Read Timugon Murut PILIPI 4 Bible Online

PILIPI 4 - Timugon Murut bible

PILIPI 4

¹Pabukat ondo' tagamin kuno, noondom aku ramuyun sabap ra akau no mampakaansuk ra guang kuno am maansayan aku magilong ra kinoonsoi ru bayag min. Ginio nai ra rayuso' noyo pasimpungan mino ra Tuhan.

²Gitio bilin ku ri Iuodia am Sintiki ra pogondoo' noyo guang mino maa' raginio mambukat kau ralalom pasimpungan min ra Tuhan.

³Am okou niayuk Sunsugos, rangan kuno mangandoi, bilin ku rirun ra indangano' noyo ruandu' ragitilo mobonsoi saguli'. Sabap ra ilo ti mapirot toojo nangindangan raki' mampabala' ra Tanou Moonsoi; koson niayuk ra indangano' poyo i Kilimin am ngaangai' ondo' nangandoi nabaya' raki'. Inggalan nilai ti nakatulis noyo ra kitab ru Ulun Mokoowot ra Kaayagan Motopot.

⁴Gama' ru masalok kau makaansuk sumimpung ra Tuhan. Sagulion ku poyo; pakaansuk kano!

⁵Pakitono' min noyo kinoonsoi ru guang mino ra ngaangai' ulun, sabap ra mamaar noyo Tuhan sumaguli'.

⁶Pai' kano kaimamang ra atan ayuk pana, kaa' kasalok noyo pasalulaa' ayuk ri Aki Kapuuno' atan ondo' kitaakon mino. Am baalo' min gitio mabaya' ra pakiasian am paringkuanangan.

⁷Bagu raginio mokoondo' kau ra kaansayan intor ri Aki Kapuuno', ondo' maalur intor ra atan ondo' karaan ru ulun. Gitio noyo magalung ra guang am pangkaraan min ralalom nasimpungan min ri Jisus Kristus.

⁸Pabukat kau, koson bilin ku ra pamupusan ti, guango' noyo ondo' moonsoi am moompor: ioginio ondo' motopot, ondo' matulai, mabanis guang, paliso moonsoi, koson mokoondo' ra togom am poyo ragu ra moonsoi rongogon.

⁹Suguto' min atan ondo' noowot min noyo intor raki', koson ra atan ondo' nakabala' kapoam binaal kuno. Am i Aki Kapuuno' ondo' manaak ra pabansayan mabaya' boo ramuyun.

¹⁰Ralalom pasimpungan ku ra Tuhan, maayo toojo kaansukan kuno, sabap ra pupus no ra raino ti igondo' poyo makapangindangan kau raki'. Sotopot no nampaguang kano ragitio, kaa' kolondo' ayuk kaluagan min mangani' ra pangindangan ti.

¹¹Pai' ru rinagu ku gitio sabap ra nailusan aku: sabap ra naubas aku no ra atan ayuk.

¹²Nakaili' aku no ra ati kulaan kaayagan ra nakayaan kapoam maulian. Am nakapandai aku niayuk ra ati kulaan maubas ra kabalu' pana mansalinut ondo' masauk raki', iou pana paat ra naasug kapoam naitilan, ra aku langkaya' kapoam musikin.

¹³Am ngaangai' maalap ku kabaal ralalom ri Kristus ondo' mangani' raki' ra kaikangan.

¹⁴Kaa' moonsoi niayuk binaal minti ra nangindangan kau raki' paat ra aku makakapaganan.

¹⁵Pabukat kau ra Kristian ra Pilipi, akau galama' noyo makapandai ra paat aku timinalimpuun nampasaboi ra Tanou Moonsoi, ioginio ra aku nanatang ra Makidonia ragili, akau no rorondo' ayuk pasimpungan ra Kristian ondo' nangani' raki' ra ruit pangindangan.

¹⁶Am poyo ra aku soroi ra bandar Tisalonika, mokoondo' ingkukula' kano nangator raki' ra kaukapan, ioginio ruit pangindangan.

¹⁷Sotopot no pai' ru mompogogot aku ra taak mino raginio, kaa' ondo' ayuk gogoton ku ioginio ampos ru kasingkatan mino.

¹⁸Am raino suang ru pinataak min raki' i, mauli' poyo toojo intor ra kaukapan kuno. Am ngaangai' no pinasuku' noyo raki' ri Ipaproditus. Ondo' pinataak mino raginio, mogondo' ra taak maamis owou, am koson ayuk ra taak simbalui pataakon ri Aki Kapuuno' ondo' mampakatasu' ra guang Nano.

¹⁹Kalangkayaan ri Aki Kapuuno' ondo' sambaan kuno kalo mauntob, ginio ra ralalom ri Jisus Kristus noyo Io mangukop ra atan ayuk kolondo' ramuyun sumugut ra katulayan Nano.

²⁰Koompor noyo i Aki Kapuuno', Ama' takau suku' ra sabuoi-buoi no! Amin.

²¹Pasukuo' noyo kaansayan kutu ra ngaangai' ulun ri Aki Kapuuno' ondo' nakasimpung ri Jisus Kristus. Am poyo apuo' niayuk kaansayan intor ra pabukat Kristian ondo' mabaya' raki' ragiti.

²²Ngaangai' ulun ri Aki Kapuuno' ragiti mampasaboi ra kaansayan nilo ramuyun, mulu' poyo ilo ondo' mayan ra istana ru Kaisar.

²³Gama' ru Tuhan Jisus Kristus mambarakat ramuyun ngaangai'.