Read Timugon Murut 1 TISALONIKA 4 Bible Online

1 TISALONIKA 4 - Timugon Murut bible

1 TISALONIKA 4

¹Pabukat ku ngai', pupus no, nangani' akai no ramuyun ra tiluan moonsoi ra ati koson ru kaayagan ondo' mapabansuk ra guang ri Aki Kapuuno' am ginagaya' min noyo ginio. Kaa' raino, ralalom inggalan ri Tuhan Jisus, kitaakon am kimaitin takamin mirot poyo toojo mapabansuk ra guang ri Aki Kapuuno'.

²Sabap ra napandayan min ra nanuluan maili ramuyun intor noyo ra kuasa' ru Tuhan Jisus.

³Sabap ra masaga' i Aki Kapuuno' ra kaayagan mino mapasau, ginio ra inggalur kano ra baal ru pansasawaan.

⁴Moonong ungkuyon musiti' mapandai ati kulaan mangurumat ra andu' nano,[5] bagu ginio mapabansuk ra guang ri Aki Kapuuno' am poyo ra ulun.

⁵Pai' kano baya' ra kinibit lumapau, koson ra ulun ondo' kalo makaulig ri Aki Kapuuno'.

⁶Intor ra baal ragitio, pai' kano pambaal ra kasalaan kapoam mamparuung ra pabukat min ra Kristian. Sabap ra nakapansawai akai noyo toojo ramuyun ragili ra Tuhan noyo ondo' mangukum ra ngaangai' baal koson raginio.

⁷Kalo piniau takau ri Aki Kapuuno' koson maayag ra pansasawaan, kaa' koson maayag ra mapasau.

⁸Ginio nai ra osoi ayuk kalo mangapu ra pangilaan ti, sala' ka ulun ayuk ondo' kalo apuon nati, kaa' i Aki Kapuuno' galama', ondo' mangani' ra Ambiluo Nano ramuyun.

⁹Kalo pana boo mamatik akai ramuyun ra ati kulaan motogom ra pabukat min ra Kristian, sabap ra akau galama' naila' noyo ri Aki Kapuuno' koson motogom ra rondo' am bokon.

¹⁰Am ginio pinakito min noyo ra ulun-ulun Kristian ra tikop-tikop ru pagun Makidonia. Kaa' pabukat ku ngai', kitaakon takamin mirot poyo toojo mapabansuk ra guang ri Aki Kapuuno'.

¹¹Kaayag kano toojo ralalom pabansayan am pai' sombot ra atan ondo' baalon ru bokon. Sigagama' kano paginakan koson ra nambalaan mai ramuyun ragili.

¹²Amon ru kaayagan min koson noyo raginio, kalo pana boo lumansan kau ayuk ra bokon, am ilo ondo' kalo mangintopot ri Kristus pana mangurumat boo ramuyun.

¹³Pabukat ku ngai', masaga' akai ra akau makapandai ra sauk ru ulun namagatoi, maa' raginio kalo mangiluk guang min, koson ra ulun ondo' kolondo' kalansanan no.

¹⁴Mangintopot takau ri Jisus minatoi am naayag saguli'. Mangintopot takau niayuk ra bayagon saguli' ri Aki Kapuuno' ulun namagatoi ondo' nangintopot ri Jisus, koson masisimpung ilo Riso.

¹⁵Gitio noyo pangilaan ru Tuhan ondo' posoboyon mai ramuyun: Paat ri Tuhan Jisus matong saguli', itakau ondo' lakat ayuk poyo maayag paat raginio kalo noyo sumigulu ra ulun-ulun namagatoi.

¹⁶Sabap ra tingganai ru malaikat manusub ra bolos mosongou am bujung ri Aki Kapuuno' samputin, am Tuhan Jisus galama' boo tumuun intor ra suruga' am ulun namagatoi ondo' nangintopot ri Jisus pasiguluon bayago'.

¹⁷Itakau boo ondo' maayag ayuk poyo paat raginio kayangon maya' ra gaun mababaya' risilo, mongoi tuum ra Tuhan giu' ra limbowon. Itakau pana masimpung boo ra Tuhan ra sabuoi-buoi no

¹⁸Ginio ra kaikango' noyo guang mino ra rondo' am bokon ra ragu ragitio.