Read Timugon Murut JOSUA 13 Bible Online

JOSUA 13 - Timugon Murut bible

JOSUA 13

¹Raino matutuo noyo kaga' i Josua. Indagu TUHAN riso, “Matutuo kou noyo kaga', kaa' lakat poyo masuang tana' ondo' musiti' gaawon:

²ngaangai' wilayah ru Palistin am Gisur,

³am niayuk titikop wilayah Awi am giu' tampilon ra rabugus. (Tana' intor ra Sungoi Sikgor giu' ra balitan ru Misir, saboi ra balitan ru Ikron giu' ra ralayo, karaan ra tana' ru ulun ru Kanaan; raja' ru ulun ru Palistin minayan giu' ra Gaja, Asdod, Askilon, Gat am Ikron.)

⁴Tana' ondo' lakat poyo musiti' gaawon: titikop pagun Kanaan am Miara (longgom ru ulun ru Sidon), saboi ra Apik giu' ra balitan ru pagun ru ulun ru Amori;

⁵tana' ru ulun ru Gibal; titikop intok ru Libanon giu' ra tampilon sirangon no, intor ra Baal-Gad giu' ra tampilon rabugus ru Gunung Girmon saboi ra Ginting Gamat;

⁶nakasimpung niayuk titikop pagun ru ulun Sidon, ondo' minayan giu' ra kabuluran pangkilolot ru Kagunungan Libanon am Misripot-Maim. Pagiruon Ku ngaangai' ulun raginio paat ra ulun ru Israil mamulunsar risilo. Tayaro' noyo am pataako' noyo tana' no ra ulun ru Israil koson ra longgom nilo, koson ra nanusuban Kuno rirun.

⁷Raino, tatayaro' noyo tana' no ra siam bansa' ra bokon am sampiruo intor ra bansa' ru Manasi maa' raginio masauk ra tana' longgom nilo.”

⁸Bansa' ru Rubin, Gad am sampiruo intor ra bansa' ru Manasi nakaalap noyo ra tayar ru tana' ondo' tinaakan ri Musa, ulipon ru TUHAN; tana' no giu' ra tampilon sirangon ru Sungoi Jordan.

⁹Wilayah nilo nakasimpung Aroir (giu' ra kiing ru limayak Sungoi Arnon) am bandar ondo' nakatatanga' ra limayak no, nakasimpung ngaangai' tana' marata' masawat intor ra Midiba saboi ra Dibon.

¹⁰Tana' nilo malangka' saboi ra balitan ru Amon, nakasimpung ngaangai' bandar ondo' pinarinta ru Raja' Sigon, raja' ru ulun ru Amori, ondo' nakaili' namarinta giu' ra Gisybon;

¹¹nakasimpung niayuk libung Giliad, libung giu' ra liliut ru Gisur am Maakga, titikop intok ru Gunung Girmon am titikop libung ru Basan saboi ra Salka.

¹²Tana' nilo nakasimpung pamarintaan ru Raja' Og, raja' ondo' nakaili' namarinta giu' ra Asytarot am Idrii, Raja' Og iono papag ondo' pupus toojo intor ra ulun Ripaim.[14] Kinala ri Musa ngaangai' ulun raginio am napagiru' risilo.

¹³Kaa' ulun ru Israil kalo napagiru' ra mamagun ru Gisur am Maakga; ilo lakat poyo minayan giu' ra Israil.

¹⁴I Musa kalo nanaak ra bansa' ru Liwi ra tana' sabap sumugut ra susuban ru TUHAN ri Musa, pataakin risilo tayar intor ra taak-taak simbalui ondo' solobon ra rasawat ru altar tayar ru TUHAN i Aki Kapuuno' ru Israil.

¹⁵Pinataak noyo ri Musa santayaran ra tana' ra sasambaloi ru bansa' ru Rubin koson ra longgom nilo.

¹⁶Wilayah nilo nakasimpung Aroir (giu' ra kiing ru limayak Sungoi Arnon) am bandar nakatatanga' ra limayak no, nakasimpung titikop ru tana' marata' masawat giu' ra liliut ru Midiba.

¹⁷Wilayah raginio nakasimpung Gisybon am ngaangai' bandar giu' ra tana' marata' masawat: Dibon, Bamot-Baal, Bit-Baal-Mion,

¹⁸Jagas, Kidimot, Mipaat,

¹⁹Kiryataim, Sibma, Jirit-Gasagar giu' ra rasawat ru bulur ra limayak raginio,

²⁰Bit-Pior, pipilon ru Gunung Pisga am Bit-Jisimot.

²¹Wilayah no niayuk nakasimpung ngaangai' bandar giu' ra tana' marata' masawat am titikop pamarintaan ru Raja' Sigon, raja' ru ulun ru Amori ondo' nakaili' namarinta giu' ra Gisybon. I Musa nangala riso am ulun-ulun nanguasa' ru Midian: Iwi, Rikim, Jur, Gur am Riba. Ngaangai' ulun ragitio nakaili' namarinta ra tana' no ra tayar ru Raja' Sigon.

²²Bobokon ra ulun ondo' pinatoi ru ulun ru Israil iono i Biliam anak ri Bior, mangilong no.

²³Sungoi Jordan nasauk ra balitan ru wilayah Rubin giu' ra tampilon kalasaan. Ginio noyo ngaangai' bandar am pekan ondo' tinaakan ra ngaangai' sasambaloi ru bansa' ru Rubin koson ra longgom nilo.

²⁴Tinaakan niayuk ri Musa santayaran ra tana' ra sasambaloi ru bansa' ru Gad koson ra longgom nilo.

²⁵Wilayah nilo nakasimpung Jaijir, ngaangai' bandar Giliad, sampiruo intor ra tana' Amon saboi ra Aroir giu' ra tampilon sirangon Raba.

²⁶Tana' nilo malangka' intor ra Gisybon saboi ra Ramat-Mijpa am Bitonim, intor ra Maganaim saboi ra balitan ru Lodibar.

²⁷Giu' ra Limayak Jordan, wilayah no nakasimpung Bit-Garam, Bit-Nimra, Sukot am Japon, iono intok ra bokon ru pamarintaan Raja' Sigon intor ra Gisybon. Giu' ra tampilon kalasaan, balitan ru wilayah no iono Sungoi Jordan saboi ra Tasik Galilia giu' ra ralayo.

²⁸Ginio noyo ngaangai' bandar am pekan ondo' tinaakan ra ngaangai' sasambaloi ru bansa' ru Gad koson ra longgom nilo.

²⁹I Musa nanaak niayuk ra santayaran ra tana' ra ngaangai' sasambaloi ra sampiruo intor ra bansa' ru Manasi koson ra longgom nilo.

³⁰Wilayah nilo nakasimpung Maganaim am titikop Basan, iono ngaangai' pamarintaan ru Raja' Og intor ra Basan, nakasimpung onom ngoopor kampung Jair giu' ra libung Basan.

³¹Intok nilo niayuk nakasimpung sampiruo ra libung Giliad nakaaya' Asytarot am Idrii, ruo pusor ru bandar pamarintaan Raja' Og giu' ra libung Basan. Titikop intok raginio tinaakan ra sampiruo intor ra sasambaloi ru papag ri Makgir anak ri Manasi.

³²Ginio noyo ralan ri Musa nantayar ra tana' giu' tampilon sirangon ru Jiriko am Sungoi Jordan paat io giu' ra tana' marata' magana' ru Moab.

³³Kaa' kalo nanaak i Musa ra tayar ru tana' ra ati pana ra bansa' ru Liwi. Nambala' i Musa risilo ra tayar nilo iono intor ra taak-taak simbalui ondo' pataakon ra TUHAN i Aki Kapuuno' ru Israil.