sangulun mangngandoi ondo' tagamin am ondo' mampagagaya' ra kandoi ru Tuhan.

²²Ginio sabap ra aku nanusub riso mongoi pambala' ramuyun ra ati kulaan kaayagan mai ragiti, koson mampaikang ra guang min.

²³Gama' ru i Aki Kapuuno', Ama' takau, am i Tuhan Jisus Kristus mangani' ra pabansayan, togom am pangintapatan ra ngaangai' pabukat Kristian.

²⁴Gama' ru i Aki Kapuuno' mambarakat ra ngaangai' ulun ondo' mantilayun monogom ri Jisus Kristus, Tuhan takau.