Read Timugon Murut KOLOSI 4 Bible Online

KOLOSI 4 - Timugon Murut bible

KOLOSI 4

¹Tuan kau ngai', moonsoi paningganayan min ra ulipon mino motopot am kalo mampili' ra ulun. Karaa' min ra akau pana makatuan giu' ra suruga'.

²Ralalom ru pakiasian min, pirot kano toojo, ilalai' am paringkuanang ri Aki Kapuuno'.

³Karaa' min niayuk akai ralalom ru pakiasian min, maa' raginio i Aki Kapuuno' mangani' ramon ra kaluagan mampasaboi ra tanou ri Kristus ondo' kalo igondo' pinabala'. Sabap ra kinibit ru kandoi ragitio noyo ra aku pinasubol ra pangaputan ti.

⁴Pakiasi' kano maa' raginio maalap ku pakasalula' tanou ragitio koson maratian boo ru ulun.

⁵Kapintar kano paat ra akau lumatok ra ulun ondo' kalo mangintopot no. Kaluagan raginio alapon min mampakito risilo ra akau maamaya' ri Kristus.

⁶Kasalok kano makimansunur ra ondo' mampakatasu' am makapamunduk ra guang. Tutun kano ati kulaan tumaam ra matanda' ra atan ayuk pangkuatan ru sasangulun.

⁷ I Tikikus ti noyo ondo' mambala' ramuyun ngaangai' ra ati kulaan aku ra giti. Io ti sangulun pabukat takau ra Kristian ondo' tagamin mai, sangulun mangngandoi ondo' kalansanin ralalom kandoi mai ra Tuhan.

⁸Ginio nai ra pinoongoi ku io ramuyun koson makaintutun kau ra ati kulaan mai ragiti, ra kalo boo magalabo kau.

⁹I Onisimus poyo sumambaya' ri Tikikus. Akau niayuk ra ulun. Io sangulun kalansanin am tagamin mai. Ilo karuo ti noyo mambala' ramuyun ra ngaangai' ondo' masauk ragiti.

¹⁰I Aristarkus ondo' inaput nabaya' raki' ti mampasaboi ra bilin kaansayan ramuyun. Am niayuk ri Markus, pantukir ri Barnabas. (Nambilin aku no ra amon ru mongoi i Markus ramuyun, apuo' min io.)

¹¹I Josua, ondo' poyo sabiton ri Justus, io pana mampasaboi ra bilin kaansayan ramuyun. Intor ra ulun ru Jaudi ondo' nasauk ra Kristian, ilo talu ngaulun ti ayuk ondo' mabaya' raki' mampaugar ra kandoi ru Pamarintaan ri Aki Kapuuno'.[7] Mangindangan ilo toojo raki'.

¹²Bilin kaansayan poyo intor ri Ipapras. Akau niayuk ra ulun. Io ti ulipon ri Jisus Kristus am masalok io mapirot mangkara' ramuyun ralalom pakiasian nano. Intor noyo ra pakiasian nano ri Aki Kapuuno' maikang kau am totopot makaintutun am poyo sumugut niayuk ra ngaangai' ru kasagaan ri Aki Kapuuno'.

¹³Aku noyo galama' makapangani' ra kaintutunan intor ra kinapirot ru kandoi nano ramuyun am niayuk namagun ra bandar Laodikia am Irapolis.

¹⁴I Lukas pana, sangulun duktur ondo' tagamin mai, mampasaboi ra bilin kaansayan ramuyun am mogondo' niayuk ri Dimas.

¹⁵Posoboyo' noyo bilin kaansayan mai ra pabukat ra Kristian giu' ra Laodikia, am poyo ri Nimpa am ulun ondo' sumambayang giu' ra baloi nano.

¹⁶Mopongo surat ti mabasa' min, painjulo' min poyo ra pasimpungan ulun Kristian giu' ra Laodikia, maa' raginio mabasa' nilo niayuk. Mogondo' ra surat kuli ra bokon i ondo' painjulon boo ramuyun ru ulun Laodikia, basaa' min.

¹⁷Balai' i Arkipus, “Karaa'. Pongoono' noyo ondo' pinakandayan rirun ru Tuhan.”

¹⁸Aku no galama' manulis ragitio: Bilin kaansayan intor raki', i Paulus. Pai' liliani' ra kapaganan kutu ra lakat aku ayuk poyo aputon! Gama' ru i Aki Kapuuno' mambarakat ramuyun.