Read Timugon Murut JOSUA 11 Bible Online

JOSUA 11 - Timugon Murut bible

JOSUA 11

¹Raja' Jabin intor ra Gajor nokorongog ra kamanangan ru ulun ru Israil. Io pana nambilin ra Raja' Jobab intor ra bandar Madon am ra raja'-raja' ru bandar Simron am Aksap,

²am niayuk raja'-raja' intor ra bandar-bandar giu' ra kabuluran ra ralayo, giu' ra Limayak Jordan tampilon ra rabugus ru Tasik Galilia, giu' ragana' toojo ru bulur, am giu' ra nagas maar ra bandar Dor.

³Raja' Jabin niayuk nambilin ra ulun ru Kanaan tampilon ra sirangon am tampilon ra kalasaan ru Sungoi Jordan, am niayuk ra ulun ru Amori, Git, Piris; ra ulun ru Jibusi giu' ra kabuluran am ulun ru Giwi giu' ra lonson toojo ru Gunung Girmon giu' ra libung Mijpa.

⁴Raja'-raja' no minatong nabaya' ra pulalai ru saujor nilo, ondo' kinasuang koson ra agis giu' ra raat. Mokoondo' ilo niayuk ra masuang kuda am kurita' kuda.

⁵Ngaangai' raja' no nagamung am nabaya' minatong nangkim maar ra Sungoi Mirom koson mangayou ra Israil.

⁶Kaa' indagu TUHAN ri Josua, “Pai' kalaa' risilo! Susuab no, olo'-olo' paat koson ragitio, mamatoi Aku risilo ngaangai' am mapataak risilo ra Israil. Paat raginio tibaso' kuda-kuda am solobo' kurita' kuda nilono.”

⁷Ginio ra i Josua am ngaangai' ru saujor nano namulunsar risilo ra namulali' giu' ra Sungoi Mirom.

⁸Nanaak TUHAN ra ulun ru Israil ra kamanangan ra pantula'; ulun ru Israil namulunsar am nangilou ra pantula' saboi ra Misripot-Maim am Sidon giu' ra ralayo, am saboi ra Limayak Mijpa giu' ra sirangon. Pangayawan no nasauk saboi ngaangai' pantula' pinatoi.

⁹Namakuan ri Josua ra pantula' nontopot ra susuban ru TUHAN; tinibasan no kuda-kuda am nonolob ra kurita' kuda nilono.

¹⁰I Josua pana riminuli' am nampagaau ra Gajor, am namatoi ra raja' ru bandar no. (Paat raginio Gajor bandar ondo' maikang kaga' intor ra pamarintaan-pamarintaan.)

¹¹Namatoi i Josua am saujor nano ra ngaangai' ulun ra giu' no; kalo pinoloso nilo sangulun pana naayag. Ilo niayuk nonolob ra bandar no.

¹²Rinakop ri Josua ngaangai' raja' no am ginaau bandar nilono. Namatoi io ra moonong ulun ra giu' no, sumugut ra susuban ri Musa, ulipon ru TUHAN.

¹³Kaa' ulun ru Israil kalo nonolob ra rondo' pana bandar ondo' binaal giu' rasawat ru bulur, ondo' ayuk am bandar Gajor ondo' sinolob ri Josua.

¹⁴Ulun Israil nangalap ra ngaangai' rapu' am bibiag tinambiag intor ra bandar-bandar, kaa' namatoi ilo ra ngaangai' mamagun no. Kolondo' sangulun pana pinoloso naayag.

¹⁵TUHAN nampataak ra susuban Nano ri Musa, ulipon Nano, am pinataak ri Musa ginio ri Josua; ginagaya' ri Josua susuban-susuban no. Binaal no ngaangai' ondo' nanusuban ru TUHAN ri Musa.

¹⁶Ginaau ri Josua titikop ru tana' raginio — kabuluran am lonson toojo ru bulur, iou pana giu' ra ralayo am poyo giu' ra rabugus, ngaangai' libung ru Gosyin am tana' mapua' tampilon rabugus ru Gosyin am niayuk Limayak Jordan.

¹⁷Wilayah no malangka' intor ra Gunung Galak giu' ra rabugus, maar ra Idom, saboi giu' ra Baal-Gad giu' ra ralayo giu' ra limayak ru pagun Libanon, giu' ra tampilon rabugus ru Gunung Girmon. Nabuoi kaga' i Josua nangayou ra raja' ru wilayah raginio, kaa' rinakop am pinatoi no ilo ngaangai'.

¹⁹Bandar ra rorondo' ondo' nobonsoi ra ulun ru Israil iono bandar Gibion, intok inayanan ru santayaran ulun ru Giwi. Ngaangai' bandar ra bokon kinala ralalom ru pangayawan.

²⁰TUHAN nambaal risilo miningkotog mangayou ra ulun ru Israil, maa' raginio makai' ilo pusoon am potoyon ra kolondo' guang makaasi'. Ginio noyo ondo' nanusuban ru TUHAN ri Musa.

²¹Paat raginio namuso i Josua ra bansa' ru maayo ulun ondo' sabiton ra Inak, ondo' minayan giu' ra libung kabuluran — giu' ra Gibron, Dibir, Anab am giu' ra ngaangai' kabuluran ru Jiuda am Israil. Namatoi i Josua risilo ngaangai' am napalunsai ra bandar-bandar nilo.

²²Kolondo' sangulun pana intor ra bansa' ru Inak ondo' minayan giu' ra pagun Israil, kaa' mokoondo' kukula' ngaulun ondo' lakat poyo minayan giu' ra Gaja, Gat am Asdod.

²³I Josua nampagaau ra titikop ru tana' no, sumugut ra susuban ru TUHAN ri Musa. Tinayar-tayar ri Josua tana' no, am nanaak ra santayaran ra moonong bansa' ru Israil koson ra longgom nilo ilo galama'. Ulun ru Israil liminonggo' nangayou am pagun nilo mamimio.