Read Timugon Murut KOLOSI 1 Bible Online

KOLOSI 1 - Timugon Murut bible

KOLOSI 1

¹Aku i Paulus, sangulun rasul ondo' mampasaboi ra tanou ri Jisus Kristus am poyo i Timotius, pabukat takau ra Kristian.

²Gitio posoboyon ku ra ulun ri Aki Kapuuno' ondo' masisimpung ri Kristus giu' ra bandar Kolosi. Gama' ru i Aki Kapuuno', Ama' takau, manaak ramuyun ra barakat am pabansayan.

³Masalok akai maringkuanang ri Aki Kapuuno', Ama' ru Tuhan takau i Jisus Kristus, ralalom moonong pakiasian mai ramuyun.

⁴Sabap ra nakaining akai noyo ra ati kulaan pangintapatan min ri Jisus Kristus am togom min ra ngaangai' ulun ri Aki Kapuuno'.

⁵Ra intor noyo ra Tanou Moonsoi ondo' motopot[1] ti kasaa' pinabala' am nakasaboi ramuyun, makakalansanan kano. Mangintopot am motogom kau sabap ra kalansanan makaapu ondo' pinongo noyo ramuyun giu' ra suruga'.

⁶Tanou Moonsoi ti nagibit ra barakat am nakatabual ra ati ayuk intok ra tana' ti, koson niayuk ra tatanga' min. Kataawan poyo ri Aki Kapuuno', ondo' naining min ra kasaa' i, maintutunan min ra atan ginio sotopot no.

⁷Inigigilaan min ragitio intor ra rangan mangangandoi mai i Ipapras, ondo' tagamin mai. Io sangulun mangngandoi ri Kristus ondo' sumugut toojo ra kandoi maatang maiti.[2]

⁸Io ti niayuk ondo' nambala' ramon ra ati kulaan Ambiluo ri Aki Kapuuno' no magibit ramuyun mokopontotogom.

⁹Ginio nai ra intor poyo ra akai nakaining raginio, masalok akai boo mangkara' ramuyun ralalom pakiasian mai. Makiasi' akai ri Aki Kapuuno' ra makatutun kau ra atan sotopot no kasagaan Nano, ioginio aniin kau ru Ambiluo ri Aki Kapuuno' ra kapintaran am kapandayan.

¹⁰Kon raginio boo ra maayag kau sumugut ra kasagaan Nano am makapapabansuk ra guang Nano, ioginio kaayagan min magibit ra nansalinut baal moonsoi am mulu' poyo makaintutun kau ri Aki Kapuuno'.

¹¹Gama' ru kuasa' ri Aki Kapuuno' ondo' kolondo' pogondo' mampaikang ramuyun saboi mataan kau ra atan ayuk masauk no mabaya' ra kaansayan am kalo malawo guang min.

¹²Am mabaya' ra kaansukan, paringkuanang kano[3] ri Aki Kapuuno', Ama' takau, ondo' nampasauk ramuyun makatayar intor ra pinongo Nano ra ulun ondo' mangintopot Riso, giu' ra ralalom ru pamarintaan ondo' natikop ra sinda Nano.

¹³Nampalabus Io noyo ritakau intor ra kuasa' ru kalandaman am pinoongoi takau boo ra ralalom ru pamarintaan ru Anak tinagaman Nano.

¹⁴Ralalom ru Anak ti noyo itakau pinalabus; ioginio naampun noyo tula takau.

¹⁵I Jisus Kristus no mogondo' ri Aki Kapuuno' ondo' kalo maalap kakito. Io ti anak langkuir Nano ondo' maatang toojo intor ra ngaangai' ru sinauk Nano.

¹⁶Sabap ralalom Nano niayuk i Aki Kapuuno' nampasauk ra ngaangai' ondo' giu' ra suruga' am niayuk giti ra tana' ti: ioginio ngaangai' ondo' maalap kakito kapoam kalo; ngaangai' ondo' manguasa' am mamarinta ra ati ayuk giu' ra rasawat kapoam ra tana' ti. Ngaangai' ru tana' am limbowon sinauk ri Aki Kapuuno' ralalom ri Jisus Kristus koson mangurumat Riso.

¹⁷I Jisus Kristus noyo nakasigulu soroi intor ra ngaangai' no am sabap Riso ngaangai' posoroyon ra intok nilo sigagama'.

¹⁸Io no maningganai ra inan, ioginio pasimpungan ulun Kristian, am Io poyo puun ru kaayagan bagu nilono. Io po Anak Langkuir ri Aki Kapuuno' ondo' binayag saguli' intor ra kapatayan, koson nampasauk Riso ra maatang intor ra ngaangai'.

¹⁹I Aki Kapuuno' noyo galama' nangatang ra ngaangai' ru atan ayuk mokoondo' Riso, mokoondo' niayuk ra Anak Nano.

²⁰Ralalom ru inggalan ru Anak niayuk, i Aki Kapuuno' nangaru' ra ngaangai' mobonsoi saguli' Riso, ioginio atan ayuk suang ru tana' ti kapoam atan mokoondo' giu' ra suruga'. Gitio sinauk Nano ralalom pinatayan ru Anak Nano ra salip.

²¹Akau pana ragili, timinalikur kau ri Aki Kapuuno'. Nakimantula' kau Riso sabap ra paliso am guang mino malaat.

²²Kaa' raino, ralalom pinatayan ru Anak Nano, i Aki Kapuuno' nopobonsoi ramuyun saguli' Riso. Ginio noyo ralan ra akau maapu No koson ra ulun ondo' mapasau guang, kolondo' kasalaan am ondo' motopot.

²³Maalap min ginio amon ru gumagaya' kau toojo, koson mampaikang toojo ra pangintapatan min. Pai' min noyo impayi' kalansanan ondo' tinaakan ramuyun paat ra akau nakaining ra Tanou Moonsoi i. Tanou ragitio nakatabual noyo ra ati ayuk ra tana' ti am aku i Paulus masauk ra ulipon koson mampaugar ra kandoi ragitio.

²⁴Raino maringkuanang aku ra kaimbalaan ondo' nasauk raki' am sabap ragitio noyo mangindangan ramuyun. Sabap ra mangukop ra kaimbalaan ri Kristus ondo' ginio kaatangan ru pasimpungan ulun Kristian ondo' karaan koson ra inan Nano.

²⁵Sumugut ra kasagaan ri Aki Kapuuno' aku nasauk sangulun ulipon ru pasimpungan ulun Kristian, ioginio mampasaboi ra Tanou Moonsoi.

²⁶Kukula' noyo buoi tanou ti nakasibuni ra ngaangai' ulun, kaa' bagu raino ti pinabala' ra ulun ondo' mangintopot Riso.

²⁷Inatang noyo ri Aki Kapuuno' ra pabalaan No ondo' nakasibuni i risilo; ra mumpara' boo bonsoi ru barakat ondo' pataakon Nano ra ngaangai' ulun, ioginio i Jisus Kristus rumondon ra guang min, ondo' arati' no magapu kau ra katulayan ri Aki Kapuuno'.

²⁸Ginio nai ra mampasaboi akai ra tanou ri Jisus Kristus ra ulun masuang. Mampakara' am mangila' akai ra moonong ulun mabaya' ra kapintaran. Kuayan mai maa' raginio moonong ulun maapu ri Aki Kapuuno' sabap ra makapasimpung ilo ri Kristus koson ra ulun kolondo' boo sala.

²⁹Koson mampasingkot ra kandoi raginio, sumingkotog aku toojo. Maayo toojo kuasa' ri Kristus ondo' mabaya' ra kandoi kutu.