Read Timugon Murut PILIPI 3 Bible Online

PILIPI 3 - Timugon Murut bible

PILIPI 3

¹Pabukat kau, koson ra mamupus; pakaansuk kano sabap ra nakasimpung kau noyo ra Tuhan. Kalo niayuk mantipagon raki' amon ru sagulion ku poyo atan ondo' tinulisan ku noyo ramuyun i, sabap raginio mapasingkot poyo ramuyun.

²Koson ilalain min uku' masangit no, pagilalai' min poyo ulun-ulun ondo' mampakalayau ayuk, ondo' lakat ayuk poyo mampajajou ra ulun sunatin, koson ra tatandu' ilo ti toojo makaulig ri Aki Kapuuno'.

³Sotopot no itakau noyo ondo' makaulig ri Aki Kapuuno' sala' ka ilo, sabap ra itakau ti ondo' sumamba ri Aki Kapuuno' maya' ra indangan ru Ambiluo Nano galama'. Am itakau niayuk maringkuanang sabap ra nakasimpung noyo ri Jisus Kristus. Intor raginio kalo boo malansan takau ra kaulayan ondo' binaal ayuk ru ulun.

⁴Amon ru mokoondo' ulun mangkara' ra ilo motopot sabap ra lumansan ra kaulayan kapoam sabap ra kinamatuaan nilai, mulu' piboo aku ka ilo.

⁵Atan nai ra kalupus ayuk nabaluan ra aku inanak, sinunatan aku no am intor aku ra pagun ru Israil, am papag aku po ru kinamatuaan takau i Binjamin. Ginio nai ra aku ti ulun kopoyo ru bansa' Ibrani. Am poyo kinapirot ru gagaya' ku ra ukum ru ugama Jaudi noyo nagibit raki' saboi nakaaya' aku ra tayar Parisi no.

⁶Gitio noyo nangkinibit ra aku nangimbolo' ra ulun-ulun Kristian no. Am intor ra katapatan poyo, ioginio ati kulaan aku giminagaya' ra susuban ru Ukum ri Musa, kalo igondo' aku pakasala.

⁷Kaa' sabap ra gumagaya' aku ri Kristus, atan ondo' ginuang ku ragili ra maatang, karaan ku raino ra kolondo' boo onong.

⁸Am sala' ka ginio ayuk. Kaa' sotopot no ngaangai' karaan ku koson ra kolondo' boo onong sabap ra kalo noyo mokopogondo' ra ati kulaan kinologo ru intutun kuno koson ri Kristus, Tuhan kuno. Ngaangai' no tinatang ku noyo sabap ra Io, am karaan ku ginio koson ra ginsamol ayuk, maa' raginio mulu' piboo aku makaintutun ri Kristus am makasimpung Riso.

⁹Am ginio sala' ka boo intor ra katapatan kuno galama' koson gumagaya' ra Ukum ri Musa, kaa' intor ra katapatan ri Aki Kapuuno' ondo' pinataak no raki' sabap ra pangintapatan ku ri Kristus.

¹⁰Am raino rorondo' ayuk gogoton kutu, ioginio maayag mintutun ri Kristus am makaliman ra kuasa' ondo' namayag Riso intor ra kapatayan, am masaga' poyo imboloon am potoyon koson Riso.

¹¹Maa' raginio aku makakalansanan ra bayagon aku saguli' intor ra kapatayan.

¹²Kalo noyo lair mindagu aku ra matanda' aku no am kolondo' sala ku. Kaa' rayuson ku ayuk mompogogot ra taak ondo' pinatampos noyo raki' kalalair ri Jisus Kristus. Ginio boo puun ra Io nampasauk raki' ra maamaya' Nano.

¹³Pabukat kau, kalo noyo mangkara' aku[6] ra matanda' aku no, kaa' rondo' ayuk guangon kuno, ioginio kalo boo karaan ku sauk ra nakasail i, kaa' mompogogot aku ayuk momongo ra atan ondo' rayuson kutu saboi ra pupus no.

¹⁴Ginio boo puun ra aku marayus ayuk mompogogot ra taak nangulaan ti, ioginio kaayagan giu' ra suruga'. Am gitio noyo pampiawan ritakau ri Aki Kapuuno' sabap ri Jisus Kristus.

¹⁵Ginio ra itakau ondo' maikang pangintapatan, moonsoi makapangkaraan takau koson raginio. Kaa' amon ru sala' poyo pamaguangan min, makaalap kau niayuk ra papaintalangan ri Aki Kapuuno' ra ginuang min raginio.

¹⁶Baalo' takano maya' ra katapatan ondo' inila' noyo ritakau.

¹⁷Pabukat kau, tilu kano raki'. Nangani' akai no ramuyun ra tiluan matanda'. Ginio ra ilai' noyo toojo ulun ondo' tumilu koson ramon no.

¹⁸Sabap ra koson masalok aku no nakapambala' ramuyun am raino sagulion ku poyo mabaya' ra tangi', ra mokoondo' masuang niayuk ulun mansang ra pangilaan ra i Kristus minatoi ra salip.

¹⁹Kaa' pupus no ilo ti poongoyon ak ra naraka, sabap ra kasagaan ru guang nilo galama' ti noyo ondo' alapon nilo koson ra tuhan nilai. Mongompor ilo toojo ra baal nilai ondo' sotopot no makauyuyu' am mangkara' ilo ayuk ra atan ondo' guangon ru ulun ru tana' ti.

²⁰Kaa' itakau ti mamagun ru suruga' mogondo' ri Tuhan Jisus Kristus, Mamamayag takau ondo' matong poyo saguli'. Am Io no inaanin takau mabaya' ra guang moondom.

²¹Sabap ra paat ra ratangan saguli' Nano, inan takati ondo' malawo am mapuso ti, kulawon No sumauk ra baguon mogondo' koson Riso. Mabaal No ginio sabap ra Io mokoondo' ra kuasa' ondo' mapatinduku' ra ngaangai' no Riso.